“Qədim musiqi alətlərinin tədqiqatçısı”

Bakı:

29 °C

52 %

7 m/s

Əlaqə

AZ RU EN

Ana səhifə / Sosial / “Qədim musiqi alətlərinin tədqiqatçısı”

“Qədim musiqi alətlərinin tədqiqatçısı”

22.10.2015 [10:24]

Yeni işıq üzü görən bu kitabda Xalq artisti Məcnun Kərimovun həyatı və elmi-pedaqoji fəaliyyətindən söhbət açılıb
Bu günlərdə “Apostroff” MMC tərəfindən filologiya üzrə fəlsəfə doktoru Həsən bəy Zərdabi mükafatı laureatı Şövkət Hüseynovanın “Qədim musiqi alətlərinin tədqiqatçısı” kitabı oxucuların ixtiyarına verilib. Kitabın elmi redaktoru Ü.Hacıbəyli adına Bakı Musiqi Akademiyasının (BMA) rektoru, professor, SSRİ və Azərbaycan Respublikasının Xalq artisti Fərhad Bədəlbəyli, ön söz və rəyçi, Milli Aviasiya Akademiyasının prorektoru, Əməkdar mədəniyyət işçisi Şəmsəddin Axundov, ixtisas redaktoru, fəlsəfə elmləri doktoru, professor, Əməkdar incəsənət xadimi Gülnaz Abdullazadədir.
Oxuculara təqdim edilən bu sanballı əsər respublikanın Xalq artisti, sənətşünaslıq üzrə elmlər doktoru, professor Məcnun Kərimovun işıqlı xatirəsinə, eyni vaxtda sənətkarın 70 illik yubileyinə təsadüf edir. Oxuculara təqdim olunan kitabda istedadlı alimin həyat mərhələləri, elmi-pedaqoji fəaliyyəti ön plana çəkilib. “Qədim musiqi alətlərinin tədqiqatçısı” kitabına unudulmaz Məcnun Kərimovu yaxından tanıyan, vaxtilə onunla birgə çalışan musiqi xadimlərinin, bəstəçilərin, tədqiqatçıların fikirləri toplanıb. Bu baxımdan Ü.Hacıbəyli adına BMA-nın rektoru Fərhad Bədəlbəylinin, Bəstəkarlar İttifaqının sədri Firəngiz Əlizadənin, xalq artistləri Ramiz Quliyevin, Ramiz Zöhrabovun, Arif Babayevin xatirələri böyük maraq doğurur. Bu cəhətdən Azərbaycan Milli QHT forumunun prezidenti, Dünya azərbaycanlıları əlaqələndirmə şurasının üzvü Rauf Zeyninin məqaləsi çox maraqlıdır.
“Kiçik maraq böyük xəzinənin üstünü açdı” - deyirdi Məcnun Kərimov. Bəli, o xəzinə ki, dünyanın heç bir yerində yoxdur, o xəzinə ki, bizim milli-mənəvi varlığımızın təcəssümüdür, o xəzinə ki, hər dəfə səsləndikdə Qarabağın, Şuşanın, Kəlbəcərin həzin səsini hiss etdirir bizə. Bu xəzinəni o, Azərbaycan xalqı üçün açdı dünyaya sübut etmək üçün, nəyi? Musiqimizi, tariximizi, irsimizi, “Sarı gəlin”i, “Qarabağ şikəstəsi”ni. Bəli, Məcnun Kərimov bizə kim olduğumuzu sübut etmək üçün milli xəzinənin qapılarını açdı, o qapı ki, onu hər açanda milli mədəniyyətimiz və incəsənətimiz haqqında düşünək.
Kitabda öz əksini tapan Şərq orta əsr musiqi mədəniyyətində vaxtilə geniş yayılmış çəng, Şirvan tənburu, rud, bərbət, çəqanə, çoğur, rübab, səntur, qopuz və s. kimi musiqi alətlərinin M.Kərimov tərəfindən bərpa olunub gündəlik həyatımıza qaytarılması, qədimdən gələn səslərə necə nəfəs verməsi və s. barədə məqalələr geniş oxucu kütləsi üçün nəzərdə tutulub. Bu yazımızı məşhur telejurnalist Telli Pənahqızının Məcnun müəllimə həsr etdiyi məqalədən bir hissə ilə bitirmək istəyirik: “Axı mən neyləmişəm, sadəcə unudulan, yaddan çıxarılıb tarixin tozlu rəflərinə sıxışdırılan el sərvətinin nümunələrinin bir qisminin layiqli qiymətini alması üçün onların tozunu silib gün işığına çıxarmışam”.
Amma biz, onun çox böyük sənət fədaisi olduğunu, millətini təmənnasız bir məhəbbətlə sevməsini, nəyin bahasına olursa-olsun, qədim mədəniyyətimizin incilərini böyük səbir və məhəbbətlə bərpa edib həyata qaytaran insanı yaxından taniyanlar, bilirdik ki, professor Məcnun Kərimovun gördüyü və görməyi planlaşdırdığı işlərin dəyəri sözlə ifadə edilməyəcək qədər böyükdür...

Paylaş:

Baxılıb: 763 dəfə