Elmimizin 80 illik şərəfli yolu

Bakı:

20 °C

52 %

2 m/s

Əlaqə

AZ RU EN

Ana səhifə / YAP xəbərləri / Elmimizin 80 illik şərəfli yolu

Elmimizin 80 illik şərəfli yolu

05.11.2025 [17:30]

3 noyabr 2025-ci il tarixində Azərbaycan Milli Elmlər Akademiyasının (AMEA) 80 illik yubileyi münasibətilə keçirilən təntənəli mərasimdə Prezident İlham Əliyev iştirak edib. Dövlət başçısı mərasimdə çıxış edərək ölkəmizdə elmin gələcək inkişaf istiqamətlərini müəyyənləşdirən mühüm fikirlər və vacib mesajlar səsləndirib.

Dövlət başçısı çıxışında qeyd edib ki, Azərbaycan elminin keçdiyi 80 illik yol həm tarix, həm də milli kimliyimizin inkişaf salnaməsidir. Prezident vurğulayıb ki, AMEA müxtəlif dövrlərdə çətin mərhələlərdən keçsə də, öz elmi potensialını qoruyub və ölkənin intellektual inkişafında mühüm rol oynayıb.

“Akademiya uzun və şərəfli yol qət etmiş, Azərbaycan elminin əsas dayağına çevrilmişdir”, – deyə Prezident İlham Əliyev çıxışında qeyd edib.

Dövlət başçısı çıxışında Ulu Öndər Heydər Əliyevin elmin inkişafı istiqamətində gördüyü tarixi işlərə xüsusi diqqət yetirib. 1970–ci illərdə Azərbaycanda yeni tədqiqat institutlarının yaradılması, elmi infrastrukturun formalaşdırılması və alimlərə göstərilən qayğının bugünkü nailiyyətlərin təməlini qoyduğunu vurğulayıb.

Prezident qeyd edib ki, bu siyasət bu gün də uğurla davam etdirilir və müasir mərhələdə elmin inkişafı dövlətin prioritet istiqamətlərindən biridir.

Prezident İlham Əliyev bildirib ki, son illərdə elmə ayrılan maliyyə vəsaitləri əhəmiyyətli dərəcədə artırılıb, elmi müəssisələrin maddi-texniki bazası gücləndirilib. AMEA-nın binalarının yenilənməsi, kitabxana və Milli Ensiklopediya binasının istifadəyə verilməsi dövlətin elmə qayğısının bariz nümunəsidir.

“Son on ildə Azərbaycanda elmə ayrılan vəsait iki dəfədən çox artmışdır. Bu, elmi fəaliyyətin nəticəliliyinə və beynəlxalq səviyyədə rəqabət qabiliyyətinə ciddi təkan verib”, – deyə Prezident vurğulayıb.

Prezident İlham Əliyev çıxışında milli dəyərlərin, xüsusən də Azərbaycan dilinin qorunmasının elmin inkişafı ilə sıx bağlı olduğunu qeyd edib:

“Bizim dilimiz çox zəngindir, qədimdir. Əcnəbi sözlərə ehtiyac yoxdur. Azərbaycan dilinin saflığını qorumaq hər bir ziyalının borcudur.”

Bu fikirlər, dövlət başçısının elmi və mədəni sahələri bir-birindən ayrılmaz hesab etdiyini bir daha göstərdi.

Dövlət başçısı çıxışında vurğulayıb ki, müasir dövrdə elm təkcə klassik tədqiqatlarla məhdudlaşmamalı, innovasiya, texnologiya və süni intellekt sahələrində aparıcı rol oynamalıdır. Azərbaycanın gənc alimləri qlobal elmi proseslərdə fəal iştirak etməli, milli maraqlara xidmət edən layihələr həyata keçirməlidirlər.

“Azərbaycan artıq tam suveren dövlətdir. İndi biz öz torpaqlarımızda qurur, yaradır və gələcəyə baxırıq. Elm bu quruculuğun əsas sütunlarından biri olmalıdır”, – deyə Prezident İlham Əliyev bildirib.

Fidan Hüseynova

YAP Quba rayon təşkilatının sədri

Paylaş:

Baxılıb: 566 dəfə