İsti havalarda iş rejimi necə olmalıdır?

Bakı:

27 °C

66 %

1 m/s

Əlaqə

AZ RU EN

Ana səhifə / Sosial / İsti havalarda iş rejimi necə olmalıdır?

İsti havalarda iş rejimi necə olmalıdır?

16.08.2022 [10:43]

Yeganə BAYRAMOVA

Ölkə ərazisində bir neçə gündür ki, anomal hava şəraiti müşahidə olunur. Havaların isti keçməsi iş rejiminin necə olması ilə bağlı məsələnin aktuallaşmasına səbəb olub. Kəskin istilər olarkən açıq havada işləyən insanların təhlükəsizliyi məsələsi də gündəmə gəlir. Məlumdur ki, kəskin istilər olduqda günvurmaya məruz qalanların da sayı çoxalır.

Əmək Məcəlləsinin 233-cü maddəsinə əsasən, havanın temperaturu 41 dərəcə selsidən çox olduğu hallarda açıq havada və sərinləşdirici qurğular olmayan örtülü binalarda, otaqlarda və digər iş yerlərində bütün növ işlərin görülməsi dayandırılmalıdır. Belə hallarda işçilərin həyat və sağlamlığının mühafizəsi məqsədilə onlara sərinləşmək üçün imkan yaradılmaqla fasilələr verilməli və işəgötürənlə həmkarlar təşkilatının birgə qərarı əsasında fasilənin sayı, müddəti müəyyən olunmalı, eyni zamanda iş zamanı verilmiş fasilələr iş vaxtına daxil edilməlidir. Həmin fasilələr zamanı əmək haqqı işçilərin tarif maaşına görə ödənilməlidir. İş dayandırıldıqda boşdayanma vaxtının haqqının işçinin təqsiri üzündən baş verməyən boşdayanma kimi, tarif maaşının üçdə iki hissəsindən az olmayaraq ödənilməsi təmin edilməlidir.

İsti havaların neçə gün davam edəcəyi ilə bağlı Ekologiya və Təbii Sərvətlər Nazirliyindən “Yeni Azərbaycan”a açıqlama verilib. Nazirliyin Hidrometeoroloji Proqnozlar Bürosunun direktoru Gülşad Məmmədova bildirib ki, ölkə ərazisində müşahidə olunan isti hava şəraiti avqustun 20-dək davam edəcək. Onun sözlərinə görə, havanın maksimal temperaturunun Bakıda və Abşeron yarımadasında 35-39, bəzi yerlərdə 40, rayonlarda 35-40, Mərkəzi Aran və Naxçıvan MR-nin bəzi yerlərində 41-42, dağlarda isə 27-32 dərəcəyədək yüksələcək: “Avqustun 14-də ölkə ərazisində havanın temperaturu iqlim normasından 3.8 dərəcə çox olub. Belə ki, maksimal temperatur Bakıda və Abşeron yarımadasında 38.5, Aran rayonlarında isə 40.3 dərəcəyə çatıb. Aparılan çoxillik müşahidələrə görə, son illərdə Bakıda və Abşeron yarımadasında havanın maksimal temperaturu 2017-ci il avqustun 9-da 42.6 dərəcə qeydə alınıb”.

Əmək və Əhalinin Sosial Müdafiəsi Nazirliyinin mətbuat katibi Fazil Talıblı bildirib ki, havanın temperaturu 41 dərəcədən çox olduğu halda açıq havada çalışan şəxslərin maaşları ödənilməklə iş dayandırılır: “Temperaturun 41 dərəcədən çox olduğuna dair Ekologiya və Təbii Sərvətlər Nazirliyindən xəbərdarlıq verildiyi halda, biz də lazım olan tədbirləri görməyə hazırıq”.

Paylaş:

Baxılıb: 757 dəfə