“Bizim elə yaşımızdır ki, gərək, axırda deyəcəyimiz sözü əvvəldə dilimizə gətirməyək”

Bakı:

10 °C

87 %

6 m/s

Əlaqə

AZ RU EN

Ana səhifə / Sosial / “Bizim elə yaşımızdır ki, gərək, axırda deyəcəyimiz sözü əvvəldə dilimizə gətirməyək”

“Bizim elə yaşımızdır ki, gərək, axırda deyəcəyimiz sözü əvvəldə dilimizə gətirməyək”

23.05.2014 [09:11]

Əflatun Amaşov: “Ayna-Zerkalo” qəzetinin qərarı, xüsusən də bu qərarın ictimailəşməsi məni xeyli məyus etdi
“Mətbuat Şurası yaranışından geniş spektrli qurum kimi qarşılandı və gözləntilərə uyğun iş apardı. Bunun üçün bir növ, sosial sifariş yarandı. Qurum öz missiyası ilə yanaşı, jurnalistikanın ümumi inkişafı ilə əlaqədar məsələlərin həllinə girişdi. Deyək ki, kütləvi informasiya vasitələrinin inkişafı ilə bağlı dövlət dəstəyi konsepsiyasının hazırlanmasında, eləcə də sənədə uyğun olaraq Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun formalaşdırılmasında yaxından iştirak etdi. Ümumən müxtəlif təşəbbüslər irəli sürdü. Treninqlər, seminarlar düzənləməklə jurnalist peşəkarlığının artırılmasına töhfə verdi. Hazırda ölkədə media miqyasında baş verən elə bir hadisə yoxdur ki, Şura ona reaksiya verməsin”. Bunu APA-ya müsahibəsində Azərbaycan Mətbuat Şurasının (MŞ) sədri Əflatun Amaşov deyib.
Müsahibəsində MŞ-nin fəaliyyəti ilə bağlı bir sıra məqamlara toxunan Ə.Amaşov eyni zamanda, “Ayna-Zerkalo” qəzetinin baş redaktoru Elçin Şıxlının narazılığına da münasibət bildirib: “...Elçin bəyin Mətbuat Şurasına ərizəsi ölkədə olmadığım vaxta təsadüf edib. Onun dindirilməsi ilə bağlı xəbəri də kənarda eşitmişəm. Şəxsən özünə telefon açmışam, vəziyyətlə maraqlanmışam. O ki qaldı qəzetin reklam sıxıntısına, reklam bazarının zəifliyi ümumən Azərbaycan mətbuatının bəlasıdır. Məsələ Mətbuat Şurasını ciddi şəkildə narahat edir. Bununla bağlı ölkə rəhbərliyinə müvafiq təkliflərimizi ünvanlamışıq. Amma “Ayna-Zerkalo” qəzetinin reklamları həmişə digər kütləvi informasiya vasitələrinə nisbətən daha çox olub. Satış göstəricilərinin yüksəkliyi də öz yerində. Məncə, qəzet gündəlik nəşr kimi KİVDF-dən ayrılan vəsaitin və satışdan gələn gəlirin hesabına fəaliyyətini davam etdirə bilərdi. Əlbəttə, bu məsələdə qərar verən Elçin Şıxlıdır. Hər bir halda problemin tezliklə yoluna qoyulacağına inanırıq”.
Elçin Şıxlının “Ayna-Zerkalo” qəzetinin etiraz əlaməti olaraq Mətbuat Şurasının sıralarını tərk etdiyini bildirməsinə gəlincə, Əflatun Amaşov “Qəzetin Mətbuat Şurasını tərk etməsinə dair qərarı, xüsusən də bu qərarın ictimailəşməsi məni xeyli məyus etdi. Düşünürəm ki, danışıb bir çox şeyləri yoluna qoymaq olardı” deyib.
“Turan” İnformasiya Agentliyinin baş direktoru Mehman Əliyevin də mediaya açıqlamasında narazılıq ifadə etməsinə dair sualı isə Ə.Amaşov bu cür cavablandırıb: “Mətbuat Şurası ölkə jurnalistikasının modelidir. Media ailəsinin mərkəzindədir. Ailədə isə hər cür şəxsə rast gəlmək mümkündür. Mehman bəyin narazılığının motivi aydındır. Bir dost, fərd, jurnalist kimi həmişə onun yanındayam. Mən nə edim ki, Mehman Əliyev siyasətçi də olmaq istəyir? Hətta iddiası da kifayət qədər yüksəkdir. Hələ lap öncədən seçim edilməliydi - ya jurnalistika, ya siyasət. Seçim etməyin vaxtı isə keçmiş kimi görünür”.
Mətbuat Şurasının sədri sonda bəzi tövsiyələrini də dilə gəirib: “Bir məqamı vurğulamağı vacib sayıram. Bizim elə yaşımızdır ki, gərək, axırda deyəcəyimiz sözü əvvəldə dilimizə gətirməyək. Hamıya bunu tövsiyə edirəm. Qalan məsələlər düzələndir”.

Paylaş:

Baxılıb: 1017 dəfə