Bahar Muradova: AMİP-in "İctimai Palata"dan hakimiyyətin təhriki ilə çıxması barədə deyilənlər cəfəngiyyatdan başqa bir şey deyil

Bakı:

27 °C

64 %

1 m/s

AZ RU EN

Ana səhifə / Siyasət / Bahar Muradova: AMİP-in "İctimai Palata"dan hakimiyyətin təhriki ilə çıxması barədə deyilənlər cəfəngiyyatdan başqa bir şey deyil

Bahar Muradova: AMİP-in "İctimai Palata"dan hakimiyyətin təhriki ilə çıxması barədə deyilənlər cəfəngiyyatdan başqa bir şey deyil

23.04.2011 [11:58]

Milli Məclis (MM) sədrinin müavini Bahar Muradovanın SİA-ya müsahibəsi:
- Böyük Britaniya parlamentinin Lordlar palatasının vitse-spikeri, baronessa Kerolayn Koksun Dağlıq Qarabağa səfər etməsini, separatçı qurumun başçıları ilə keçirdiyi görüşü necə dəyərləndirirsiz?
- Böyük Britaniya parlamentinin Lordlar palatasının vitse-spikeri, baronessa Kerolayn Koksun Dağlıq Qarabağa səfərinə mənfi münasibət bildirirəm. Azərbaycan höküməti və Xarici İşlər Nazirliyi də bununla bağlı mövqeyini ortaya qoyub. Hesab edirəm ki, ədalətli və haqlı tələbdir. Hal-hazırda Kerolayn Koksun Dağlıq Qarabağa səfərini əngəlləyə biləcək hər hansı bir fəaliyyət göstərmək imkanlarımızı nəzərə alaraq onun Azərbaycanın digər bölgələrinə səfərlərinə embarqo qoyulmasını dəstəkləyirəm. Hesab edirəm ki, Böyük Britaniya parlamentinin Lordlar Palatasının vitse-spikeri İngiltərə ilə Azərbaycan arasında olan münasibətlərin ruhuna uyğun olmayan bir addım atır.
- Moskvada keçirilən Azərbaycan, Ermənistan və Rusiyanın xarici işlər nazirlərinin görüşünə münasibətiniz necədir?
- ATƏT-in Minsk qrupunun üzdə görünən çevik fəaliyyəti ilə bağlı başqa fikir ola bilməz. Görüntü ondan ibarətdir ki, onlar çox hərəkət edirlər. Regiona səfərləri artıb, müzakirələrini intensivləşdiriblər. Bütün bunların nəticəsi olmadığına görə, Dağlıq Qarabağ münaqişəsi ətrafında yaranan vəziyyət bizi qane etmir. Hesab edirəm ki, sözügedən görüşün keçirilməsi də bu prosesin bir mərhələsidir. Eyni zamanda, nazirlərin görüşü, ATƏT-in Minsk qrupunun həyata keçirdiyi fəaliyyətin bir elementidir.
- Bəzi millət vəkilləri ATƏT-in Minsk qrupundan imtina edilməsi ilə bağlı fikirlərlə çıxış ediblər. Sizin buna münasibətinizi bilmək istərdik.
- Mən bütün bu tənqidi fikirləri normal qəbul edirəm. Hesab edirəm ki, hər kəs öz etirazını bir formada bildirməlidir. Bu da ondan irəli gəlir ki, münaqişənin həlli uzandıqca uzanır. ATƏT-in Minsk qrupu üzdə görünən çevik fəaliyyət göstərir, amma nəticə yoxdur. Ona görə də, insanlar haqlı olaraq öz etirazlarını bildirirlər. Hər kəs çıxış yolu axtarır. Maraqlıdır ki, yeni formatın yaranması və yeni ölkələrin bu münaqişənin həllinə cəlb edilməsi nə nəticə verəcək? Bunu proqnoz etməkdə çətinlik çəkirəm.
- AMİP-in “İctimai palata”dan hakimiyyətin təhriki ilə çıxması barədə deyilənlərə münasibətiniz necədir?
AMİP-in “İctimai palata”dan hakimiyyətin təhriki ilə çıxması barədə deyilənlər cəfəngiyyatdan başqa bir şey deyil. Oyuncaq qurum iflasa uğradığını ört-basdır örtmək üçün ortaya belə iddialar atıb. Onda nəyə görə AMİP “İctimai palata”ya daxil olanda həmin qüvvələr bunun hakimiyyətin təhriki ilə bağlı olduğunu deməmişdilər? Yalnız AMİP oradan çıxanda belə fikirlər işlədildi.
O ki qaldı müxalifətin iqtidar haqqında fikirlərinə, bu, yeni deyil. Neçə illərdir, Azərbaycanda müxalifət düşünür ki, iqtidar legitim deyil, iqtidar isə haqlı olaraq öz işi ilə məşğuldur, üzərinə düşən məsuliyyəti yerinə yetirərək həm dövlət, həm də millətin maraqları istiqamətində fəaliyyətini qurur, nəticələr də müsbətdir.

Paylaş:

Baxılıb: 1009 dəfə