Ağdam bu gün yenidən dirçəlir

Bakı:

12 °C

76 %

5 m/s

Əlaqə

AZ RU EN

Ana səhifə / YAP xəbərləri / Ağdam bu gün yenidən dirçəlir

Ağdam bu gün yenidən dirçəlir

20.11.2025 [16:06]

20 Noyabr – Ağdam Şəhəri Günü Azərbaycan üçün milli qürur və Böyük Qayıdış prosesinin rəmzi kimi qeyd olunur. Bu tarix 2020-ci il Vətən müharibəsində əldə edilmiş Qələbə nəticəsində Ağdam rayonunun işğaldan azad edilməsini və şəhərin yeni inkişaf mərhələsinə başlamasını ifadə edir. 27 il işğal altında qalmış, tamamilə dağıdılmış Ağdamın yenidən dirçəlişi bu gün dövlət siyasətinin prioritet istiqamətlərindən birini təşkil edir. Ağdamın Azərbaycana qaytarılması Prezident İlham Əliyevin siyasi iradəsinin, hərbi-siyasi qətiyyətinin və diplomatik uğurlarının nəticəsi olaraq mümkün olub. Şəhərin döyüşsüz təhvil verilməsi minlərlə insanın həyatının xilas olunmasına səbəb olmaqla yanaşı, bölgədə yeni quruculuq dövrünün başlanmasına şərait yaradıb.

Ağdam azad edildikdən dərhal sonra Prezident İlham Əliyevin bölgəyə etdiyi ilk səfər strateji mesaj daşıyırdı. Dövlət başçısı bildirdi ki, Ağdam müasir konsepsiya əsasında yenidən qurulacaq və Qarabağ regionunun inkişaf mərkəzlərindən birinə çevriləcək. Sonrakı illərdə Prezident və Birinci xanım Mehriban Əliyevanın Ağdama çoxsaylı səfərləri burada aparılan genişmiqyaslı yenidənqurma işlərinin ardıcıl şəkildə həyata keçirildiyini göstərir. Ağdam şəhərinin Baş planının təqdim olunması, müxtəlif sosial, mədəni və iqtisadi obyektlərin təməlinin qoyulması, eləcə də yeni infrastruktur layihələrinin başlanması bölgənin gələcək inkişafının əsasını təşkil edir.

Ağdamda yenidənqurma prosesinin mühüm istiqamətlərindən biri şəhərin “Ağıllı şəhər” və “Yaşıl enerji” prinsiplərinə uyğun olaraq qurulmasıdır. Şəhərdə müasir yol-nəqliyyat sistemi formalaşdırılır, yeni yaşayış məhəllələri salınır, kommunikasiya və enerji infrastrukturu tamamilə yenilənir. Eyni zamanda mədəniyyət və ictimai həyatı əhatə edən obyektlərin – Konqres Mərkəzinin, İşğal və Zəfər muzeylərinin, park və istirahət zonalarının inşası planlaşdırılmış və bir çoxunun təməli qoyulmuşdur. Ağdamın bu strukturlaşdırılmış şəkildə yenidən qurulması şəhərin gələcəkdə regionun ən müasir urbanistik mərkəzlərindən birinə çevrilməsini hədəfləyir.

Ağdam Sənaye Parkının yaradılması isə regionun iqtisadi dirçəlişinin əsas dayaqlarından biri sayılır. Burada müxtəlif istehsal müəssisələrinin fəaliyyətə başlaması üçün geniş şərait yaradılıb, sahibkarlar üçün investisiya imkanları təmin olunub və minlərlə yeni iş yerinin açılması nəzərdə tutulur. Bu, Ağdamın yalnız yaşayış məntəqəsi kimi deyil, həm də iqtisadi inkişaf nöqtəsi kimi formalaşmasına xidmət edir.

Böyük Qayıdış proqramı çərçivəsində Ağdama köç prosesinin başlanması rayonun bərpa tempinin bariz nümunəsidir. Artıq bir neçə kəndə ilk köç karvanları yola salınıb, sakinlərin rahat yaşayışı üçün bütün zəruri şərait yaradılıb. Bu proses tədricən genişləndirilərək minlərlə ailənin doğma yurduna qayıdışını təmin edəcək. Yeni tikilən evlər, təhlükəsiz infrastruktur, məktəblər, tibb müəssisələri və sosial obyektlər Ağdamın tam həyatına qovuşması üçün əsas baza yaradır.

20 Noyabr – Ağdam Şəhəri Günü Azərbaycan xalqı üçün həm tarixi ədalətin bərpası, həm də yeni inkişaf dövrünün başlanğıcını simvolizə edir. Bu gün işğal illərinin acı xatirələrini deyil, quruculuq ruhunu, dövlətimizin gücünü və xalqımızın birliyini təcəssüm etdirir. Ağdam bu gün Zəfərin nəticəsi olaraq yenidən dirçəlir, Qarabağın strateji mərkəzlərindən birinə çevrilir və yaxın illərdə tam şəkildə müasir, yaşıl və ağıllı şəhər modelinin nümunəsi olacaq.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 339 dəfə