Bakıda dövlət qulluğunda insan resurslarının idarə olunması mövzusunda beynəlxalq konfrans keçirilir

Bakı:

24 °C

72 %

15 m/s

AZ RU EN

Ana səhifə / Sosial / Bakıda dövlət qulluğunda insan resurslarının idarə olunması mövzusunda beynəlxalq konfrans keçirilir

Bakıda dövlət qulluğunda insan resurslarının idarə olunması mövzusunda beynəlxalq konfrans keçirilir

06.12.2019 [09:46]

Dekabrın 5-də Azərbaycan Respublikasının Prezidenti yanında Dövlət İdarəçilik Akademiyasında “Dövlət qulluğunda insan resurslarının idarə olunması: beynəlxalq trendlər və milli təcrübələr” mövzusunda beynəlxalq elmi konfrans işə başlayıb.
AZƏRTAC xəbər verir ki, tədbirdən əvvəl iştirakçılar Fəxri xiyabanda Ümummilli Lider Heydər Əliyevin məzarını, Şəhidlər xiyabanını və “Türk şəhidliyi” abidəsini ziyarət ediblər.
Dövlət qulluğunda insan resurslarının idarə edilməsi sahəsində qlobal trendlərin müzakirəsinə həsr olunan konfransın məqsədi Prezident İlham Əliyevin 2018-ci il 23 noyabr tarixli Sərəncamı ilə təsdiq edilmiş “Azərbaycan Respublikasında dövlət qulluğunun inkişafına dair 2019-2025-ci illər üçün Strategiya”nın həyata keçirilməsinə yönələn elmi-nəzəri tövsiyələrin işlənib hazırlanmasıdır.
Konfransda akademik Urxan Ələkbərov “Davamlı inkişaf və inklüziv cəmiyyətin formalaşması insan resurslarının optimal idarə olunması indikatoru kimi” mövzusunda məruzə ilə çıxış edib.
Akademik ölkəmizin iqtisadi, sosial və humanitar sahələrdə uğurlu inkişaf etdiyini, müstəqilliyimizin hər yeni ilində nailiyyətlərinin artdığını diqqətə çatdırıb. Rektor əldə olunan nailiyyətlərin əsasında əsası Ulu Öndər Heydər Əliyev tərəfindən qoyulan və hazırda Prezident İlham Əliyev tərəfindən uğurla davam etdirilən innovativ dövlət idarəçiliyi strategiyasının dayandığını xüsusi vurğulayıb.
Rektor bildirib ki, Azərbaycan 2018-ci ildə bütün dünya üçün prioritet kimi qəbul edilən davamlı inklüziv inkişaf siyasətini səmərəli şəkildə reallaşdıran ölkədir.
Ötən il Davos İqtisadi Forumunda dünya ölkələrində davamlı inklüziv inkişafla bağlı vəziyyətin təhlilinə diqqət çəkən U.Ələkbərov bildirilib ki, həmin təhlil əsasında hazırlanan hesabata görə, Azərbaycan inklüziv cəmiyyətin formalaşdırılması və bu prosesin davamlılığının təmin olunması sahəsində əhəmiyyətli uğurlar qazanıb. Belə ki, ölkəmizin inklüziv inkişaf indeksi 4,69 faiz təşkil edib. Həmin göstərici ilə Azərbaycan bir çox dövlətləri, o cümlədən yüksək inkişaf səviyyəsinə malik ölkələri geridə qoyub.
Urxan Ələkbərov məruzəsində inklüziv inkişaf göstəriciləri Azərbaycandan aşağı olan ölkələr arasında ABŞ, Yaponiya, İsrail, İtaliya, İspaniya, Türkiyə, Portuqaliya, Yunanıstanın olduğunu diqqətə çatdırıb. Vurğulayıb ki, Azərbaycanın iqtisadi cəhətdən yüksək inkişaf etmiş ölkələri geridə qoyması ölkəmizin iqtisadi potensialının hərtərəfli artımı və bu inkişafdan əhalinin rifah halının yüksəldilməsi üçün səmərəli istifadə olunmasının beynəlxalq səviyyədə təsdiqidir.
Rektor inklüziv inkişaf sahəsində ölkəmizin yüksək göstəricilər əldə etməsində və sosial siyasətin reallaşdırılması baxımından dünya liderinə çevrilməsində Birinci vitse-prezident Mehriban Əliyevanın müstəsna xidmətinin olduğunu vurğulayıb. Bildirib ki, Birinci vitse-prezidentin insan potensialının inkişafı, inkişaf proseslərinin inklüzivliyinin təminatı sahəsində təşəbbüsləri, onun rəhbərliyi ilə həyata keçirilən iqtisadi, sosial, humanitar və mədəni layihələr Azərbaycanın sosial indikatorlarının yüksək qalmasına, həmçinin gələcək sosial tərəqqiyə imkan yaradıb.
Sonra çıxış edən Türkiyənin Azərbaycandakı səfiri Erkan Özoral, TİKA-nın Bakı nümayəndəliyinin əlaqələndiricisi Teoman Tiryaki və başqaları dayanıqlı inklüziv inkişaf və dövlət qulluğunda insan resurslarının idarə olunması ilə bağlı maraqlı fikirlər səsləndiriblər.
Dekabrın 6-da konfrans “Davamlı inklüziv inkişaf dövlət idarəçiliyində qlobal prioritet kimi” və “Dövlət qulluğunda innovasiyalar: qlobal trendlər, alətlər və mexanizmlər” mövzusunda müzakirələrlə işinə yekun vuracaq.

Paylaş:

Baxılıb: 539 dəfə