Azərbaycan ilə Mərkəzi Asiya ölkələri fəal investisiya layihələri həyata keçirir

Bakı:

24 °C

57 %

2 m/s

Əlaqə

AZ RU EN

Ana səhifə / YAP xəbərləri / Azərbaycan ilə Mərkəzi Asiya ölkələri fəal investisiya layihələri həyata keçirir

Azərbaycan ilə Mərkəzi Asiya ölkələri fəal investisiya layihələri həyata keçirir

12.08.2024 [17:47]

Avqustun 9-da Prezident İlham Əliyev Qazaxıstanın paytaxtı Astanada Mərkəzi Asiya və Azərbaycan Respublikasının Dövlət Başçılarının görüşündə çıxış edərək mühüm məsələləri diqqətə çatdırıb.

Bərpaolunan enerji, həmçinin nəqliyyat-tranzit sahəsində əməkdaşlıq məsələlərindən danışan dövlətimizin başçısı qeyd edib ki, bu, son iki ildə Onun Mərkəzi Asiya ölkələrinə 16-cı səfəridir. Bildirib ki, həmin müddətdə Qazaxıstan, Qırğızıstan, Tacikistan və Özbəkistandan olan həmkarları Azərbaycanı ümumilikdə 15 dəfə ziyarət ediblər.

Son illər Azərbaycan Mərkəzi Asiya ölkələri ilə əlaqələrin inkişafının yeni mərhələsinə qədəm qoyub. Ölkəmizin dünyada artan nüfuzu sayəsində bir çox dövlətlər Azərbaycanla əməkdaşlığa can atır və onların arasında Mərkəzi Asiya dövlətləri önəmli yer tutur. Son iki il ərzində Azərbaycan Prezidentinin Mərkəzi Asiya ölkələrinə ardıcıl səfərləri xüsusilə diqqət çəkir. Bu münasibətlərin inkişaf etməsi isə təkcə Azərbaycan və Mərkəzi Asiya ölkələri üçün deyil, həm də bütün Türk dünyası üçün mühüm əhəmiyyət daşıyır. İstər regionda, istərsə də dünyada baş verən geosiyasi proseslər dövlətləri birgə əməkdaşlığa səsləyir. Qarşılıqlı səfərlər zamanı imzalanan sənədlər ölkələrimiz arasında münasibətlərin perspektivlərini müəyyənləşdirir.

Qazaxıstan, Qırğızıstan və Özbəkistan ilə fəal şəkildə investisiya layihələri həyata keçirilir. Artıq Azərbaycan-Qazaxıstan, Azərbaycan-Qırğızıstan və Azərbaycan-Özbəkistan birgə investisiya fondları yaradılıb. Həyata keçirilən “Rəqəmsal İpək Yolu” layihəsi rəqəmsal infrastrukturun inkişafına və rəqəmsal təhlükəsizliyə töhfə verəcəkdir.

Azərbaycan və Mərkəzi Asiya ölkələri beynəlxalq təşkilatlar çərçivəsində uğurla əməkdaşlıq edirlər. Bu xüsusda, BMT-nin Mərkəzi Asiya Ölkələrinin İqtisadiyyatları üçün Xüsusi Proqramı – SPECA qeyd olunmalıdır. Ötən ilin noyabr ayında Bakıda keçirilmiş, SPECA-nın 25 illiyinə həsr olunmuş Zirvə görüşünün nəticələri əməkdaşlığın praktiki inkişafı baxımından əhəmiyyət kəsb edir. SPECA-nın Bakıda keçirilən Sammitində Qazaxıstan, Qırğızıstan, Tacikistan və Özbəkistan prezidentləriiştirak ediblər.

Azərbaycan beynəlxalq ictimaiyyətin yekdil dəstəyini qazanaraq bu ilin noyabr ayında COP29 iqlim konfransına ev sahibliyi edəcəkdir.Azərbaycan COP29-a sədrliyi çərçivəsində regionda iqlim dəyişmələri ilə bağlı problemlərin həlli üçün Mərkəzi Asiya ölkələri ilə birgə təşəbbüsləri dəstəkləməyə hazırdır.

Azərbaycan Mərkəzi Asiya ilə Avropa arasında körpü rolunu oynayaraq regional və qlobal gücünü möhkəmləndirir, nəqliyyat və tranzit qovşağı kimi bölgədə əsas söz sahibinə çevrilir. Nəqliyyat sahəsində həyata keçirilən nəhəng layihələr, Bakı-Tbilisi-Qars dəmir yolunun yükaşırma qabiliyyətinin 1 milyon tondan 5 milyon tona çatdırılması, Ələt Beynəlxalq Ticarət Limanının illik ötürücülük qabiliyyətinin 15 milyon tondan 25 milyon tonadək artırılması Orta Dəhlizin əhəmiyyətini bir daha vurğulayır.

Azərbaycanın hazırda ənənəvi enerji mənbələrindən istifadə etməklə diversifikasiya meyilləri, bərpaolunan enerji mənbələri hesabına elektrik enerjisinin generasiya edilməsi layihələri böyük maraq doğurur. O cümlədən Azərbaycan Xəzər dənizinin külək enerjisi potensialından istifadə edərək elektrik enerjisinin Avropa bazarlarına çıxarılmasında maraqlı tərəf kimi öz mövqeyini möhkəmləndirir və bu istiqamətdə müvafiq tədbirlərin keçirilməsini təmin edir.

Beynəlxalq əlaqələri gündən-günə daha da genişlənən Azərbaycanın Şərqlə Qərb arasında mühüm tranzit ölkə, “Qoca qitə”nin etibarlı enerji təchizatçısı kimi önəmli rolu bundan sonra da davam edəcək.

Meydanəli Yolçiyev,

YAP Daşkəsən rayon təşkilatının sədri

Paylaş:

Baxılıb: 497 dəfə