Mən Azərbaycanı özümə ikinci Vətən bilirəm

Bakı:

13 °C

94 %

8 m/s

Əlaqə

AZ RU EN

Ana səhifə / Siyasət / Mən Azərbaycanı özümə ikinci Vətən bilirəm

Mən Azərbaycanı özümə ikinci Vətən bilirəm

21.05.2011 [09:21]

Görkəmli qazax şairi Oljas Süleymenov bu sözləri həmişə qürurla söyləyir
Görkəmli qazax yazıçısı, alimi, publisisti və ictimai xadimi Oljas Süleymenov müasir dünya ədəbi prosesinin nüfuzlu simalarından biridir. O, eyni zamanda, Azərbaycan ədəbiyyatının ən yaxşı bilicilərindən və təbliğatçılarındandır. Artıq otuz ildən çoxdur ki, Oljas Süleymenov Azərbaycanla, Azərbaycan ictimaiyyəti ilə sıx dostluq və yaradıcılıq əlaqələri saxlayır.
ötən əsrin 70-ci illərindən başlayaraq, demək olar ki, hər il O.Süleymenov Azərbaycana gəlir, paytaxtımızda və ölkəmizin digər şəhərlərində olur. Hələ 1975-ci ildə Azərbaycanda Sovet ədəbiyyatı günlərinin keçirilməsindəki fəallığına görə o, Azərbaycan SSR Ali Sovetinin Fəxri fərmanı ilə təltif edilib.
Azərbaycan mədəniyyətinin beynəlxalq miqyasda təbliğindəki xidmətlərinə görə isə, Azərbaycan Respublikasının Prezidenti İlham Əliyevin Sərəncamı ilə şair-alim Oljas Süleymenov “Şöhrət” və “Dostluq” ordenləri ilə təltif edilib. Bu mükafat xalqımızın və ölkəmizin sadiq dostunun xidmətlərinə verilən layiqli qiymətdir.
O.Süleymenovun özünün etiraf etdiyinə görə, onun qəlbində Azərbaycana, Azərbaycan ədəbiyyatına maraq və sevgi hələ uşaqlıq illərindən - Nizaminin, Nəsiminin, Füzulinin, M.F.Axundovun, Sabirin, C.Məmmədquluzadənin əsərləri ilə ilk tanışlıq zamanından baş qaldırıb. Nizamidən başlayan bu sevgi tezliklə çağdaş Azərbaycan ədəbiyyatının Səməd Vurğun və Rəsul Rza kimi görkəmli nümayəndələrinin yaradıcılığına da sirayət edir. Bakıya və bakılılara, Azərbaycana və azərbaycanlılara məhəbbəti barədə o, yalnız Bakıda yox, dünyanın hər yerində, ən müxtəlif auditoriyalarda danışır.
Oljas tez-tez Bakının qonağı olur.
Azərbaycan paytaxtının heç bir böyük sənət və elm bayramı, təntənəsi Oljassız keçmir. Azərbaycan alimləri nəsrdə çingiz Aytmatovu, poeziyada isə Oljas Süleymenovu müasir ümumtürk ədəbiyyatının dünya miqyasında təmsilçiləri kimi qiymətləndirirlər.
Hər iki sənətkar qədim türk ədəbi-tarixi ənənələri ilə zəngin olan Mərkəzi Asiya regionunu təmsil edir və hər ikisi onlara dünya şöhrəti gətirmiş əsərlərini əsasən rus dilində qələmə alır. Lakin bu amil onların öz əsərlərində türk dünyagörüşünü, estetik təfəkkürünü, qədim türk ədəbi-mədəni köklərinə bağlılığı ifadə etmələrinə mane olmur.
Qədim köçəri türklərin və onların həyat arealı olan Böyük çölun mənəvi ruhu yaradıcılığının bütün mərhələlərində O.Süleymenov poeziyasının əsas motivi olub. Bu cəhət onun türk etnosunun qədim və zəngin mədəni ənənələrinə, xüsusən də, milli eposa bağlılığında, onun ruhunu öz bədii və elmi təfəkküründə yaşatmasında xüsusilə qabarıq görünür.
O.Süleymenovun yaradıcılığına yüksək qiymət verən Azərbaycan alimi Nizami Cəfərovun qənaətinə görə, O.Süleymenovun yaradıcılığı ümumtürk poeziyasının dünya arenasına çıxa bilməsi üçün mühüm addım sayılmalıdır.
Bu cəhətdən O.Süleymenovun yaradıcılığının öyrənilməsi üzrə Azərbaycanda görülən işlər xüsusi maraq doğurur. Şairə dünya şöhrəti qazandırmış “Az i Ya” əsərinin Natiq Səfərovun tərcüməsində Azərbaycan dilində nəşr edilib.
1981-ci ildə xalqımız böyük Azərbaycan şairi Nizami Gəncəvinin 840 illiyini təntənə ilə qeyd edərkən “öz böyük sözü ilə insanların qəlbində xoş duyğular oyadan, insani hisslər təlqin edən dahinin adını və əməllərini bir daha yad etmək üçün” Azərbaycana gəlib, O.Süleymenov Bakıda olarkən şəhər ictimaiyyətinin münayəndələri ilə görüşü zamanı çıxışını “Mən Azərbaycanı özümə ikinci Vətən bilirəm” sözləri ilə tamamlayıb.

Paylaş:

Baxılıb: 927 dəfə