Azərbaycan yaşıl enerjiyə keçid prosesində ön planda olmağı hədəfləyir

Bakı:

24 °C

68 %

3 m/s

Əlaqə

AZ RU EN

Ana səhifə / YAP xəbərləri / Azərbaycan yaşıl enerjiyə keçid prosesində ön planda olmağı hədəfləyir

Azərbaycan yaşıl enerjiyə keçid prosesində ön planda olmağı hədəfləyir

25.06.2024 [20:05]

İlqar İlyasov, YAP Laçın rayon təşkilatının sədri

Azərbaycan Respublikasının Prezidenti İlham Əliyev cənabları “Yaşıl enerji” ilə bağlı Azərbaycanın mövqeyini dəfələrlə müxtəlif platformalarda dilə gətirib. 21 iyun 2024-cü il tarixində Prezident İlham Əliyev “Euronews”-a verdiyi müsahibədə də bu məsələyə bir daha toxunub, ölkəmizin yeni dövr üçün iqtisadi hədəflərini açıqlayıb. Prezident İlham Əliyev: “Azərbaycan nəinki ənənəvi enerji mənbələrinə, o cümlədən bərpaolunan enerjiyə sərmayə yatıranlar üçün cəlbedicidir”, - deyib. Bu fikirlər aydın göstərir ki, Azərbaycan bu istiqamətdə inkişafı qarşısına məqsəd qoyub. Bunun üçün investorlara cəlbedici mühit yaradır və “yaşıl enerji”nin əhatəsinin genişlənməsi üçün ciddi addımlar atılır. Məlumdur ki, Azərbaycanın bərpaolunan enerji sektoruna sərmayə qoyuluşu, ölkənin enerji təchizatını şaxələndirmək və karbon emissiyalarını azaltmaq məqsədinə xidmət edir. Artıq bu istiqamətdə bir neçə böyük layihəyə start verilib. Məsələn, külək və günəş enerjisi sahələrində bir neçə iri stansiya qurulub və bu stansiyalar ölkənin enerji tələbatının əhəmiyyətli bir hissəsini təmin edir. Karbohidrogen ehtiyatlarının dünya bazarına çıxarılmasında olduğu kimi bu istiqamətdə də Azərbaycanın böyük tərəfdaşları var. Bu istiqamətdə “Masdar” ölkəmizin strateji tərəfdaşı, “ACWA Power” və BP isə sərmayədarlarımız sırasındadır. Azərbaycan ilə işləməyi planlaşdıran digər ölkələrin bir çox şirkətləri var. Ötən ilin ölkəmizdə 230 meqavatlıq ilk Günəş enerjisi stansiyasının açılışı reallaşdırıldı. Perspektivdə bu istiqamətdə bağlanmış bütün müqavilələr və anlaşma memorandumları icra olunacaq. Bərpaolunan enerjidən istifadə zamanı olduqca düşünülmüş yanaşma tətbiq edilməlidir ki, elektrik enerjisi maksimum istehsal olunsun və təbii qaza qənaət edilsin, o, əsasən indi Avropaya lazım olan qaydada nəql olunsun. Ötürülmə xətləri ilə bağlı qonşularla fəal iş aparılmalıdır. Azərbaycanın özünə o qədər də böyük ölçüdə bərpaolunan enerji lazım deyil və bu səbəbə görə ixracın şaxələndirilməsi istiqamətində fəaliyyətimiz daha da genişləndirilməlidir. Azərbaycanda sərmayə mühiti son illərdə əhəmiyyətli dərəcədə yaxşılaşıb. Hökumət, xarici investorlar üçün əlverişli şərait yaratmaq məqsədi ilə bir sıra islahatlar həyata keçirib. Bu islahatlar, vergi güzəştləri, hüquqi müdafiə və investorların hüquqlarının qorunmasını əhatə edir. Bunun nəticəsində ölkəyə daha çox xarici sərmayə cəlb olunub. Xüsusi ilə qeyd etmək lazımdır ki, Azərbaycan son illərdə enerji sektorunda əhəmiyyətli dəyişikliklər həyata keçirir. Ölkə başçısı hər zaman olduğu kimi, son müsahibəsində də bildirib ki, ölkə ənənəvi neft və qaz sektorunda əldə etdiyi gəlirləri bərpaolunan enerji mənbələrinə yönəldir. Bu addımlar, Azərbaycanın COP29-a ev sahibliyi edəcək bir ölkə olaraq yaşıl enerjiyə keçid prosesində öndə gedənlərdən biri olma öhdəliyini yerinə yetirməsinə kömək edir. COP29-a ev sahibliyi edəcək bir ölkə olaraq, Azərbaycan yaşıl enerjiyə keçid prosesində ön planda olmağı hədəfləyir. Bu tədbir, ölkəyə yaşıl enerji texnologiyaları və siyasətləri haqqında bilik və təcrübə mübadiləsi üçün böyük bir platforma təmin edəcək. Azərbaycan, COP29 çərçivəsində beynəlxalq ictimaiyyətə öz yaşıl enerji strategiyalarını təqdim edərək, digər ölkələr üçün nümunə olmağı planlaşdırır. COP29-a ev sahibliyi edən ölkə kimi Azərbaycanın əsas məqsədlərindən biri də müsbət mühit və həmrəylik yaratmaqdır. Belə ki, Azərbaycan COP zamanı və ondan sonrakı dövr üçün elə mühit yaratmaq istəyir ki, ölkələr və şirkətlər bir-biri ilə istəklə işləsin və qarşılıqlı iddiaları kənara qoysunlar, planetin qorunması ilə əlaqədar əsas gündəliyə diqqət yetirsinlər.

Paylaş:

Baxılıb: 533 dəfə