Beynəlxalq Dinlərarası və Mədəniyyətlərarası Dialoq Mərkəzinin baş katibi Qafqaz Müsəlmanları İdarəsində olub

Bakı:

23 °C

60 %

3 m/s

AZ RU EN

Ana səhifə / Sosial / Beynəlxalq Dinlərarası və Mədəniyyətlərarası Dialoq Mərkəzinin baş katibi Qafqaz Müsəlmanları İdarəsində olub

Beynəlxalq Dinlərarası və Mədəniyyətlərarası Dialoq Mərkəzinin baş katibi Qafqaz Müsəlmanları İdarəsində olub

18.08.2017 [09:49]

Avqustun 17-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Kral Abdulla Beynəlxalq Dinlərarası və Mədəniyyətlərarası Dialoq Mərkəzinin baş katibi Feysəl bin Müəmmər ilə görüşüb.
QMİ-nin mətbuat xidmətindən AZƏRTAC-a verilən məlumata görə, şeyxülislam qonağın diqqətini 2017-ci ilin Azərbaycan Prezidenti İlham Əliyev tərəfindən ölkəmizdə “İslam Həmrəyliyi İli” elan edilməsinə çəkərək, bununla əlaqədar ölkədə və xaricdə keçirilən irimiqyaslı beynəlxalq tədbirlər barədə məlumat verib. Şeyxülislam A.Paşazadə Feysəl bin Müəmmərin nəzərinə çatdırıb ki, artıq Bakıda, Pyatiqorskda, Helsinkidə və Tehranda birgə konfranslar uğurla keçirilib. İlin sonunadək isə QMİ, həmçinin İstanbul, Daşkənd, Madrid, Sankt-Peterburq, habelə Rabatda İslam həmrəyliyinə və dinlərarası dialoqa həsr olunmuş bir sıra beynəlxalq konfranslar keçirməyə hazırlaşır.
Allahşükür Paşazadə qonağı sentyabrın 8-də Moskva şəhərində Moskva və Bütün Rusiya Patriarxı ilə görüşəcəyi barədə, habelə Patriarx Kirillin təşəbbüsü ilə erməni kilsəsinin rəhbəri ilə keçiriləcək üçtərəfli görüş haqqında məlumatlandırıb. Qafqaz Müsəlmanları İdarəsinin həyata keçirdiyi fəaliyyətin önəmli hissəsinin dünya miqyasında dinlərarası dialoqun inkişafına xidmət etdiyini qeyd edən şeyxülislam Kral Abdulla Beynəlxalq Dinlərarası və Mədəniyyətlərarası Dialoq Mərkəzinin eyni sahədə apardığı fəaliyyəti yüksək qiymətləndirib və qonağı QMİ tərəfindən təşkil olunan tədbirlərdə iştirak etməyə dəvət edib.
Feysəl bin Müəmmər ölkəmizə səfərinin məqsədinin bu günlərdə Bakıda keçirilən 13-cü Dünya Skaut Gənclər Forumu və 41-ci Dünya Skaut Konfransında iştirak etmək olduğunu bildirib. O, baş katibi olduğu qurumun fəaliyyəti haqda məlumat verib. Qonaq ötən aprel ayında Qlobal Forumda iştirak etmək məqsədilə Bakıya ilk səfəri zamanı şeyxülislam həzrətləri ilə tanış olduğunu xatırladıb. O, QMİ sədrinin beynəlxalq nüfuzunu, habelə İslam həmrəyliyi, dinlərarası dialoqun, multikulturalizm və tolerantlıq ideyalarının inkişafına verdiyi töhfələri nəzərə alaraq onun namizədliyini Kral Abdulla Beynəlxalq Dinlərarası və Mədəniyyətlərarası Dialoq Mərkəzinin idarə heyətinin üzvlüyünə təqdim etmək üçün şeyxülislamın razılıq verməsini xahiş edib. İslam dininin ali məqsədlərinə, dinlərarası, mədəniyyətlərarası dialoq, sülh və həmrəylik ideyalarının bərqərar olmasına həmişə xidmət etməyə hazır olduğunu bildirən QMİ sədri namizədliyinin irəli sürülməsinə razılıq verib. Feysəl bin Müəmmər A.Paşazadəyə bu təklifi qəbul etdiyinə görə təşəkkürünü bildirib.
Görüşdə Səudiyyə Ərəbistanı Krallığının Azərbaycandakı fövqəladə və səlahiyyətli səfiri Müsaid bin İbrahim əs-Süleym və QMİ sədrinin birinci müavini Salman Musayev iştirak ediblər.
Qeyd edək ki, Kral Abdulla Beynəlxalq Dinlərarası və Mədəniyyətlərarası Dialoq Mərkəzi Səudiyyə Ərəbistanı Krallığı, İspaniya və Avstriya tərəfindən təsis olunmuş beynəlxalq hökumətlərarası təşkilatdır. Qurumun əsas vəzifəsi dünyada baş verən münaqişələrin qarşısını almaq, onları aradan qaldırmaq üçün dünya səviyyəsində dinlərarası və mədəniyyətlərarası dialoqu təşviq etməkdir. Qərargahı Vyana şəhərində yerləşir. Quruma dünyanın müxtəlif ölkələrindən hər 4 ildən bir seçilən 3 müsəlman, 3 xristian, 1 yəhudi, 1 buddist və 1 induist din xadimindən ibarət idarə heyəti başçılıq edir.

Paylaş:

Baxılıb: 512 dəfə