“Azərsu” ASC Dünya Su Şurasının İdarə Heyətinə üzv seçilib

Bakı:

16 °C

67 %

10 m/s

Əlaqə

AZ RU EN

Ana səhifə / Sosial / “Azərsu” ASC Dünya Su Şurasının İdarə Heyətinə üzv seçilib

“Azərsu” ASC Dünya Su Şurasının İdarə Heyətinə üzv seçilib

27.11.2015 [09:52]

“Azərsu” Açıq Səhmdar Cəmiyyəti (ASC) Dünya Su Şurasının (DSŞ) İdarə Heyətinə üzv seçilib. Bu haqda “Azərsu” ASC-nin “Sukanal” Elmi-Tədqiqat və Layihə İnstitutunun elmi işlər üzrə direktor müavini Adışirin Ələkbərov mətbuat konfransında deyib.
Onun sözlərinə görə, 2015-ci il noyabrın 12-14-də Fransanın Marsel şəhərində Dünya Su Şurasının 7-ci Baş Assambleyası keçirilib: “Baş Assambleyada dünyada su siyasətinin əsas istiqamətləri, mövcud vəziyyət və perspektivlər, növbəti 3 il üzrə fəaliyyət strategiyası, iş planı, maliyyə məsələləri, Dünya Su Şurasının Konstitusiyasına dəyişikliklər barədə müzakirələr aparılıb. Şuranın İdarə Heyətinə seçkilər keçirilib. Qeyd edim ki, Dünya Su Şurasının ali orqanı hər 3 ildən bir keçirilən Baş Assambleyadır. Assambleyalararası dövrdə Şuraya 35 nəfərdən ibarət İdarə Heyəti rəhbərlik edir”.
Seçkilərdə ABŞ, Fransa, Braziliya, Türkiyə, Yaponiya, Koreya, Macarıstan və digər ölkələri təmsil edən dövlət və hökumət təşkilatlarının nümayəndələrinin də iştirak etdiyini bildirən Adışirin Ələkbərov “Azərsu” ASC-nin sədri Qorxmaz Hüseynovun böyük səs çoxluğu ilə Dünya Su Şurası İdarə Heyətinə üzv seçildiyini qeyd edib.
Onun sözlərinə görə, “Azərsu” ASC Dünya Su Şurasının İdarə Heyətinə üzv olmaqla bir sıra problemlərin həllinin təmin edilməsinə səy göstərəcək: “Tək ölkəmizdə deyil, dünyanın da su siyasətinin istiqamətləndirilməsində Azərbaycanın rolu olacaq. Sudan istifadənin su ehtiyatlarını üstələməsinə yol verilməməsi, istifadə edilmiş suyun dərin təmizləmə texnologiyaları ilə yararlı vəziyyətə gətirilməsi və təkrar istifadəsi, su ehtiyatlarının formalaşdığı çay hövzələrinin deqradasiyasının qarşısının alınması, su ehtiyatlarının daha dəqiq qiymətləndirilməsi, daha mükəmməl sugötürücü qurğuların tətbiqi, “yuxarı axın” ölkələri və “aşağı axın” ölkələrinin qarşılıqlı maraqlarının təmin edilməsi və digər aktual problemlərin həll edilməsi yönündə təkliflərimizi hazırlayacağıq”.
Adışirin Ələkbərov deyib ki, Assambleya çərçivəsində İdarə Heyətinə yeni seçilmiş üzvlər ilə görüşdə “Azərsu” ASC-nin fəaliyyəti barədə də məlumat verilib.
Xatırladaq ki, Dünya Su Şurası qlobal miqyasda su problemlərinin həlli məqsədi ilə 1996-cı ildə yaradılıb. Şura su ilə əlaqəli beynəlxalq təşkilatları, dövlət qurumları, elm mərkəzlərini, qeyri-hökumət təşkilatlarını birləşdirən çoxistiqamətli beynəlxalq platformadır. Dünya Su Şurası su ehtiyatlarının mühafizəsi, ədalətli və inteqrasiyalı idarə edilməsi, əhalinin fasiləsiz, dayanıqlı və keyfiyyətli içməli su ilə təmin olunması, su ilə əlaqədar ərzaq təhlükəsizliyi, hidroenerji resursların dayanıqlılığının təmin edilməsi, çoxşaxəli sanitariya problemlərinin həll olunması istiqamətində fəaliyyət göstərir. Mənzil qərargahı Fransanın Marsel şəhərində yerləşən qurumda 51 ölkədən və 24 beynəlxalq təşkilatdan 350 üzv təmsil olunur. 2013-cü ildən DSŞ-yə üzv olan “Azərsu”ASC ilə yanaşı, Meliorasiya və Su Təsərrüfatı ASC, su sektoru ilə əlaqədar bir sıra digər Azərbaycan təşkilatları da Şurada təmsil olunur.

Paylaş:

Baxılıb: 753 dəfə