İnkişaf, tarixi varislik və yeni qlobal reallıqlar

Bakı:

30 °C

45 %

5 m/s

Əlaqə

AZ RU EN

Ana səhifə / YAP xəbərləri / İnkişaf, tarixi varislik və yeni qlobal reallıqlar

İnkişaf, tarixi varislik və yeni qlobal reallıqlar

13.08.2026 [16:17]

Azərbaycan Respublikasının Prezidenti İlham Əliyevin Naxçıvan Muxtar Respublikasına avqustun 11-də reallaşan səfəri və Azərbaycan Televiziyasına verdiyi müsahibə ölkəmizin müasir dövlətçilik salnaməsində, regional təhlükəsizlik və hərtərəfli inkişaf strategiyasında müstəsna yer tutan tarixi bir hadisədir. Bu səfər çərçivəsində dövlət başçısının təqdim etdiyi proqram xarakterli tezislər yalnız Naxçıvanın mövcud sosial-iqtisadi mənzərəsini deyil, eyni zamanda ümummilli lider Heydər Əliyevin dövlətçilik irsinə loyallığı, regionun təhlükəsizlik arxitekturasını, yaşıl enerji keçidini və qlobal logistik rolunu tam əhatə edir. Naxçıvanın müasir dirçəlişi, 1990-cı illərin başında blokada şəraitində məhv olmaq təhlükəsi ilə üz-üzə qaldığı zaman Ulu Öndər Heydər Əliyevin göstərdiyi misilsiz fədakarlıq və qəbul etdiyi cəsarətli siyasi qərarlarla sıx bağlıdır. Bu gün Prezident İlham Əliyev tərəfindən uğurla davam etdirilən bu strateji xətt muxtar respublikanı regionun ən təhlükəsiz və dinamik inkişaf edən guşələrindən birinə çevirmişdir.
Müsahibədə xüsusi vurğulandığı kimi, istənilən tərəqqinin təməlində fiziki və strateji təhlükəsizlik dayanır. Bu baxımdan Naxçıvanda Əlahiddə Ümumqoşun Ordunun müdafiə qabiliyyətinin, yeni komando hərbi hissələrinin və müasir hərbi texnika təchizatının ən yüksək səviyyəyə çatdırılması bölgədəki sabitliyin əsas zəmanətidir. Eyni zamanda, Naxçıvanın enerji müstəqilliyi və "Yaşıl Enerji Zonası"na çevrilməsi istiqamətində atılan nəhəng addımlar – yeni Günəş, su və istilik elektrik stansiyalarının inşası, istehsal olunacaq bərpaolunan energiyanın Türkiyə, İran və Avropa bazarlarına ixracı hədəfləri – regionun geoiqtisadi çəkisini qat-qat artırır. Sənayeləşmə sahəsində təməli qoyulan və Sumqayıtdan sonra ölkənin ikinci böyük sənaye parkı olacaq Naxçıvan Sənaye Parkı, 2044-cü ilədək nəzərdə tutulan modern Baş Plan, yeni turizm və sosial infrastrukturlar, həmçinin ekoloji təmiz elektrik avtobuslarının xəttə buraxılması və Regional DOST Mərkəzinin açılışı əhalinin sosial rifahına xidmət edən vahid inkişaf modelinin göstəricisidir.
Dövlət başçısının bəyanatlarında mühüm yer tutan digər strateji istiqamət isə Naxçıvanın regional nəqliyyat qovşağına çevrilməsidir. 44 günlük Vətən müharibəsində qazanılmış Zəfərdən sonra gündəmə gələn Zəngəzur dəhlizi layihəsi, Culfa-Ordubad dəmir yolu xəttinin yenidən qurulması və alternasiyalı tranzit marşrutları Naxçıvanı sadəcə Azərbaycanın əsas hissəsi ilə deyil, bütün Türk dünyası və Avrasiya continentı ilə bağlayan mühüm arteriyaya çevirir. Bütün bu böyük quruculuq işlərinin milli kimlik, zəngin mədəni irs və Möminə xatun türbəsi kimi tarixi abidələrin bərpası ilə paralel aparılması dövlətin öz köklərinə söykənən modernləşmə xəttini nümayiş etdirir. Prezident İlham Əliyevin Naxçıvan səfəri və proqram xarakterli müsahibəsi bir daha göstərdi ki, Zəngəzur, Qarabağ və Naxçıvan vahid inkişaf konsepsiyası çərçivəsində sürətlə dirçəlir və müasir, qalib, qüdrətli Azərbaycanın parlaq gələcəyini təcəssüm etdirir.

YAP Tərtər rayon təşkilatının məsləhətçisi Səltənət Möhsünlü

Paylaş:

Baxılıb: 47 dəfə