YAP Xəzər rayon təşkilatının təsis edilməsinin 32-ci ildönümü münasibətilə tədbir keçirildi

Bakı:

11 °C

87 %

7 m/s

AZ RU EN

Ana səhifə / YAP xəbərləri / YAP Xəzər rayon təşkilatının təsis edilməsinin 32-ci ildönümü münasibətilə tədbir keçirildi

YAP Xəzər rayon təşkilatının təsis edilməsinin 32-ci ildönümü münasibətilə tədbir keçirildi

17.07.2025 [22:42]

Xəzər rayonunda YAP Xəzər rayon təşkilatı və Xəzər rayon İcra Hakimiyyətinin birgə təşkilatçılığı ilə Yeni Azərbaycan Partiyasının (YAP) Xəzər rayon təşkilatının təsis edilməsinin 32-ci ildönümü münasibətilə tədbir keçirilib.

Tədbirdə əvvəlcə Dövlət Himni səsləndirilib, Ulu Öndər Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan YAP Xəzər təşkilatının sədri Namiq Əhmədov bildirib ki, ölkəmizin müstəqilliyini yenicə bərpa etdiyi, mürəkkəb ictimai-siyasi proseslərin cərəyan etdiyi bir dövrdə Yeni Azərbaycan Partiyasının yaradılması xalqın sabitlik, inkişaf və milli həmrəylik arzularının təcəssümü idi. Bu mühüm addımın davamı olaraq, 1993-cü ilin iyul ayında YAP Xəzər rayon təşkilatının təsis konfransı keçirilmiş və bununla da təşkilat rəsmi olaraq fəaliyyətə başlamışdır. 32 il ərzində YAP Xəzər rayon təşkilatı öz ətrafında 8 minə yaxın üzvü birləşdirərək rayonun ictimai-siyasi həyatında fəal mövqe nümayiş etdirmiş, ölkədə həyata keçirilən siyasi kursun rayon səviyyəsində dəstəklənməsi və təşviqi istiqamətində mühüm rol oynamışdır. Hazırda təşkilatın tərkibində 85 ərazi partiya təşkilatı fəaliyyət göstərir. Bu strukturlar rayonun bütün yaşayış sahələrini və əhalinin müxtəlif təbəqələrini əhatə edir. Bu, həm təşkilatın geniş sosial bazaya malik olduğunu, həm də partiyanın cəmiyyətdəki nüfuzunun yüksək səviyyədə olduğunu göstərir.

Daha sonra Xəzər Rayon İcra Hakimiyyətinin başçısı Elşən Salahov çıxış edərək bildirib ki, 32 il ərzində YAP Xəzər rayon təşkilatı müxtəlif ictimai təşəbbüslərin reallaşdırılmasında, gənclərin və qadınların fəallığının artırılmasında, şəhid ailələri və qazilərlə bağlı sosial layihələrdə, ətraf mühitin mühafizəsi və vətəndaş cəmiyyətinin inkişafı kimi sahələrdə də mühüm işlər görmüşdür. YAP Xəzər rayon təşkilatı eyni zamanda, partiya ideologiyasının – Ümummilli lider Heydər Əliyevin siyasi irsinin və Prezident cənab İlham Əliyevin həyata keçirdiyi uğurlu islahatların təbliği istiqamətində də ardıcıl və sistemli fəaliyyət göstərir.

Çıxış edən YAP İdarə Heyətinin üzvü, Milli Məclisinin deputatı, Əmək və sosial siyasət komitəsinin sədri Musa Quliyev bildirib ki, Ümummilli Lider Heydər Əliyevin müdrik ideyaları, siyasi iradəsi və uzaqgörən qərarları nəticəsində formalaşan Yeni Azərbaycan Partiyası bu günə qədər şərəfli və zəngin bir inkişaf yolu keçmişdir. Ölkəmizin ən güclü və təşkilatlanmış siyasi qüvvəsi kimi tanınan YAP öz fəaliyyətində daim milli maraqları prioritet hesab edərək, dövlətçilik ənənələrinin qorunmasına və möhkəmləndirilməsinə töhfə verir. Bu gün həmin milli maraqlar Prezident, Müzəffər Ali Baş Komandan İlham Əliyevin rəhbərliyi ilə ən yüksək səviyyədə təmin olunur. Azərbaycanın əldə etdiyi möhtəşəm nailiyyətlər və mühüm uğurlar, dövlət başçısının dəqiq planlaşdırılmış və mərhələli şəkildə həyata keçirdiyi strateji addımların, eləcə də onun hərbi-siyasi uzaqgörənliyinin real nəticəsidir.

Çıxış edən partiya fəalı, 156 nömrəli tam orta məktəbin direktoru Gülər İsmayılova bildirib ki, 32 illik bu yol təkcə təşkilatın tarixi deyil, bu həm də Xəzər rayonunun sosial-siyasi inkişaf salnaməsinin ayrılmaz hissəsidir. Qarşıda duran məqsəd və vəzifələr isə daha genişmiqyaslıdır. Əminik ki, YAP Xəzər rayon təşkilatı gələcəkdə də milli maraqlara xidmət edən siyasi xəttə sadiqliyini nümayiş etdirəcək, xalqla birgə addımlayaraq yeni uğurlara imza atacaqdır.

Sonda partiya sıralarına yeni qoşulan şəxslərə üzvlük vəsiqələri və rayonun ictimai-siyasi həyatında fəal iştirak edən bir qrup şəxsə fəxri fərman təqdim olunub.

Tədbir Yeni Azərbaycan Partiyasının himni səsləndirilməsi ilə yekunlaşıb.

Paylaş:

Baxılıb: 425 dəfə