Azərbaycan-Gürcüstan münasibətləri strateji əhəmiyyət daşıyır

Bakı:

27 °C

63 %

10 m/s

Əlaqə

AZ RU EN

Ana səhifə / YAP xəbərləri / Azərbaycan-Gürcüstan münasibətləri strateji əhəmiyyət daşıyır

Azərbaycan-Gürcüstan münasibətləri strateji əhəmiyyət daşıyır

23.01.2025 [14:27]

Fidan Hüseynova,

YAP Quba rayon təşkilatının sədri

Beynəlxalq hüquq normalarına, qarşılıqlı inam və etimada, faydalı əməkdaşlığa əsaslanaraq xarici siyasətini uğurla həyata keçirən Azərbaycan dünya dövlətləri, eləcə də qonşu dövlətlərlə münasibətlərini inkişaf etdirməyə nail olmuşdur. Bu baxımdan, Azərbaycanın Gürcüstanla münasibətləri dinamik şəkildə inkişaf edir.

Sovetlər birliyi dağılandan sonra bu ölkələrdə baş verən proseslər, daxili və xarici vəziyyətin oxşarlığı, geosiyasi maraqların üst-üstə düşməsi və digər amillər iki dövlət arasında müttəfiqlik münasibətlərinin yaranmasına səbəb olub. Azərbaycan-Gürcüstan diplomatik münasibətləri 1992-ci il noyabrın 18-də qurulsa da, bu əlaqələrin yüksək səviyyəyə çatdırılması Ulu Öndər Heydər Əliyevin adı ilə bağlıdır. Gürcüstanın Baş naziri İrakli Kobaxidzenin 17 yanvar 2025-ci il tarixində ölkəmizə səfəri iki respublika arasında mövcud olan mehriban qonşuluq və dostluq münasibətlərinin təzahürüdür.

Prezident İlham Əliyev və Gürcüstanın Baş naziri İrakli Kobaxidze mətbuata bəyanatlarla çıxış etmişdir. Dövlətimizin başçısı bəyanatında bildirmişdir ki, bizim xalqlarımız əsrlər boyu dostluq, mehriban qonşuluq, qardaşlıq şəraitində yaşamışlar: “Bu ənənələr bu gün də yaşayır. Bu gün Gürcüstan-Azərbaycan əlaqələri bütün istiqamətlər üzrə uğurla inkişaf edir. Hesab edirəm ki, bizim siyasi əlaqələrimiz bütün qonşular üçün nümunə ola bilər. İqtisadi sahədə yaxşı nəticələr var. Azərbaycan Gürcüstan iqtisadiyyatına 3,6 milyard dollar sərmayə qoyub. Əlbəttə, bu onu göstərir ki, hökumətinizin uğurlu iqtisadi siyasəti, sərmayələrin cəlb edilməsi, Gürcüstanda olan çox müsbət sərmayə iqlimi bütün investorları həvəsləndirir. O cümlədən Azərbaycan investorları da böyük həvəslə Gürcüstana öz sərmayələrini qoyurlar”.

Prezident İlham Əliyev qeyd etmişdir ki, energetika sahəsində iki ölkə arasındakı əməkdaşlıq həm ölkələrimiz, həm də geniş coğrafiya üçün xüsusi əhəmiyyət daşıyır: “Birgə həyata keçirdiyimiz neft-qaz layihələri bu gün bir çox ölkələrin enerji təhlükəsizliyinin əsasını təşkil edir. Təkcə onu demək kifayətdir ki, Gürcüstan tranziti vasitəsilə Azərbaycan hazırda 11 ölkəyə öz təbii qazını ixrac edir, ildən-ilə ixrac artır. Keçən il bu, 25 milyard kubmetrə çatmışdır və bunun 10 faizi - ümumi ixracımızın 10 faizi Gürcüstanın payına düşür. Mənə verilən məlumata görə, Gürcüstanın istehlak etdiyi təbii qazın 80 faizdən çoxu Azərbaycan mənşəlidir. Yəni, bu, doğrudan da çox böyük, xüsusi əhəmiyyətə malik olan layihədir və getdikcə bizim qaz ixrac coğrafiyamız genişlənəcək. Bizim yeni qaz yataqlarımız bu il işə düşəcək. Gələn il, ondan sonrakı illər üçün də yeni kəşf edilmiş yataqlar mövcuddur. Ona görə getdikcə təbii qazın ixracı artmalıdır və artacaqdır”.

Gürcüstanın Baş naziri İrakli Kobaxidzenin bu səfəri dövlətlərarası münasibətlərin inkişafı üçün yeni səhifə açdı. Müzakirə olunan məsələlərə, eləcə də verilən bəyanatlara əsasən vurğulamaq lazımdır ki, dövlətlərarası dostluq, qardaşlıq əlaqələri yeni mərhələyə qədəm qoyub. Bundan sonra da Azərbaycan-Gürcüstan arasındakı münasibətlər inkişaf edəcək və ümumilikdə regionun inkişafına töhfə vermiş olacaq.

Paylaş:

Baxılıb: 548 dəfə