Tanınmış yazıçı Səyyad Aranın 65 illiyi qeyd olunub

Bakı:

22 °C

53 %

2 m/s

Əlaqə

AZ RU EN

Ana səhifə / Sosial / Tanınmış yazıçı Səyyad Aranın 65 illiyi qeyd olunub

Tanınmış yazıçı Səyyad Aranın 65 illiyi qeyd olunub

20.04.2017 [09:13]

Aprelin 19-da Azərbaycan Yazıçılar Birliyinin “Natəvan” klubunda tanınmış yazıçı, Dini Qurumlarla İş üzrə Dövlət Komitəsi sədrinin birinci müavini Səyyad Aranın anadan olmasının 65 illiyinə həsr olunmuş tədbir keçirilib.
AZƏRTAC xəbər verir ki, tədbirdə Azərbaycan Yazıçılar Birliyinin katibi Rəşad Məcid yubilyarın həyat və yaradıcılığından danışıb. Onun ilk əmək fəaliyyətinə ədəbiyyat müəllimi kimi başladığını deyən natiq S.Aranı hər zaman yaradıcılıq axtarışında olan qələm adamı kimi xarakterizə edib. Vurğulanıb ki, o, ədəbi arenada sözünü deyən yazıçı olmaqla yanaşı, həm də ictimai-siyasi xadim kimi tanınır.
Yubilyarı təbrik edən R.Məcid ona gələcək fəaliyyətində uğurlar arzulayıb.
Azərbaycan Yazıçılar Birliyinin sədri, Xalq yazıçısı Anar çıxış edərək deyib: “Səyyad Aran çox gözəl yazıçıdır. Mən onunla yol yoldaşı olmuşam. O, eyni zamanda mənim üçün işıqlı bir insandır. Səyyad Aran müəllim kimi fəaliyyətə başlamasına baxmayaraq, eyni zamanda jurnalist kimi, siyasi xadim kimi, o cümlədən Yeni Azərbaycan Partiyasının qurucularından biri kimi də özünü təsdiqləyib. Həmçinin yazıçı və tədqiqatçı alim kimi də Azərbaycanın həyatında çox mühüm bir yer tutur”.
İlk yaradıcılığa “Gül ömrü” şeirilə başlayan yubilyarı təbrik edən Anar rəhbərlik etdiyi qurumun hədiyyəsini ona təqdim edib.
Azərbaycan Milli Elmlər Akademiyasının(AMEA) müxbir üzvü, Milli Məclisin deputatı Nizami Cəfərov yubilyarın zəngin yaradıcılıq məziyyətlərindən söz açıb. “Səyyad Aranın əsərlərində hissiyyatların zənginliyi ilə yanaşı, müdriklik və təmkin ön plandadır. O, ən zərif hisləri, istər siyasi, istərsə də psixoloji məzmunda müəllif səliqəsi ilə təqdim edir. Səyyad Aran imkan vermir ki, əsərlərindəki psixoloji təhlil anti-psixoloji təhlilə çevrilsin. O, məşğul olduğu bütün sahələrdə zəngin şəxsiyyətdir. Eyni zamanda, ədəbiyyatımıza və siyasətimizə hörmət gətirən adamdır”, - deyə N.Cəfərov qeyd edib.
Milli Məclisin deputatı Jalə Əliyeva çıxışında yubilyarın yaradıcılığından, onun ictimai-siyasi xadim kimi fəaliyyətindən danışıb. Ən xoş arzularını yubilyara çatdıran deputat ona yaradıcılığında və siyasi fəaliyyətində uğurlar arzulayıb.
Xalq yazıçısı Mövlud Süleymanlı, yazıçı Seyran Səxavət, professor Buludxan Xəlilov, tənqidçi Əsəd Cahangir, şair Oqtay Rza və digərləri çıxış edərək Səyyad Aranın yaradıcılıq axtarışlarından söz açıblar.
Bildirilib ki, ədəbi mühitə “Ulduz” jurnalında dərc olunan “Təmizlik kağızı” adlı hekayəsi ilə gələn ədibin bir-birinin ardınca “Qeybullanın qazancı”, “Soyuq günəş”, “Balıq günü”, “Havalar soyuyanda”, “Günün günorta çağı” kimi əsərləri çapdan çıxıb.
S.Aranın elə ilk hekayəsindən ədəbi ictimaiyyətin marağını cəlb etdiyini söyləyən natiqlər yazıçıya ən xoş arzularını çatdırıblar.
Tədbirdə Qafqaz Müsəlmanları İdarəsinin sədr müavini Hacı Fuad Nurullayev yubilyarı təmsil etdiyi qurumun rəhbəri Hacı Allahşükür Paşazadənin adından təbrik edərək ona xatirə hədiyyəsi verib.
Yubiley tədbiri çərçivəsində Səyyad Aranın yeni çapdan çıxmış “Sazaq” adlı kitabının təqdimatı olub.
Sonda Səyyad Aran tədbirin təşkilatçılarına və iştirakçılarına minnətdarlığını bildirib. Kədərlənəndə fikirlərini qələmlə bölüşməyi özünə həyat tərzi kimi qəbul edən yubilyar bundan sonra da Azərbaycan ədəbiyyatına böyük həvəslə xidmət edəcəyini söyləyib, yeni yazdığı şeirlərini oxuyub.

Paylaş:

Baxılıb: 553 dəfə