AMEA ilə DAAD arasında əməkdaşlığın perspektivləri müzakirə olunub

Bakı:

21 °C

46 %

5 m/s

Əlaqə

AZ RU EN

Ana səhifə / Sosial / AMEA ilə DAAD arasında əməkdaşlığın perspektivləri müzakirə olunub

AMEA ilə DAAD arasında əməkdaşlığın perspektivləri müzakirə olunub

21.07.2016 [09:48]

Azərbaycan Milli Elmlər Akademiyası (AMEA) rəyasət heyətində Alman Akademik Mübadilə Xidməti (DAAD) Bakı Məlumat Mərkəzinin ofis meneceri Ştefani Düfo ilə görüş olub.
AMEA-dan AZƏRTAC-a bildiriblər ki, görüşdə bu qurumun prezidenti, akademik Akif Əlizadə DAAD vasitəsilə onlarla azərbaycanlı gəncin Almaniyada doktorantura və magistratura təhsili aldığını vurğulayıb.
Akademik A.Əlizadə qeyd edib ki, gənc alimlərin DAAD-ın təkilf etdiyi tədris proqramlarından xəbərdar olmaları üçün AMEA-nın rəsmi internet portalında bu barədə elanlar yerləşdirilməlidir. Alim qonağı AMEA-nın elmi müəssisələri ilə tanışlığa və orada fəaliyyət göstərən alimləri DAAD barədə ətraflı məlumatlandırmağa dəvət edib.
Ş.Düfo bildirib ki, Almaniyanın dövlət qurumu olan DAAD dünyada tələbə və alimlərin beynəlxalq mübadiləsini dəstəkləyən ən böyük təşkilatdır. 1925-ci ildən fəaliyyətə başlayan DAAD Almaniya və digər ölkələrdən 1,5 milyondan çox alim və tələbəyə maliyyə dəstəyi göstərib. Qurumun əsas vəzifəsi tələbələrin və elm adamlarının mübadiləsi vasitəsilə xarici ölkələrlə akademik münasibətləri dəstəkləməkdir. DAAD tələbə və məzunlar, eləcə də gənc alim və doktorantlar üçün müxtəlif tədqiqat təqaüdləri, dil kursları təklif edir.
Qonaq AMEA ilə DAAD arasında həyata keçirilən birgə layihələrdən də söz açıb. Vurğulanıb ki, DAAD Azərbaycanda elmin inkişafını həyata keçirən bir qurum kimi akademiya ilə sıx əməkdaşlıq edir. O, AMEA-nın müxtəlif institut və təşkilatları ilə əlaqələrin Azərbaycan elminə mühüm töhfələr verəcəyinə əminliyini bildirib.
Ş.Düfo DAAD-ın təklif etdiyi proqramlarda hər bir elm sahəsi üzrə orta hesabla 12-15 magistrin iştirak edə biləcəyini söyləyib. Bildirilib ki, bu yolla təhsil alan tələbələr həm Azərbaycana, həm də Almaniyaya məxsus müvafiq ali məktəbin diplomlarına yiyələnə biləcəklər. O, həmçinin mübadilə proqramlarının təkcə gənclər üçün deyil, alimlər üçün də geniş imkanlar yaratdığını vurğulayıb.
AMEA rəyasət heyəti aparatının beynəlxalq əlaqələr idarəsinin rəisi, biologiya üzrə fəlsəfə doktoru Esmira Əlirzayeva DAAD-ın nümayəndəsi ilə birgə magistratura təhsilinə dair bir neçə tədris proqramının müzakirə edildiyini bildirib. Qeyd edilib ki, Almaniyada fəaliyyət göstərən alim və mütəxəssisləri Azərbaycana dəvət etmək üçün DAAD-ın dəstəyinə ehtiyac var.
AMEA-nın akademik-katibi, akademik Rasim Əliquliyev DAAD-ın Azərbaycan alimləri üçün təklif etdiyi imkanları yüksək dəyərləndirib. Alim iki qurum arasında prioritet elmi istiqamətlərdə seminar və treninqlərin təşkilinin məqsədəuyğun olduğunu deyib.

Paylaş:

Baxılıb: 1603 dəfə