Azərbaycan jurnalistikası milli düşüncənin və dövlətçiliyin dayağı kimi

Bakı:

25 °C

66 %

10 m/s

Əlaqə

AZ RU EN

Ana səhifə / YAP xəbərləri / Azərbaycan jurnalistikası milli düşüncənin və dövlətçiliyin dayağı kimi

Azərbaycan jurnalistikası milli düşüncənin və dövlətçiliyin dayağı kimi

22.07.2026 [20:25]

Azərbaycan milli mətbuatının yaranması xalqımızın ictimai fikir tarixində yeni mərhələnin başlanğıcı olmuşdur. 1875-ci il iyulun 22-də Həsən bəy Zərdabinin nəşr etdirdiyi "Əkinçi" qəzeti yalnız ilk milli qəzet deyil, həm də cəmiyyətin maariflənməsi, milli özünüdərkin formalaşması və ictimai şüurun inkişafı istiqamətində mühüm bir məktəb idi. Məhz bu tarixdən etibarən Azərbaycan mətbuatı xalqın səsini ifadə edən, cəmiyyətin inkişafına xidmət göstərən mühüm təsisat kimi formalaşmağa başladı.
Azərbaycan mətbuatı keçdiyi 151 illik inkişaf yolu ərzində müxtəlif tarixi sınaqlarla üzləşmiş, lakin milli maraqlara sadiqliyini qoruyaraq öz missiyasını davam etdirmişdir. Çar Rusiyası dövrünün senzurası, sovet ideoloji sistemi və müstəqilliyin ilk illərində yaşanan mürəkkəb ictimai-siyasi proseslər jurnalistikanın fəaliyyətinə ciddi təsir göstərsə də, milli mətbuat hər zaman cəmiyyətin inkişafında mühüm rol oynamağı bacarmışdır.
Müstəqil Azərbaycanın inkişafı ilə milli mətbuatın yeni mərhələsi başlamışdır. Ümummilli Lider Heydər Əliyevin hakimiyyətə qayıdışından sonra söz və mətbuat azadlığının təmin edilməsi istiqamətində ardıcıl islahatlar həyata keçirilmiş, 1998-ci ildə senzuranın ləğvi ölkəmizdə demokratik inkişafın mühüm göstəricilərindən biri olmuşdur. Bu qərar Azərbaycan jurnalistikasının sərbəst fəaliyyət imkanlarını genişləndirmiş, mətbuatın cəmiyyətdə rolunu daha da gücləndirmişdir.
Bu gün Prezident İlham Əliyevin rəhbərliyi ilə informasiya siyasətinin müasir çağırışlara uyğun inkişaf etdirilməsi, media sahəsində institusional islahatların aparılması, jurnalistlərin sosial müdafiəsinin gücləndirilməsi və peşəkarlığın artırılması istiqamətində mühüm addımlar atılır. Medianın İnkişafı Agentliyinin yaradılması, "Media haqqında" Qanunun qəbul edilməsi, rəqəmsal media mühitinin formalaşdırılması və informasiya təhlükəsizliyinin möhkəmləndirilməsi ölkədə sağlam media mühitinin inkişafına xidmət edən mühüm təşəbbüslərdəndir.
Rəqəmsallaşma dövründə jurnalistikanın qarşısında yeni vəzifələr dayanır. İnformasiyanın saniyələr ərzində yayıldığı bir zamanda operativlik qədər dəqiqlik, obyektivlik və peşə etikası əsas prinsip olaraq qalır. Dezinformasiyanın, saxta xəbərlərin və informasiya manipulyasiyalarının artdığı müasir dövrdə jurnalistin məsuliyyəti daha da yüksəlmişdir. Cəmiyyətin düzgün məlumatlandırılması, faktlara əsaslanan xəbərlərin hazırlanması və milli maraqların qorunması peşəkar jurnalistikanın əsas missiyalarından biridir.
Xüsusilə 44 günlük Vətən müharibəsi və ondan sonrakı dövrdə Azərbaycan mediası informasiya cəbhəsində də mühüm fəaliyyət göstərdi. Yerli jurnalistlər dünya ictimaiyyətinə həqiqətlərin çatdırılmasında, Ermənistanın yaydığı dezinformasiyaların ifşa edilməsində və Azərbaycanın haqq səsinin beynəlxalq auditoriyaya çatdırılmasında böyük əzm nümayiş etdirdilər. Bu dövr bir daha göstərdi ki, güclü dövlət yalnız güclü ordu ilə deyil, eyni zamanda güclü informasiya siyasəti və peşəkar media ilə də xarakterizə olunur.
Müasir Azərbaycan jurnalistikası artıq yalnız xəbərin ötürücüsü deyil, həm də ictimai rəyin formalaşmasına, vətəndaş cəmiyyətinin inkişafına, milli-mənəvi dəyərlərin təbliğinə və dövlətçilik ideologiyasının möhkəmlənməsinə töhfə verən mühüm sosial institutdur. Bununla yanaşı, jurnalist peşəsinin nüfuzu yalnız hüquqlarla deyil, həm də yüksək məsuliyyət, peşə etikası, obyektivlik və vicdanlı fəaliyyətlə ölçülür.
Milli Mətbuat Günü təkcə jurnalistlərin peşə bayramı deyil, həm də Azərbaycan mətbuatının keçdiyi şərəfli yolun, qazandığı nailiyyətlərin və qarşıda duran hədəflərin qiymətləndirilməsi üçün mühüm fürsətdir. Milli maraqları hər şeydən üstün tutan, cəmiyyətə doğru və operativ informasiya təqdim edən, peşə etikası prinsiplərinə sadiq qalan jurnalistika ölkənin demokratik inkişafına və dövlətçilik ənənələrinin möhkəmlənməsinə bundan sonra da mühüm töhfələr verəcəkdir.
Bu gün Azərbaycan milli mətbuatı zəngin tarixi irsini qorumaqla yanaşı, müasir informasiya texnologiyalarının yaratdığı imkanlardan səmərəli istifadə edərək yeni inkişaf mərhələsinə qədəm qoymuşdur. Peşəkar, məsuliyyətli və vətənpərvər jurnalistika cəmiyyətin etimadını qorumağın, dövlətin informasiya təhlükəsizliyini təmin etməyin və milli maraqları müdafiə etməyin ən vacib vasitələrindən biri olaraq öz strateji əhəmiyyətini bundan sonra da saxlayacaqdır.

Teymurşah İşıqov

YAP Xaçmaz rayon təşkilatının əməkdaşı

Paylaş:

Baxılıb: 118 dəfə