“1,5 milyon şəhid ölkəsi”nin yanındayıq...

Bakı:

11 °C

87 %

7 m/s

Əlaqə

AZ RU EN

Ana səhifə / Siyasət / “1,5 milyon şəhid ölkəsi”nin yanındayıq...

“1,5 milyon şəhid ölkəsi”nin yanındayıq...

02.11.2023 [10:25]

Azərbaycan ilə Əlcəzair arasında əlaqələr genişlənir

İkitərəfli və bərabərhüquqlu münasibətlərin inkişafına hər zaman yüksək dəyər verən Azərbaycan dünyanın müxtəlif regionları ilə yaxın əməkdaşlıq əlaqələrinə malikdir. Bu mənada, Afrika ölkələri və Ərəb dünyası ilə əlaqələrimiz də hər zaman ən yüksək səviyyədə təmin edilib. Hətta Prezident İlham Əliyevin ötən ilin noyabrında Əlcəzairdə baş tutan Ərəb Dövlətləri Liqasının 31-ci sammitinə Fəxri Qonaq qismində dəvət alması bu əlaqələrin hansı yüksək statusa malik olduğunun göstəricisidir. Qeyd edək ki, səfər çərçivəsində Prezident İlham Əliyev Əlcəzair şəhərində Şəhidlər abidəsini və Milli Mücahidlər Muzeyini ziyarət etmişdi. Əlcəzairin azadlığı uğrunda mübarizədə həyatını qurban vermiş döyüşçülərin xatirəsinə ucaldılmış Şəhidlər abidəsi ölkənin müstəqilliyinin 20-ci ildönümü münasibətilə 1982-ci ildə açılıb. Abidənin hündürlüyü 92 metrdir. Milli Mücahidlər Muzeyi ilə tanışlıq zamanı dövlətimizin başçısına məlumat verildi ki, Şəhidlər abidəsinin altında yerləşən və 1984-cü ildə açılmış muzeyin kolleksiyasının böyük hissəsi ölkənin Fransa tərəfindən işğalına və 1830-1962-ci illərdə Fransa müstəmləkəçiliyinə qarşı aparılmış xalq müqavimətinə həsr olunub. Burada rəsm əsərləri ilə yanaşı, müstəmləkəçiliyə qarşı mübarizə aparmış əlcəzairli mücahidlərə aid silahlar, arxiv materialları və döyüş əşyaları, fotoşəkillər və sənədlər, həmçinin müqavimət dövründə fransızların xalq hərəkatı iştirakçılarını cəzalandırmaq üçün istifadə etdikləri edam alətləri nümayiş olunur. Fransa müstəmləkəçiliyinə qarşı hərəkata rəhbərlik etmiş Əmir Əbdülqadirin (Əbdülqadir İbn Muhyiddin) şəxsi əşyaları və silahları, onun 1853-cü ildə fransız rəssam Anj Tisye tərəfindən çəkilmiş və yalnız 1976-cı ildə Fransa tərəfindən ölkəyə qaytarılmış portreti muzeyin ən çox ziyarət olunan kolleksiyaları sırasındadır.

Ticarət dövriyyəsi ildən-ilə artır

Vurğulayaq ki, Əlcəzair Xalq Demokratik Respublikası 1991-ci ilin 26 dekabr tarixində Azərbaycan Respublikasının müstəqilliyini tanıyıb. Azərbaycanla Əlcəzair arasında diplomatik əlaqələr 1994-cü ilin 22 aprel tarixində yaradılıb. Azərbaycan Respublikasının Əlcəzair Xalq Demokratik Respublikasında (Əlcəzair şəhərində) Səfirliyinin fəaliyyətinin təmin edilməsinə dair Prezident İlham Əliyev tərəifnhdən 28 noyabr 2014- cü ildə müvafiq Sərəncam imzalanıb - 2015-ci ilin yanvar ayında Əlcəzair Azərbaycanda diplomatik ofis açıb.

Azərbaycan ilə Əlcəzair arasında ticarət dövriyyəsi ildən-ilə artmaqdadır. Bu rəqəm 2021-ci ildə 1 373,17 min ABŞ dolları idisə, 2022-ci ildə artaraq 1 477,66 ABŞ dolları təşkil edib.

İnqilab Günü təbriki...

Qeyd edildiyi kimi, Azərbaycan ilə Əlcəzair arasında mühüm dostluq və əməkdaşlıq əlaqələri yüksək səviyyədə inkişaf etməkdədir. Dünən Prezident İlham Əliyevin Əlcəzair Xalq Demokratik Respublikasının Prezidenti Abdelmacid Tebbuna 1 Noyabr - İnqilab Günü münasibətilə ünvanladığı təbrik məktubu da bu faktı təsdiqləyir. Prezident İlham Əliyev məktubunda 1 Noyabr - İnqilab Günü münasibətilə Əlcəzair Prezidentini və qardaş Əlcəzair xalqına Öz adından və Azərbaycan xalqı adından ən səmimi təbriklərini yetirib. Qeyd olunub ki, amansız müstəmləkəçilik siyasətinə qarşı Əlcəzair xalqının azadlıq mübarizəsinə başladığı bu əlamətdar gün

Əlcəzairin qəhrəmanlıqlarla zəngin olan tarixinin ən şərəfli səhifələrindən biridir: “Yüz ildən artıq dövr ərzində əsarətə və kütləvi zorakılığa məruz qalan, misli görünməmiş qəddarlıq, insanlıq əleyhinə cinayətlərlə üzləşən Əlcəzair xalqı müstəqilliyini bir milyon yarım şəhidin canı bahasına əldə etmiş və bununla da iradəsinin sarsılmazlığını, yenilməzliyini, mətinliyini və azadlıq əzmini bütün dünyaya nümayiş etdirmişdir”.

Məktubda o da vurğulanıb ki, otuzillik işğaldan əziyyət çəkmiş Azərbaycan xalqı Əlcəzair xalqının hisslərini yaxşı başa düşür. “Şadam ki, bu gün ənənəvi dostluq və qardaşlıq telləri ilə bir-birinə bağlı olan ölkələrimiz arasında əlaqələr dinamik inkişaf edir. Eyni zamanda çoxtərəfli müstəvidə qarşılıqlı faydalı birgə fəaliyyətimiz məmnunluq doğurur. Əminəm ki, qarşılıqlı etimad və dəstəyə əsaslanan dövlətlərarası münasibətlərimiz, səmərəli əməkdaşlığımız xalqlarımızın mənafelərinə uyğun olaraq bundan sonra da birgə səylərimizlə uğurla inkişaf edəcək və genişlənəcəkdir. Belə bir xoş gündə Sizə möhkəm cansağlığı, xoşbəxtlik, işlərinizdə müvəffəqiyyətlər, qardaş Əlcəzair xalqına daim əmin-amanlıq və rifah diləyirəm”, - deyə məktubda bildirilib.

Fransanın törətdiyi soyqırımı...

Qeyd edildiyi kimi, Əlcəzairin azadlıq mübarizəsi də olduqca böyük imtahanlardan və qurbanların verilməsindən keçib. Bu mənada, Fransanın Əlcəzairdə törətdiyi soyqırımı, azadlıq mübarizəsini boğmaq cəhdi tarixi və bəşəri cinayətdir. Fransızlar 1830-1962-ci illəri əhatə edən işğal dövründə 1,5 milyondan artıq insanı amansızcasına qətlə yetiriblər. Buna görə də Əlcəzair “1,5 milyon şəhid ölkəsi” adlandırılır. Ümumilikdə 10 milyona yaxın əlcəzairli Fransanın müstəmləkəçilik dövrünün qurbanı olub. Fransanın törətdiyi daha bir faciə isə 1961-ci ilin oktyabrında baş verib. O zaman on minlərlə əlcəzairli Fransa işğalını pisləmək üçün Parisdə nümayişə çıxır. Fransa polisinin açdığı atəş və etirazçıları Sena çayına atması nəticəsində 1500-ə qədər əlcəzairli qətlə yetirilib, mindən çox şəxs həbs olunub. Bu hadisə tarixə “Sena qətliamı” kimi daxil olub. Fransa hakimiyyəti bu faciə ilə bağlı da susqunluq nümayiş etdirib. Fransanın törətdiyi qətliamlara görə məsuliyyəti boynuna almamaq ənənəsi görünür ki, davam etməkdədir.

P.İSMAYILOV

Paylaş:

Baxılıb: 584 dəfə