44 günlük Vətən müharibəsi xalqımızın şanlı tarixidir

Bakı:

19 °C

72 %

7 m/s

Əlaqə

AZ RU EN

Ana səhifə / YAP xəbərləri / 44 günlük Vətən müharibəsi xalqımızın şanlı tarixidir

44 günlük Vətən müharibəsi xalqımızın şanlı tarixidir

27.09.2025 [11:13]

Əli Paşayev,

YAP Tərtər rayon təşkilatının məsləhətçisi

Ölkəmizin ərazi bütövlüyünün pozulması və Ermənistanın işğalçı siyasətinin dünyada tanıdılması istiqamətində uğurlu diplomatik iş aparan Müzəffər Ali Baş Komandan, Möhtərəm Prezidentimiz cənab İlham Əliyev 2020-ci il 27 sentyabr tarixində əks hücum əməliyyatı ilə başlayan 44 günlük Vətən müharibəsində tarixi nailiyyətə imza atdı. Müzəffər ordumuz düşmənin torpaqlarımızdan qovulmasında müstəsna xidmətlər göstərdi, əzmlə, cəsarətlə zəfər yürüşünü son nəticəyə qədər davam etdirdi. Vətən müharibəsinin rəmzinə çevrilən “Dəmir yumruq” Azərbaycan xalqının və ordumuzun gücü ilə yanaşı, birliyimizin təqdimatı oldu. Müzəffər Ali Baş Komandan İlham Əliyevin son illər səsləndirdiyi bəyanatlar sırasında “Dəmir yumruq yerindədir” xüsusi yer tutur. Bu, işğalçı Ermənistanda baş qaldırmaq istəyən revanşist qüvvələrə ünvanlanan mesajdır.

44 günün hər günündə Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, bu işğala son qoyulsun, bu haqsızlığa son qoyulsun, tarixi ədalət zəfər çalsın. Düşməni döyüş meydanında məhv edərək Rəşadətli Azərbaycan Ordusu bunu bacara bildi. Bu vətən müharibəsi düşmənin kapitulyasiyası ilə nəticələndi. Bununla da Vətən müharibəsi başa çatdı. Azərbaycan bu döyüşdə parlaq qələbə qazandı, işğal altındakı torpaqlarımız yağılardan təmizləndi.

44 günlük Vətən müharibəsində ölkəmizin ərazi bütövlüyünün təmin edilməsi, haqq və ədalətin bərpası naminə Azərbaycanda əsrlər boyu sülh və əmin-amanlıq şəraitində yaşayan müxtəlif millətlərin və dinlərin təmsilçiləri iştirak ediblər. Qarabağ müharibəsi Azərbaycan cəmiyyətinin fərqli dini və etnik-milli mənsubiyyətinə baxmayaraq həmrəy olduğunu bir daha nümayiş etdirdi. Ali Baş Komandan İlham Əliyevin rəhbərliyi ilə Azərbaycan Ordusu İkinci Qarabağ müharibəsində bizə zəfər sevincini yaşatdı və Azərbaycanın qürur tarixini yazdı.

Azərbaycan Ordusu Vətən müharibəsində misilsiz şücaətlər göstərdi, torpaqlarımızın müdafiəsi uğrunda örnək olacaq mübarizə apardı. Bunun nəticəsində Azərbaycan xalqı 30 il ərzində işğala məruz qalan doğma yurdlarına qovuşdu. Bu qələbə heç də təkcə 44 günlük müharibənin nəticəsi deyil. Son 17 ildə aparılan uğurlu daxili və xarici siyasət, iqtisadiyyatımızın daha da gücləndirilməsi, qazanılan beynəlxalq nüfuz, gənclərimizin vətənpərvər ruhda tərbiyəsi, Vətənə canla-qanla bağlılıq, milli-mənəvi dəyərlərə hörmət hisslərinin təbliğ edilməsi kimi mühüm addımlar möhtəşəm zəfərimizi şərtləndirdi. Biz 44 gündə tarix dərsliklərinə düşəcək ədalətli müharibə nümunəsi ortaya qoyduq.

Müzəffər Ali Baş Komandan İlham Əliyevin rəhbərliyi ilə düşmən üzərində tarixi qələbə qazanan Azərbaycan BMT-nin 30 ilə yaxın müddət ərzində kağız üzərində qalmış qətnamələrinin icrasını özü təmin etdi. Bu, müsbət nümunə olmaqla yanaşı, dünya siyasi tarixində bir ilk idi.

Azərbaycan dünyada tarix yazır və bu gün də tarixi nailiyyətlərə imza atır. Əminliklə söyləyə bilərik ki, Azərbaycan bundan sonra da Prezident, Müzəffər Ali Baş Komandan cənab İlham Əliyevin rəhbərliyi ilə yeni qələbələr qazanacaq, üçrəngli bayrağımız Zəfər zirvəsində daim dalğalanacaqdır.

44 günlük Vətən müharibəsindən 5 il ötür. 5 il də hər bir kəs Şəhid analarına, yoldaşlarına, bacılarına, övladlarına təsəlli olmağa çalışdı. Qazilərimizin yaralarına məlhəm olmağa, onlara mənəvi dəstək olmağa can atdıq. Vətən müharibəsi Azərbaycan xalqının şanlı tarixidir. Qəhrəman Azərbaycan xalqı şəhidlərini heç vaxt unutmayacaq. Onlar bizim qəlbimizdə daim yaşayacaq.

Allah bütün Şəhidlərimizə rəhmət eləsin, Qazilərimizə şəfa versin!

Paylaş:

Baxılıb: 444 dəfə