Əli Əhmədov: Növbəti seçkilərdə cənab İlham Əliyevin namizədliyinin irəli sürülməsi və qələbəsi xalqımızın arzu və istəklərinin ifadəsidir

Bakı:

4 °C

65 %

8 m/s

AZ RU EN

Ana səhifə / YAP xəbərləri / Əli Əhmədov: Növbəti seçkilərdə cənab İlham Əliyevin namizədliyinin irəli sürülməsi və qələbəsi xalqımızın arzu və istəklərinin ifadəsidir

Əli Əhmədov: Növbəti seçkilərdə cənab İlham Əliyevin namizədliyinin irəli sürülməsi və qələbəsi xalqımızın arzu və istəklərinin ifadəsidir

19.07.2013 [10:02]

Dünən Yeni Azərbaycan Partiyası (YAP) Sədrinin müavini-İcra katibi Əli Əhmədov partiyanın Mingəçevir təşkilatının fəalları ilə görüş keçirib.
Şəhər təşkilatının sədri Cavanşir Yusubov partiya fəllarının qarşıdan gələn prezident seçkilərinə ciddi şəkildə hazırlaşdıqlarını və bu istiqamətdə YAP İcra Katibliyinin tövsiyələrinə uyğun olaraq fəaliyyət göstərdiklərini qeyd edib.
Görüşdə çıxış edən YAP Sədrinin müavini Əli Əhmədov prezident seçkiləri ilə əlaqədar partiya fəallarının üzərinə ciddi məsuliyyət düşdüyünü bildirib. Əli Əhmədov qeyd edib ki, nəinki partiyamızın üzvləri, bütövlükdə Azərbaycan xalqı cənab İlham Əliyevin prezidentliyə namizədliyini dəstəkləyir. Çünki bunun üçün ciddi əsaslar mövcuddur.
İcra katibi deyib ki, Prezident İlham Əliyevin rəhbərliyi ilə Azərbaycan son 10 ildə böyük inkişaf yolu keçib. Bütün vətəndaşların ölkəmizin inkişafının canlı şahidləri olduğunu deyən Əli Əhmədov qeyd edib ki, əhalinin rifahının yüksəlməsi, iqtisadiyyatın sürətli inkişafı, Azərbaycanın modernləşmə xəttinin uğurla həyata keçirilməsi, ölkəmizin simasının dəyişdirilməsi, mənəvi sahədə olan yüksəlişlər, dövlətimizin dünya birliyində mövqeyinin möhkəmlənməsi, regionda lider dövlətə çevrilməsi və digər amillərin hamısı kompleks şəkildə Prezident İlham Əliyevin həyata keçirdiyi siyasətin nailiyyətləridir. “Beləliklə də, əzəmətli və möhtəşəm inkişaf mənzərəsi gözümüzün qarşısında canlanır. 2013-cü ilin prezident seçkiləri ərəfəsində Azərbaycanın ictimai-siyasi, iqtisadi, mənəvi həyatının başlıca mənzərəsi bu göstəricilərdən ibarətdir. Təbii ki, bu, Azərbaycanın inkişafının davamlı olmasından xəbər verir. Yüksək inkişaf və bu inkişafın etibarlı zəmin əsasında Prezident İlham Əliyevin rəhbərliyi ilə davam edəcəyi inamı Azərbaycanın hər bir vətəndaşında formalaşıb. Bu ümumi mənzərə seçkilər dövründə Azərbaycan vətəndaşlarının əhval-ruhiyəsini müəyyənləşdirib. Bu mənada növbəti seçkilərdə cənab İlham Əliyevin namizədliyinin irəli sürülməsi və qələbəsi xalqımızın arzu və istəklərinin ifadəsidir. İnsanlar indiyədək qazanılan uğurlarla yanaşı, qarşıdakı illərdə də nailiyyətlərin davam etməsini arzulayır və bunu Prezident İlham Əliyevin həyata keçirdiyi siyasətdə görürlər” - deyə, YAP Sədrinin müavini vurğulayıb.
Əli Əhmədov bildirib ki, Yeni Azərbaycan Partiyası olaraq bizim üzərimizə çox ciddi və məsuliyyətli vəzifələr düşür. Onun sözlərinə görə, xüsusilə YAP-ın şəhər və rayon təşkilatlarının fəallarında da bu məsuliyyətdə payı var.
YAP Sədrinin müavini qarşıdan gələn prezident seçkilərinə hazırlıqla əlaqədar görüləcək işlər və partiya fəallarının vəzifələri ilə bağlı müvafiq tövsiyələr verib.
Tədbirdə partiya veteranı Ramiz Kərimov və gənc fəal Ceyhun Atayev çıxış ediblər.
Sonda YAP sıralarına yeni qoşulmuş şəxslərə partiya vəsiqələri təqdim olunub.
Görüşdə YAP İcra katibinin müavini, Milli Məclisin deputatı Mübariz Qurbanlı və Mingəçevir şəhər İcra Hakimiyyətinin başçısı Niyazi Bayramov iştirak edib.

Paylaş:

Baxılıb: 1254 dəfə