Asiya Siyasi Partiyalarının Beynəlxalq Konfransının VII Baş Assambleyası 2012-ci ildə Bakı şəhərində keçiriləcək

Bakı:

21 °C

60 %

2 m/s

AZ RU EN

Ana səhifə / Siyasət / Asiya Siyasi Partiyalarının Beynəlxalq Konfransının VII Baş Assambleyası 2012-ci ildə Bakı şəhərində keçiriləcək

Asiya Siyasi Partiyalarının Beynəlxalq Konfransının VII Baş Assambleyası 2012-ci ildə Bakı şəhərində keçiriləcək

19.10.2011 [18:42]

Dünən Yeni Azərbaycan Partiyasının (YAP) Sədr müavini-İcra katibi, millət vəkili Əli Əhmədov ölkəmizdə səfərdə olan Asiya Siyasi Partiyalarının Beynəlxalq Konfransının Baş katibi, təşkilatın Daimi Komitəsinin həmsədri çunq Eui-Yonqla partiyanın mənzil qərargahında görüşüb.
Partiyanın rəsmi saytının məlumatına görə, bu nüfuzlu beynəlxalq təşkilatın baş katibinin Azərbaycana ilk səfərinin əlamətdar bir günə - Azərbaycanın dövlət müstəqilliyinin bərpa edilməsinin 20-ci ildönümünə təsadüf etdiyini qeyd edən YAP Sədrinin müavini Əli Əhmədov ötən illər ərzində ölkəmizin böyük inkişaf yolu keçdiyini vurğulayıb, o, Azərbaycanın beynəlxalq müstəvidə mövqelərinin də gücləndiyini qeyd edib: “Azərbaycan müstəqillik illərində sürətlə inkişaf edib, iqtisadiyyatı güclənib, bütün sahələrdə uğurlar əldə olunub. Amma bu inkişafa mane olan problemlər də mövcuddur. Belə ki, Ermənistanın Azərbaycana qarşı təcavüzü nəticəsində torpaqlarımızın 20 faizi işğal olunmuş, bir milyon insan qaçqın və məcburi köçkün vəziyyətinə düşmüşdür. Nüfuzlu beynəlxalq təşkilatların, o cümlədən, BMT-nin qəbul etdiyi qətnamələrə baxmayaraq, Ermənistanın təcavüzü hələ də davam etməkdədir”.
YAP Sədrinin müavini məmnunluqla qeyd edib ki, Asiya Siyasi Partiyalarının Beynəlxalq Konfransı müvafiq qətnamələrində dünyanın inkişafına əngəllər törədən münaqişələrin, o cümlədən Dağlıq Qarabağ münaqişəsinin həll olunması ilə əlaqədar ədalətli mövqe nümayiş etdirib.
Qeyd olunub ki, Asiya Siyasi Partiyalarının Beynəlxalq Konfransı BMT-yə müşahidəçi üzv qismində qəbul olunmaq üçün müraciət edib və yaxın zamanlarda təşkilatın beynəlxalq statusunun daha da yüksələcəyi gözlənilir.
Asiya Siyasi Partiyalarının Beynəlxalq Konfransının Baş katibi, təşkilatın Daimi Komitəsinin həmsədri çunq Eui-Yonq Azərbaycanın dövlət müstəqilliyinin bərpa olunmasının 20 illiyi münasibətilə öz təbriklərini çatdırıb, Azərbaycanın bir dövlət kimi artıq beynəlxalq miqyasda böyük nüfuz sahibi olduğunu vurğulayıb. O, Azərbaycanla Koreya Respublikası arasında əlaqələrin də inkişaf etdiyini qeyd edib.
çunq Eui-Yonq bildirib ki, Yeni Azərbaycan Partiyası nüfuzlu siyasi təşkilat olaraq Asiya Siyasi Partiyalarının Beynəlxalq Konfransının 20 nəfərdən ibarət Daimi Komitəsinin üzvüdür. Baş katib qeyd edib ki, Asiya Siyasi Partiyalarının Beynəlxalq Konfransının Daimi Komitəsi Azərbaycanın beynəlxalq aləmdəki böyük nüfuzunu, ölkədəki sürətli inkişafı və Yeni Azərbaycan Partiyasının bu uğurlardakı rolunu yüksək qiymətləndirərək təşkilatın VII Baş Assambleyasının 2012 -ci ildə Bakıda keçirilməsi haqqında qərar qəbul edib.
Görüşdə daha sonra Asiya Siyasi Partiyalarının Beynəlxalq Konfransının VII Baş Assambleyasının təşkili ilə bağlı məsələlər müzakirə edilib.

Paylaş:

Baxılıb: 1173 dəfə