“Azərbaycan memarlıq irsinin qorunması və istifadəsi” mövzusunda elmi konfrans

Bakı:

10 °C

93 %

6 m/s

Əlaqə

AZ RU EN

Ana səhifə / Sosial / “Azərbaycan memarlıq irsinin qorunması və istifadəsi” mövzusunda elmi konfrans

“Azərbaycan memarlıq irsinin qorunması və istifadəsi” mövzusunda elmi konfrans

19.04.2017 [14:40]

Azərbaycan Memarlıq və İnşaat Universitetində (AzMİU) “Azərbaycan memarlıq irsinin qorunması və istifadəsi” mövzusunda elmi-praktik konfrans keçirilib.
AzMİU-dan AZƏRTAC-a bildiriblər ki, əvvəlcə konfrans iştirakçıları universitetin foyesində memarlıq abidələrimizə həsr olunan fotosərgi ilə tanış olublar. Sərgidə hazırda işğal altında olan rayonlarımızda erməni vandalizminin qurbanı olan memarlıq abidələrimizin fotoşəkilləri də yer alıb.
Tədbirdə çıxış edən AzMİU-nun rektoru, professor Gülçöhrə Məmmədova konfransın əhəmiyyətindən söz açıb, iştirakçılara uğurlar arzulayıb. G.Məmmədova Milan Politexnik Universitetinin nümayəndələrinin tədbirdə iştirak etdiklərini bildirib, iki universitet arasındakı əməkdaşlıqdan söz açıb.
Rektor konfransın mövzusunun aktuallığını və əhəmiyyətini diqqətə çatdıraraq bildirib ki, Azərbaycanın zəngin abidələr irsi var və onların üzərində aparılan tədqiqatlar, yazılan çoxlu məqalələr, kitablar bugünkü mövzunun aktual olduğunu bir daha sübut edir. Abidələr münaqişələr, müharibələr nəticəsində ağır fəsadlara uğrayır, dağılır, sıradan çıxır. Hazırda Azərbaycanın işğal altında olan torpaqlarında memarlıq abidələri məhv edilir, erməni qəsbkarları qədim alban abidələrinin üzərində erməniləşdirmə siyasəti həyata keçirirlər. Bu da tariximizə çox böyük zərbə vurur.
AzMİU-nun memarlıq konstruksiyaları və abidələrin bərpası kafedrasının müdiri, memarlıq doktoru Səbinə Hacıyeva “Qarabağ memarlığının inciləri - Xudavəng və Gəncəsər” mövzusunda məruzəsində Xudavəng və Gəncəsər abidələrinin tarixindən, bugünkü real vəziyyətindən söz açıb. Qeyd edilib ki, işğal altında olan hər iki alban abidəsinin ermənilər tərəfindən 1997-2007-ci illərdə restavrasiya və konservasiyası aparılan zaman alban abidələrinə xas xüsusiyyətlər dəyişdirilib və məhv edilib.
Milan Politexnik Universitetinin dosenti, memarlıq üzrə fəlsəfə doktoru Nora Lombardini İtaliyada abidələrin bərpası istiqamətində, tarixi və müasir binalarda aparılan restavrasiya və konservasiya işlərindən danışıb, tələbə memarların bu işlərə cəlb olunmalarının əhəmiyyətini qeyd edib. O, restavrasiya layihələrinin təkcə fikirlər üzərində deyil, sənədlər üzərində də aparılmasının vacibliyini vurğulayıb.
“İrimiqyaslı infrastruktur layihələri zamanı arxeoloji abidələrin qorunması” mövzusunda məruzə ilə çıxış edən, Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun şöbə müdiri, tarix üzrə fəlsəfə doktoru Qoşqar Qoşqarlı tikinti işləri zamanı abidələrin qorunmasına diqqət çəkib. O bildirib ki, 2004-cü ildə dövlət proqramı çərçivəsində regionların sosial-iqtisadi inkişafı istiqamətində böyük tikinti və quruculuq işləri aparılır, tikinti işləri zamanı abidələrimizin qorunmasına xüsusi diqqət yetirilir.
Konfransda Qala Dövlət Tarix-Etnoqrafiya qoruğunun direktoru, tarix üzrə fəlsəfə doktoru Məlahət Fərəcova, Azərbərpa Elmi-Tədqiqat Layihə İnstitutunun direktoru Telman Kərimli, AMEA-nın Arxeologiya və Etnoqrafiya İnstitutunun şöbə müdiri, tarix üzrə fəlsəfə doktoru Təvəkkül Əliyev, AMEA-nın Arxeologiya və Etnoqrafiya İnstitutunun şöbə müdiri Səfər Aşurov və digərləri mövzu ətrafında məruzələrlə çıxış ediblər.
Sonra məruzələr ətrafında fikir mübadiləsi aparılıb, suallar cavablandırılıb.

Paylaş:

Baxılıb: 530 dəfə