Şahin Rəhmanlı: Azərbaycan gəncləri daim dövlətçiliyin keşiyində durublar

Bakı:

19 °C

82 %

3 m/s

Əlaqə

AZ RU EN

Ana səhifə / Sosial / Şahin Rəhmanlı: Azərbaycan gəncləri daim dövlətçiliyin keşiyində durublar

Şahin Rəhmanlı: Azərbaycan gəncləri daim dövlətçiliyin keşiyində durublar

21.05.2020 [10:41]

Bu gün Azərbaycanda savadlı, intellektual, vətənpərvər gənc nəsil yetişir. Ölkə gəncləri Vətən qarşısında məsuliyyətlərini yüksək səviyyədə dərk edir, daim dövlətçiliyin keşiyində dayanırlar. “Ötən müddət ərzində hansı işləri gördüm və qarşıda nələri etməliyəm?” sualı hər bir vətənpərvər Azərbaycan gəncini böyük uğurlara kökləyir, onu daha əzmlə çalışmağa, öz üzərində işləməyə həvəsləndirir.

Bu fikirləri “İrəli” İctimai Birliyinin sədri Şahin Rəhmanlı AZƏRTAC-a müsahibəsində deyib.

“Sevindirici haldır ki, ölkəmizin siyasi, iqtisadi yüksəlişində rolu olan, mədəniyyət, incəsənət, elm və idman sahələrində parlaq nailiyyətlər qazanan, zəngin tarixi-mədəni irsimizin qorunub saxlanması və inkişaf etdirilməsi üçün yorulmadan çalışan, Azərbaycan həqiqətlərinin dünyaya çatdırılmasını əsas məqsədi bilən, bunun üçün yüksək fəallıq göstərən gənclərimizin sıraları ildən-ilə genişlənir. Ölkəmizdə əsası ulu öndər Heydə Əliyev tərəfindən qoyulan və bu gün Prezident İlham Əliyevin rəhbərliyi ilə uğurla davam etdirilən dövlət gənclər siyasəti Azərbaycan gəncliyinin inkişafına təkan verir, onların özlərini cəmiyyətdə təsdiq etməsində mühüm rol oynayır. Məhz buna görədir ki, biz Azərbaycan gəncinin vətənpərvər ruhda yetişdiyinin şahidi oluruq. Azərbaycan xalqı öz gəncinin savadına, intellektinə, bilik və bacarığına inanır”, - deyə Ş.Rəhmanlı bildirib.

Azərbaycanda könüllülük hərəkatının da gənclərimizin yüksək fəallıq nümayiş etdirdiyi sahələrdən olduğunu vurğulayan “İrəli” İctimai Birliyinin sədri qeyd edib ki, bu gün biz ictimai proseslərin bütün sahələrində Azərbaycan gəncinin könüllü fəaliyyətinin şahidi oluruq. Prezident İlham Əliyevin 2019-cu il 30 dekabr tarixli Sərəncamı ilə bu il ölkəmizdə “Könüllülər ili” elan edilib. Bu Sərəncam ölkəmizdə könüllülük işinin vacibliyinə diqqəti bir daha artırıb. Könüllülük insanları vahid niyyət ətrafında birləşdirən, vətəndaş, cəmiyyət və dövlətin birgə fəaliyyətinin ən uğurlu formatıdır. Könüllülük həm də vətənpərvərlik məktəbi, öz xalqına, dövlətinə, milli-mənəvi dəyərlərə bağlılıq və xidmət örnəyidir. Biz ev sahibliyi etdiyimiz böyük tədbirlərdə könüllülər ordusunun göstərdiyi əzmi müşahidə etmişik. Bu gün könüllü olan gənc sabahın istedadlı, bacarıqlı, savadlı kadrıdır. Çünki könüllülük fəaliyyəti özü bir məktəb, böyük təcrübədir. Bu təcrübəni qazanan gənc özünü inkişaf etdirir, cəmiyyətə inteqrasiya olur, şəxsi bacarıqlarını göstərmə imkanı, karyerasında əldə edəcəyi böyük təcrübələr qazanır, birlik anlayışının dərinliyini anlayır və eyni istəyə sahib olur. Bu gün könüllü gənc qarşılıqsız olaraq fəaliyyət göstərir. Könüllü gəncin əsas istəyi ona olan inamı doğrultmaqdır. Görülən işin, zəhmətin qarşılığını görmək gözəl duyğudur və bu diqqəti, səmimiyyəti ölkə rəhbərliyi tərəfindən hiss edən gənclərimiz bu ali etimadı doğrultmağa çalışırlar. Azərbaycanda “Eurovision-2012” mahnı müsabiqəsi, I Avropa Oyunları, Formula 1 yarışları, IV İslam Həmrəyliyi Oyunları kimi irimiqyaslı beynəlxalq tədbirlərin təşkilində könüllü gənclərin fəaliyyəti danılmazdır. Dövlətimizin başçısının 2015-ci il 26 yanvar tarixli Sərəncamı ilə təsdiq edilən “2015-2025-ci illərdə Azərbaycan Gənclərinin İnkişaf Strategiyası”, həmçinin “Azərbaycan gəncliyi 2017-2021-ci illərdə” Dövlət Proqramı dövlət gənclər siyasətinin daha da inkişafına mühüm təsir etməklə yanaşı, gənclərin daim Azərbaycan dövlətinin diqqət mərkəzində olduğunu göstərir. Düşünürəm ki, “Könüllülər ili” çərçivəsində görüləcək işlər gənclərin əzmkarlığını daha da artıracaq və bu hərəkat gənclərimizin dövlətçiliyə bağlı, intellektual, geniş dünyagörüşlü qüvvə kimi formalaşmasında mühüm əhəmiyyət kəsb edərək genişlənəcək.

Paylaş:

Baxılıb: 329 dəfə