Ağdam inkişaf və ümüd şəhəri kimi yeni dövrə qədəm qoyub

Bakı:

13 °C

76 %

14 m/s

Əlaqə

AZ RU EN

Ana səhifə / YAP xəbərləri / Ağdam inkişaf və ümüd şəhəri kimi yeni dövrə qədəm qoyub

Ağdam inkişaf və ümüd şəhəri kimi yeni dövrə qədəm qoyub

19.11.2025 [16:00]

20 Noyabr Azərbaycan tarixində xüsusi məna daşıyan günlərdən biridir. Bu tarix Ağdam şəhərinin işğaldan azad edilməsinin rəmzi olaraq qeyd olunur və Qarabağın dirçəliş salnaməsində mühüm mərhələ kimi yadda qalır.

Ağdam uzun illər boyu Azərbaycanın ən mühüm mədəni, iqtisadi və sosial mərkəzlərindən biri olub. Lakin 1993-cü ildə Ermənistan tərəfindən işğal edilməsi nəticəsində şəhər viran edilmiş, “Qafqazın Xirosiması” adlandırılacaq dərəcədə dağıntılara məruz qalmışdır. Bu amansızlıq təkcə maddi irsin deyil, həm də mənəvi dəyərlərin məhv edilməsi demək idi.

2020-ci il 10 noyabr üçtərəfli Bəyanatına əsasən Ağdam rayonunun işğaldan azad edilməsi Azərbaycanın tarixi ədalətinin bərpası baxımından dönüş nöqtəsi oldu. 20 noyabrda Azərbaycan Ordusu Ağdama daxil olaraq şəhərdə üçrəngli bayrağımızı dalğalandırdı. Həmin günün Ağdam Şəhəri Günü kimi qeyd olunması təkcə qələbənin deyil, həm də yenidənqurma, inkişaf və gələcəyə inamın rəmzi kimi yaddaşlara həkk edildi.

Ağdamın işğaldan azad olunması Azərbaycan Respublikasının Prezidenti cənab İlham Əliyevin qətiyyətli siyasətinin, diplomatik çevikliyinin və güclü liderliyinin birbaşa nəticəsi oldu. 2020-ci ildə Ali Baş Komandan kimi ordunun hərbi uğurlarını siyasi masada da möhkəmləndirərək imzaladığı 10 noyabr Bəyanatı ilə Ağdam rayonunun bir güllə atmadan geri qaytarılmasına nail oldu. Cənab Prezident dəfələrlə vurğulayıb ki, bu nəticə həm ordumuzun qüdrətinə, həm də Azərbaycanın haqq səsinin beynəlxalq müstəvidə qətiyyətlə müdafiə olunmasına əsaslanır. Məhz bu siyasi iradə Ağdamın azadlığına gedən yolu açdı və onun sonrakı dirçəlişinin təməlini qoydu.

Bu gün Ağdam böyük bir bərpa və quruculuq mərhələsinə qədəm qoyub. Azərbaycan dövləti tərəfindən şəhərin Baş planı hazırlanmış, genişmiqyaslı infrastruktur layihələrinə start verilmiş, yollar, elektrik, su və kommunikasiya xətləri çəkilir. Keçmiş köçkünlərin doğma yurdlarına qayıtması üçün yeni yaşayış massivləri salınır. Şəhərin mədəni simvolu olan Ağdam Çörək Muzeyi, Dram Teatrı, İmarət kompleksi kimi abidələrin bərpası da planlaşdırılır. Bütün bunlar Ağdamın təkcə fiziki olaraq dirçəldilməsini deyil, həm də onun tarixi kimliyinin və ruhunun yenidən canlandırılmasını göstərir.

20 Noyabr həm də şəhidlərimizin və qazilərimizin əziz xatirəsinin anıldığı gündür. Azərbaycan xalqı Ağdamın azadlığı uğrunda canını fəda edən qəhrəman övladlarını böyük ehtiramla yad edir. Bu günün qeyd olunması gənc nəslə də Qarabağın əhəmiyyətini, torpaq sevgisini və vətənə bağlılığı aşılayır.

Bu tarixi gün Ağdamın artıq viranlıq simvolu deyil, dirçəliş, inkişaf və ümid şəhəri kimi yeni bir dövrə qədəm qoyduğunu təsdiqləyir. 20 Noyabr – Ağdam Şəhəri Günü bu dirçəlişin bayramıdır və Azərbaycanın tarixində yeni parlaq səhifənin başlanğıcını ifadə edir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 368 dəfə