YAP Nəsimi rayon təşkilatında Xocalı faciəsinin 22-ci ildönümünə həsr olunan tədbir keçirilib

Bakı:

23 °C

57 %

5 m/s

AZ RU EN

Ana səhifə / YAP xəbərləri / YAP Nəsimi rayon təşkilatında Xocalı faciəsinin 22-ci ildönümünə həsr olunan tədbir keçirilib

YAP Nəsimi rayon təşkilatında Xocalı faciəsinin 22-ci ildönümünə həsr olunan tədbir keçirilib

25.02.2014 [09:19]

Yeni Azərbaycan Partiyası (YAP) Nəsimi rayon təşkilatının və YAP Gənclər Birliyinin birgə təşkilatçılığı ilə Xocalı faciəsinin 22-ci ildönümü ilə bağlı Nəsimi rayon ərazisində yerləşən ali məktəblərdə təhsil alan xarici tələbələrlə görüş keçirilib. Tədbir iştirakçıları əvvəlcə Xocalı faciəsi qurbanlarının xatirəsini bir dəqiqəlik sükutla yad ediblər. Daha sonra Xocalı faciəsindən bəhs edən film nümayiş olunub. Tədbirdə rayonun ərazisindəki ali məktəblərdə təhsil alan xarici ölkələrdən olan tələbələrdən Lanita Qenberova (Qazaxıstan), Savran Efqan (Türkiyə), Monika Pasukeyeviç (Polşa), Aygül İmamhacı (Çin Xalq Respublikası) və başqaları çıxış edərək 22 il bundan əvvəl erməni quldurlarının Xocalıda törətdikləri qanlı qırğını azərbaycanlılara qarşı soyqırımı cinayəti kimi qiymətləndiriblər. Xarici ölkələri təmsil edən tələbə gənclər öz çıxışlarında Xocalı soyqırımının XX əsrin ən dəhşətli və amansız terror aktı olduğunu xüsusi vurğulayıblar.
Azərbaycan Dillər Universitetində təhsil alan türkiyəli tələbə Savran Efqanın Xocalı faciəsi haqqında çıxışı daha emosional olub. O, qeyd edib ki, Xocalı faciəsi bir dəhşətdir: “Xocalıda yaşayan Axıska türkləri də öldürülüblər. Gənc qadınların gözləri pendir kimi kəsilib, körpələr amansızlıqla qətlə yetirilib. Təəssüf ki, hələ də dünya dövlətləri erməni vəhşiliyinə layiqli qiymət verməyə tələsmir”.
YAP Nəsimi rayon təşkilatının sədri, Milli Məclisin deputatı Məlahət İbrahimqızı Xocalı soyqırımının dəhşətləri haqqında Azərbaycanda təhsil alan əcnəbi tələbələrin dilindən eşitməyin zəruriliyini vurğulayıb: “Əslində, tədbirdə çox danışmaq fikrim yoxdur. Xocalı dəhşətlərini Azərbaycanda təhsil alan xarici tələbələrin dilindən eşitmək, onların hisslərini duymaq daha gərəklidir. Çünki bu faciə insanlığa qarşı dəhşətli hadisədir”.
Milli Məclisin deputatı Sahibə Qafarova isə öz çıxışında Xocalı soyqırımının insanlığa qarşı cinayət olduğunu deyib: “Bu faciə heç bir zaman unudulmayacaq. Xocalı faciəsi zamanı insanlar erməni vəhşiliyinin qurbanı olublar. Biz hamılıqla çalışmalıyıq ki, dünya bu faciəyə biganə qalmasın”.
Çıxışlarda, həmçinin, əcnəbi tələbələrə Dağlıq Qarabağ həqiqətləri, Ermənistanın Azərbaycana hərbi təcavüzü və onun ağır nəticələri haqqında ətraflı məlumat verilib. Bildirilib ki, Xocalı qətliamı bəşər tarixində ən qanlı cinayətlərdən biri kimi qalacaq. Natiqlər xarici ölkələri təmsil edən tələbə gəncləri xalqımızın bu faciəsini dünya ictimaiyyətinə daha dolğun şəkildə çatdırmaq üçün fəal olmağa çağırıblar.
Qeyd olunub ki, Ermənistan hərbi birləşmələrinin Azərbaycanın işğal olunmuş ərazilərini qeyd-şərtsiz tərk etməsi ilə bağlı BMT Təhlükəsizlik Şurasının, Avropa Şurasının və İslam Konfransı Təşkilatının müvafiq qətnamələrinə təcavüzkar dövlət tərəfindən hələ də əməl edilmir.
Səlim Loğmanoğlu

Paylaş:

Baxılıb: 1305 dəfə