MDB dövlətlərinin Təhlükəsizlik şuraları katiblərinin toplantısında Azərbaycanın koronavirusla mübarizə və digər sahələrdə uğurlu fəaliyyətindən danışılıb

Bakı:

30 °C

52 %

7 m/s

AZ RU EN

Ana səhifə / Sosial / MDB dövlətlərinin Təhlükəsizlik şuraları katiblərinin toplantısında Azərbaycanın koronavirusla mübarizə və digər sahələrdə uğurlu fəaliyyətindən danışılıb

MDB dövlətlərinin Təhlükəsizlik şuraları katiblərinin toplantısında Azərbaycanın koronavirusla mübarizə və digər sahələrdə uğurlu fəaliyyətindən danışılıb

21.11.2020 [00:30]

Azərbaycan Respublikası Təhlükəsizlik Şurasının katibi Ramil Usubov noyabrın 18-də Rusiya tərəfinin təşkilatçılığı ilə videokonfrans formatında keçirilən Müstəqil Dövlətlər Birliyinin iştirakçısı olan dövlətlərin Təhlükəsizlik şuraları katiblərinin səkkizinci görüşündə iştirak edib.

Azərbaycan Respublikası Təhlükəsizlik Şurası Katibinin Xidmətindən AZƏRTAC-a bildiriblər ki, Ramil Usubov tədbirdə çıxış edərək koronavirus infeksiyasının yayılmasına qarşı mübarizədə Azərbaycanda görülmüş işlər, o cümlədən bu sahədə ölkənin səhiyyə sistemi tərəfindən həyata keçirilmiş effektiv tədbirlər barədə məlumat verib. O, qeyd edib ki, Azərbaycan koronavirus infeksiyasının yayılmasına qarşı mübarizədə ilk günlərdən başlayaraq qlobal həmrəylik nümayiş etdirib, Ümumdünya Səhiyyə Təşkilatına 10 milyon dollar məbləğində maliyyə vəsaiti ayırıb, 30-dan çox ölkəyə maddi və humanitar yardım göstərib. Pandemiya dövründə ölkədə iqtisadi sabitliyin təmin olunması istiqamətində görülmüş tədbirlər barədə məlumat verilərkən ölkədə məşğulluğun təmin olunması və səhiyyə üçün dövlət tərəfindən 1,5 milyard dollar məbləğində maliyyə vəsaitinin ayrıldığı, 5 milyon insanı əhatə edən sosial paketin reallaşdırıldığı bildirilib.

Yoluxma hallarının sayında artım tempinin müşahidə olunduğunu qeyd edən R.Usubov cari il dekabrın 3-4-də pandemiya ilə mübarizəyə həsr olunmuş BMT Baş Assambleyasının xüsusi sessiyasının keçirilməsi barədə Qoşulmama Hərəkatının sədri qismində Azərbaycan Respublikasının Prezidenti İlham Əliyev tərəfindən irəli sürülmüş təşəbbüsün bütün dünya dövlətləri tərəfindən müsbət qarşılandığını vurğulayıb.

Həmçinin tədbir iştirakçıları əhalinin infeksion xəstəliklərdən qorunması məqsədilə ölkədə biotəhlükəsizliyin təmin olunması istiqamətində həyata keçirilən preventiv tədbirlər barədə məlumatlandırılıb.

R.Usubov çıxışında Azərbaycanın rəqəmsal iqtisadiyyat və innovasiyaların tətbiqi sahəsində fəaliyyəti, Avropa ilə Asiya arasında "Rəqəmsal İpək yolu"nun yaradılması məqsədilə Mərkəzi Asiya dövlətlərinin telekommunikasiya operatorları ilə əlaqələrin qurulması üzrə yeni layihə barədə məlumat verib.

Eyni zamanda, Azərbaycan ilə Mərkəzi Asiya dövlətləri arasında mövcud olan siyasi dialoq, ölkəmizin bu dövlətlər üçün Avropa məkanına etibarlı körpü rolunu oynaması qeyd olunub.

Əfqanıstanda sülhün və təhlükəsizliyin qorunmasının bütün region üçün vacibliyini vurğulayan R.Usubov Azərbaycanın həmin dövlətlə iqtisadi, ticarət, enerji, nəqliyyat və digər sahələrdə əməkdaşlıq həyata keçirməklə sabitliyin qorunması işinə daim öz töhfəsini verdiyini bildirib.

İnformasiya təhlükəsizliyi məsələsinə toxunan R.Usubov müvafiq sahədə zəruri qanunvericilik bazasının formalaşdırıldığını, bu istiqamətdə ölkəmizin milli təhlükəsizliyinə yönələn təhdidlər haqqında məlumat verib.

O, işğal olunmuş ərazilərimizin azad edilməsi uğrunda həyata keçirilən hərbi əməliyyatlar zamanı Azərbaycanın informasiya təcavüzünə məruz qaldığını, mövcud vəziyyəti düzgün anlamağa imkan verməyən yalan məlumatların müxtəlif xarici kütləvi informasiya vasitələri və internet saytlar vasitəsilə ictimaiyyətə catdırıldığını qeyd edib.

Sonda qlobal çağırış və müasir təhdidlərə qarşı mübarizədə ümumi səylərin birləşdirilməsinin zəruriliyi vurğulanıb.

Görüşdə Rusiya, Belarus, Qazaxıstan, Moldova, Ermənistan, Tacikistan, Türkmənistan, Özbəkistan Təhlükəsizlik şuralarının katibləri, eləcə də MDB İcraiyyə Komitəsinin sədri və Kollektiv Təhlükəsizlik Müqaviləsi Təşkilatının baş katibi də iştirak ediblər.

Paylaş:

Baxılıb: 706 dəfə