Qisası alınmış Xocalı soyqırımı və xocalıların böyük qayıdışı

Bakı:

12 °C

82 %

2 m/s

Əlaqə

AZ RU EN

Ana səhifə / YAP xəbərləri / Qisası alınmış Xocalı soyqırımı və xocalıların böyük qayıdışı

Qisası alınmış Xocalı soyqırımı və xocalıların böyük qayıdışı

25.02.2025 [16:09]

Yeni Azərbaycan Partiyası Nizami rayon təşkilatı 26 fevral – Xocalı soyqırımı günü ilə əlaqədar “Qisası alınmış Xocalı soyqırımı və xocalıların böyük qayıdışı” mövzusunda sərgi-tədbir keçirib.

Əvvəlcə “Qisası alınmış Xocalı soyqırımı və xocalıların böyük qayıdışı” mövzusunda əl işlərindən ibarət sərgiyə baxış keçirilib.

Tədbirdə çıxış edən YAP Nizami rayon təşkilatının sədri Ramil Vəlibəyov, Nizami Bələdiyyəsinin sədri Vüqar Quliyev, Keşlə Bələdiyyəsinin sədri Rəşad Babayev və başqaları qeyd ediblər ki, artıq 5-ci ildir Xocalı soyqırımı qurbanlarının xatirəsini qalib, qisasını almış xalq olaraq anırıq. Ermənistan tərəfindən işğal edilmiş torpaqlarımız 30 ildən sonra azadlığına qovuşub, Xocalı soyqırımı qurbanlarının, həmçinin digər şəhidlərimizin qanı yerdə qalmayıb, qisası alınıb. Vurğulanıb ki, Xocalı şəhəri 2023-cü il sentyabrın 19-20-də Azərbaycan Ordusunun Qarabağda keçirdiyi lokal xarakterli antiterror tədbirləri nəticəsində separatçılardan təmizlənib. Azərbaycan Respublikasının Prezidenti İlham Əliyev 2023-cü il oktyabrın 15-də Xocalı şəhərində Azərbaycan Respublikasının Dövlət Bayrağını ucaldıb. Bu gün isə Qarabağda, o cümlədən Xocalıda qətliamlar törədənlər Bakıda ədalət qarşısında cavab verirlər. Əlavə edilib ki, bu gün Prezident İlham Əliyevin rəhbərliyi ilə Xocalı yenidən qurulur, abadlaşdırılır, xocalılar öz doğma yurdlarına qayıdırlar.

Çıxışlardan sonra rəsm və inşa müsabiqəsinin qalibləri mükafatlandırılıb.

Ümumilikdə 46 nəfərin iştirak etdiyi rəsm müsabiqəsində birinci yerə Kimya-biologiya təmayüllü Respublika liseyinin şagirdi Mustafazadə Bətül Rauf qızı, ikinci yerə Sağlamlıq imkanları məhdud uşaqlar üçün 3 saylı Respublika xüsusi internat məktəbinin şagirdi Fazilova Xədicə Qasım qızı, üçüncü yerə isə 61 saylı orta məktəbin şagirdi Muxamedşina Alina İntiqam qızı layiq görülüblər.

Eyni zamanda 69 nəfərin iştirak etdiyi inşa müsabiqəsində birinci yerin qalibi 210 saylı orta məktəbin şagirdi Qurbanov Elnur Emin oğlu, ikinci yerin qalibi 1 saylı idman liseyinin şagirdi Dəmirova Fəridə Fərid qızı, üçüncü yerin qalibi isə Azərbaycan Texniki Universitetinin nəzdində Bakı Texniki Kollecinin tələbəsi Əhmədzadə Rəhim Bəxtiyar oğlu olublar.

Qaliblərə diplomlar və hədiyyələr təqdim olunub. 109 müsabiqə iştirakçısı isə həvəsləndirici sertifikatlarla təltif edilib.

Paylaş:

Baxılıb: 249 dəfə