Türk dünyasının alimləri UNEC-də

Bakı:

26 °C

64 %

8 m/s

Əlaqə

AZ RU EN

Ana səhifə / Sosial / Türk dünyasının alimləri UNEC-də

Türk dünyasının alimləri UNEC-də

29.10.2015 [09:42]

Oktyabrın 28-də Azərbaycan Dövlət İqtisad Universitetində (UNEC) XIII Beynəlxalq Türk Dünyası İctimai Elmlər Konqresi öz işinə başlayıb.
Tədbirdə çıxış edən UNEC-in rektoru, professor Ədalət Muradov bildirib ki, son dövrlərdə respublikamızın liberal bazar iqtisadiyyatının inkişafı fonunda çox ciddi tədbirlər həyata keçirilir. Ölkəmiz Prezident İlham Əliyevin neftsiz iqtisadiyyat qurmaq strategiyasının ən ciddi mərhələsinə qədəm qoyub.
Rektor deyib ki, Azərbaycanın gələcəyini təmin edə biləcək uğurlu siyasətin ən vacib elementi təhsildir. Təsadüfi deyil ki, ölkə başçısı İlham Əliyevin ikinci dəfə Prezident seçiləndən sonra imzaladığı ilk sənəd Azərbaycan Respublikasında ali təhsilin inkişafına dair dövlət strategiyası olub. Bu da o deməkdir ki, ölkə başçısı “qara qızıl”ın insan kapitalına çevrilməsini öz siyasətinin ən vacib hissəsi sayır və bununla bağlı təhsil ictimaiyyəti qarşısında çox ciddi tələblər irəli sürüb. UNEC bu tələblərin icra edilməsi baxımından öz üzərinə düşən bütün öhdəlikləri yerinə yetirmək üçün əlindən gələni etməyə hazırdır.
Rektor qloballaşan dünyamızda baş verən proseslər kontekstində türk dünyası alimlərinin bir araya gələrək elmi problemlər üzərində fikir mübadiləsi etməsinin mühüm əhəmiyyəti olduğunu vurğulayıb. Belə tədbirlərin bundan sonra da davam etdiriləcəyini bildirib.
Sonra Təhsil Nazirliyinin Aparat rəhbərinin müavini Yaqub Piriyev təhsil naziri Mikayıl Cabbarovun konqres iştirakçılarına ünvanladığı müraciətini səsləndirib.
Türkiyənin Azərbaycandakı fövqəladə və səlahiyyətli səfiri İsmail Alper Coşkun çıxışında Azərbaycan-Türkiyə münasibətlərinə diqqət çəkərək bildirib ki, Azərbaycanın on minə yaxın tələbəsi Türkiyədə ali təhsil alır. Azərbaycanda isə minlərlə Türkiyə vətəndaşı təhsil alır. Türkiyənin 2600-ə qədər şirkəti Azərbaycanda, minə yaxın Azərbaycan şirkəti isə Türkiyədə fəaliyyət göstərir. Bir sözlə, hələ müstəqilliyinin 30-cu ilini qeyd etməyən Azərbaycan yaxın zamanlarda Türkiyəyə ən çox investisiya yatıran ölkə olmağa namizəddir.
Türk Dünyası Araşdırmalar Vəqfinin prezidenti Közhan Yazgan çıxışında Türkiyə-Azərbaycan iqtisadi münasibətlərinin yüksək səviyyədə olduğunu bildirib. Təhsil üzrə ekspert, professor, Əməkdar elm xadimi Şahlar Əsgərov “İnkişafın zəruri və kafi şərti: İnkişaf etməkdə olan ölkələr” mövzusunda məruzə ilə çıxış edib.
XIII Beynəlxalq Türk Dünyası İctimai Elmlər Konqresində dünyanın 12 ölkəsindən 250-ə yaxın elm adamı, həmçinin 10-a yaxın xarici universitet rektoru iştirak edir. İctimai elmlər sahəsində özünəməxsus yeri olan ənənəvi tədbirdə 236 elmi işin məruzəsi və müzakirəsi baş tutacaq.
XIII Türk Dünyası İctimai Elmlər Konqresi oktyabrın 30-da başa çatacaq.

Paylaş:

Baxılıb: 684 dəfə