Ermənistana 3 xəbərdarlıq

Bakı:

13 °C

82 %

2 m/s

Əlaqə

AZ RU EN

Ana səhifə / Siyasət / Ermənistana 3 xəbərdarlıq

Ermənistana 3 xəbərdarlıq

27.10.2023 [10:55]

BMT narahatdır

BMT-nin İqtisadi, Sosial və Mədəni Hüquqlar Komitəsi Ermənistanda diskriminasiya əleyhinə hərtərəfli qanunvericiliyinin olmamasından narahatlığını ifadə edib. Bu barədə komitənin Ermənistanla bağlı dördüncü dövri hesabatı üzrə yekun müşahidələrində qeyd edilib. Sənəddə göstərilib ki, komitə diskriminasiya əleyhinə qanunun qəbulunun ləngidilməsindən, ayrı-seçkiliyin bütün formalarını əhatə edən qanunvericiliyin və siyasi çərçivənin olmamasından narahatdır. Sənəddə həmçinin, məhdud imkanlı və marjinallaşdırılmış fərd və qrupların iqtisadi, sosial və mədəni hüquqlara çıxışda davamlı olaraq ayrı-seçkiliklə üzləşdiyi qeyd olunub. BMT komitəsi Ermənistana diskriminasiya əleyhinə qanunvericiliyinin tətbiqini gücləndirmək çağırışı edib.

Azərbaycan xarici işlər nazirinin müavini Elnur Məmmədov BMT komitəsinin sənədinə münasibət bildirib. “Ermənistan tərəfindən etnik azərbaycanlılara qarşı uzunmüddətli nifrət və diskriminasiya məsələsi (həm Ermənistanda, həm də keçmiş işğal altındakı Azərbaycan ərazilərində) Azərbaycan tərəfindən 2023-cü ilin yanvarında Beynəlxalq Ədalət Məhkəməsində qaldırılmış dövlətlərarası iddiaların özəyini təşkil edir”, - deyə nazir müavini qeyd edib.

Bundan əlavə, BMT-nin İqtisadi, Sosial və Mədəni Hüquqlar Komitəsi Ermənistanda dövlət tərəfindən həyata keçirilən hazırkı dil siyasətinin ölkədəki etnik azlıqlar üzərində diskriminasiya təsiri ola biləcəyindən də narahatlığını ifadə edib. Hesabatda Ermənistana etnik azlıqların dillərinin tədrisinin təşviq edilməsi üçün təhsil sahəsindəki dil siyasətini və qanunlarını bir daha gözdən keçirmək tövsiyə edilib. Həmçinin, Ermənistana molokan və yezidi uşaqlarının ibtidai və orta məktəblərdən çıxma nisbətinin yüksək olduğu, bu göstəricinin azaldılması məqsədilə təcili tədbirlər görmək çağırışı edilib.

BMT-nin İqtisadi, Sosial və Mədəni Hüquqlar Komitəsinin sözügedən sənədində Ermənistanda mədən sənayesinin içməli su hövzələri üzərindəki təsirlərindən də narahatlığı vurğulanıb. Sənəddə Ermənistanın mədən sənayesinin İstisu gölü (Dərələyəz mahalı) və Göyçə gölünü çirkləndirməsindən xüsusi narahatlıq ifadə edilib. Qeyd olunub ki, mədən sənayesi fəaliyyətləri mənfi təsirlərə məruz qalmış icmaların içməli suya təhlükəsiz çıxışına təsir edib, onların su, qida və sağlamlıq hüququnun pozulması ilə nəticələnib, həmçinin təbiətə ziyan vurub. Komitə Ermənistana su resurslarının lazımi şəkildə qorunmasını təmin etmək məqsədilə səylərini intensivləşdirmək, mədən sənayesinin əhalinin təhlükəsiz içməli suya çıxışını təhlükəyə atmamasını təmin etmək üçün bütün zəruri tədbirləri görməyə çağırıb.

Qeyd edək, BMT-nin sözügedən komitəsinin Ermənistanla bağlı açıqladığı hesabatda əks olunan məqamlar reallıqların bir hissəsidir. Ermənistanda azərbaycanlıların tarixi-mədəni və dini abidələri demək olar ki, tamamilə dağıdılıb. Rəsmi İrəvanın məqsədi indiki Ermənistan ərazisində azərbaycanlıların zəngin irsini tamamilə məhv etməkdir. Bununla da, ermənilər bu ərazilərin tarixən azərbaycanlılara məxsus olması barədə bütün izləri silməyə çalışırlar. BMT və digər beynəlxalq qurumlar bütün bunların qarşısını almaq üçün müvafiq addımlar atmalıdır.

NARDAR

Paylaş:

Baxılıb: 530 dəfə