Laçın: Azadlıqdan inkişafa gedən yol

Bakı:

23 °C

56 %

10 m/s

Əlaqə

AZ RU EN

Ana səhifə / YAP xəbərləri / Laçın: Azadlıqdan inkişafa gedən yol

Laçın: Azadlıqdan inkişafa gedən yol

25.08.2025 [11:05]

Azərbaycanın Vətən müharibəsində əldə etdiyi tarixi Qələbə nəticəsində 2020-ci ilin 1 dekabr tarixində Laçın rayonu ölkəmizə geri təhvil verildi. 2022-ci ilin avqustun 26-da isə Laçın şəhəri, Zabux və Sus kəndləri nəzarətə götürüldü. Tarixi Qələbə günlərinin əbədiləşdirilməsi məqsədilə Ölkə Prezidenti cənab İlham Əliyev 2023-cü ilin 31 iyulunda Azərbaycan Respublikasının işğaldan azad edilmiş əraziləri üzrə şəhər günlərinin təsis edilməsi barədə Sərəncam imzalayıb. Həmin Sərəncama əsasən 26 avqust Laçın şəhəri günü kimi müəyyən olub.

Bu gün Azərbaycan işğaldan azad etdiyi bölgələrdə, o cümlədən Laçında həyatı sürətlə canlandırır. Hazırda bütün dünyanın diqqət və maraqla izlədiyi “Böyük Qayıdış” proqramının icrası ölkəmizdə əsas prioritet kimi müəyyən edilib. Uzun illər boyunca yurd həsrətilə, məcburi köçkün həyatı yaşamış həmvətənlərimizin öz doğma el-obalarına qovuşmaları üçün bu gün işğaldan azad edilmiş ərazilərimizdə yeni infrasrukturun qurulması, evlərin tikilməsi, yolların və digər kommunikasiya sistemlərinin yaradılması istiqamətində vüsətli iş aparılır.

Laçının baş plan layihəsində təbii yaşıllıqlarla əhatələnmiş şəhərin tarixən mövcud olmuş təxminən 258 hektar məskunlaşma ərazisində həyətyanı sahəsi olan fərdi evlərə üstünlük verilib. Bununla yanaşı, çoxfunksiyalı zonalarda və digər yaşayış ərazilərində çoxmənzilli binaların tikilməsi təklif edilir. Şəhərdə xəstəxana, İşğal və Zəfər muzeylərinin yerləşəcəyi Memorial Park, məktəbəqədər və tam orta təhsil müəssisələri, peşə məktəbi, həmçinin mədəniyyət və turizm obyektləri də yaradılacaq. Planlaşdırmada tətbiq edilmiş “15 dəqiqəlik şəhər” prinsipi isə yaşayış məhəllələrinin, gündəlik tələbat obyektlərinin yaxın məsafədə olmasını və aşağı sürətli yol infrastrukturunun təşkilini nəzərdə tutaraq sakinlərin və qonaqların şəhər daxilində rahat hərəkətini təmin edəcək.

Təməli 2021-ci ildə qoyulan Laçın Beynəlxalq Hava Limanı artıq istifadəyə verilib. Hava limanı Qorçu kəndi yaxınlığında dəniz səviyyəsindən 1800 metr hündürlükdə inşa edilib və postsovet məkanında ən yüksək dağlıq ərazidə yerləşən hava limanlarından biridir. Hava limanının uçuş-enmə zolağının uzunluğu 3 min metr, eni isə 60 metrdir. Aeroportun beynəlxalq standartlara uyğun layihələndirilən terminal binasının sahəsi 5 min kvadratmetrdir və saatda 200 sərnişinə xidmət etmək imkanına malikdir. Hava limanı Laçın şəhərinə 30, Şuşaya 70, Kəlbəcərə 60 kilometrlik məsafədə yerləşir. Bu hava limanı strateji təyinatı ilə yanaşı, regionun turizm potensialının inkişafına da gözəl imkanlar yaradır. Birmənlı olaraq deyə bilərik ki, işğaldan azad olunduqdan sonra qısa zamanda bərpa edilən Laçında bu gün çox mühüm sosial-infrastruktur layihələri uğurla həyata keçirilməkdədir.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 320 dəfə