“Konstitusiya və Suverenlik İli” – hüquqi dövlətçilik və humanizm prinsiplərinin təcəssümü

Bakı:

18 °C

77 %

7 m/s

Əlaqə

AZ RU EN

Ana səhifə / YAP xəbərləri / “Konstitusiya və Suverenlik İli” – hüquqi dövlətçilik və humanizm prinsiplərinin təcəssümü

“Konstitusiya və Suverenlik İli” – hüquqi dövlətçilik və humanizm prinsiplərinin təcəssümü

19.12.2025 [20:15]

Əli Paşayev

YAP Tərtər rayon təşkilatının məsləhətçisi

Azərbaycan Respublikasında 2025-ci ilin “Konstitusiya və Suverenlik İli” elan edilməsi dövlətçilik tariximizdə mühüm ictimai-siyasi hadisə olmaqla yanaşı, hüquqi dövlət quruculuğunun yeni mərhələyə qədəm qoyduğunu göstərir. Prezident İlham Əliyevin bu əlamətdar il çərçivəsində amnistiyanın elan edilməsi təşəbbüsü isə Azərbaycan dövlətinin humanizm, ədalət və sosial məsuliyyət prinsiplərinə sadiqliyinin növbəti parlaq nümunəsidir.

1995-ci ildə ümumxalq səsverməsi yolu ilə qəbul edilmiş Azərbaycan Respublikasının Konstitusiyası müstəqil dövlətimizin hüquqi-siyasi əsaslarını müəyyənləşdirmiş, insan hüquq və azadlıqlarının təminatını ali məqsəd kimi təsbit etmişdir. Ulu Öndər Heydər Əliyevin müəllifi olduğu bu Konstitusiya ölkədə demokratik idarəçilik, qanunun aliliyi və vətəndaş cəmiyyətinin inkişafı üçün möhkəm baza yaratmışdır.

Prezident İlham Əliyev tərəfindən həyata keçirilən ardıcıl islahatlar Konstitusiyanın ruhuna uyğun olaraq dövlət idarəçiliyinin təkmilləşdirilməsinə, hüquqi mexanizmlərin müasirləşdirilməsinə və vətəndaş rifahının yüksəldilməsinə xidmət edir.
“Konstitusiya və Suverenlik İli” anlayışı təkcə hüquqi sənədə deyil, həm də Azərbaycanın real siyasi və ərazi suverenliyinə əsaslanır. 2020-ci il Vətən müharibəsi və 2023-cü ildə həyata keçirilmiş antiterror tədbirləri nəticəsində ölkəmizin ərazi bütövlüyü və suverenliyi tam bərpa edilmiş, Konstitusiyanın bütün ərazidə tətbiqi təmin olunmuşdur.

Bu baxımdan amnistiya təşəbbüsü həm hüquqi, həm də mənəvi məna daşıyır. Bu addım qalib və güclü dövlətin öz vətəndaşlarına qarşı mərhəmətli və ədalətli münasibətinin göstəricisidir.
Prezident İlham Əliyevin təşəbbüsü ilə irəli sürülən amnistiya aktı Azərbaycan dövlətinin cəza siyasətində humanist yanaşmaya üstünlük verdiyini bir daha təsdiqləyir. Amnistiya yalnız cəzanın yüngülləşdirilməsi deyil, eyni zamanda cəmiyyətə reinteqrasiya, sosial adaptasiya və yeni həyat mərhələsinə keçid üçün fürsətdir.

Bu təşəbbüs ilk dəfə cinayət törətmiş şəxslərin islah olunmasına, ailələrin birliyinin bərpasına, sosial gərginliyin azalmasına, cəmiyyətə etimad mühitinin möhkəmlənməsinə xidmət edir. Eyni zamanda, amnistiya aktı hüquq-mühafizə və məhkəmə sistemində aparılan islahatların məntiqi davamı kimi çıxış edir.

Amnistiyanın elan edilməsi dövlətlə vətəndaş arasında qarşılıqlı etimadın möhkəmləndirilməsinə yönəlmiş strateji addımdır. Prezident İlham Əliyevin rəhbərliyi ilə həyata keçirilən sosial yönümlü siyasət göstərir ki, dövlət cəza mexanizmlərini təkcə məhdudlaşdırıcı vasitə kimi deyil, həm də tərbiyəvi və islah edici mexanizm kimi dəyərləndirir.

Bu yanaşma hüquqi dövlət anlayışının əsas tələblərindən biri olan ədalət və mərhəmət balansının qorunmasına xidmət edir.

“Konstitusiya və Suverenlik İli” çərçivəsində amnistiyanın elan edilməsi təşəbbüsü Azərbaycan dövlətçiliyinin gücünü, hüquqi sistemin yetkinliyini və milli birliyin möhkəmliyini nümayiş etdirir. Bu addım bir daha sübut edir ki, Prezident İlham Əliyevin rəhbərliyi altında Azərbaycan güclü, suveren və eyni zamanda humanist bir dövlətdir.

Amnistiya aktı təkcə hüquqi sənəd deyil, həm də cəmiyyətə verilən mühüm mesajdır: qanunun aliliyi ilə yanaşı, insan amili hər zaman dövlət siyasətinin mərkəzindədir.

Paylaş:

Baxılıb: 464 dəfə