Xankəndi, Xocalı, Xocavənd və Ağdərənin səmasında dalğalanan üçrəngli bayrağımız Azərbaycanın əbədi və sarsılmaz suverenliyinin ən parlaq zəmanətidir

Bakı:

27 °C

61 %

10 m/s

AZ RU EN

Ana səhifə / YAP xəbərləri / Xankəndi, Xocalı, Xocavənd və Ağdərənin səmasında dalğalanan üçrəngli bayrağımız Azərbaycanın əbədi və sarsılmaz suverenliyinin ən parlaq zəmanətidir

Xankəndi, Xocalı, Xocavənd və Ağdərənin səmasında dalğalanan üçrəngli bayrağımız Azərbaycanın əbədi və sarsılmaz suverenliyinin ən parlaq zəmanətidir

18.09.2026 [23:33]

20 sentyabr tarixi Azərbaycanın müasir dövlətçilik tarixinə tam suverenliyin, qürurun və tarixi ədalətin bərpası günü kimi həkk olunmuşdur. Azərbaycan Respublikası Prezidentinin müvafiq sərəncamı ilə təsis edilən Xankəndi, Xocalı, Xocavənd və Ağdərə şəhərləri günü yalnız coğrafi ərazilərin azad olunmasını deyil, otuz illik işğala, parçalanmaya və həsrətə vurulan yekun zərbəni təcəssüm etdirir.

2023-cü ilin 19-20 sentyabr tarixlərində Azərbaycan Ordusunun həyata keçirdiyi bir günlük antiterror tədbirləri nəticəsində suverenliyimiz tam bərpa olundu. Qısamüddətli lokal xarakterli antiterror əməliyyatları nəticəsində düşmənin silah və texnikalarının böyük hissəsi sıradan çıxarıldı. Cəmi 23 saat 43 dəqiqə ərzində erməni separatçıları ağ bayraq qaldırmağa məcbur oldular.

1992-ci ildə bəşəriyyət tarixinin en qanlı soyqırımlarından birinə məruz qalan Xocalı şanlı zəfərlə öz mənəvi rahatlığına qovuşdu. Bu gün Xocalı qisas və kədər simvolu deyil, yeni tikilən yaşayış massivləri, müasir məktəblər və doğma ocaqlarına qayıdan sakinlərin təbəssümü ilə dirçələn bir şəhərdir.

Uzun illər separatizmin mərkəzi kimi istismar edilən Xankəndi bu gün yenidən Azərbaycanın elm, təhsil və mədəniyyət ocağına çevrilir. Qarabağ Universitetinin fəaliyyətə başlaması şəhərə gənclik enerjisi və intellektual nəfəs gətirərək bölgənin gələcək inkişaf drayverinə dönmüşdür.

Zəngin kənd təsərrüfatı potensialı, qədim Alban məbədləri və strateji yüksəklikləri ilə seçilən Xocavənd, hazırda "ağıllı kənd" layihələri və müasir infrastrukturla dinc həyata inteqrasiya olunur.

Yeraltı və yerüstü sərvətləri, su resursları və sənaye potensialı ilə Ağdərə rayonu yenidən qurulur, keçmiş köçkünlərin öz baba yurdlarına ləyaqətli qayıdışı üçün sürətli tikinti-abadlıq işləri aparılır.

Azərbaycan dövlətinin azad edilmiş ərazilərdə həyata keçirdiyi Böyük Qayıdış Dövlət Proqramı çərçivəsində misilsiz miqyasda bərpa işləri görülür. Beynəlxalq standartlara cavab verən yollar, tunellər, su anbarları, günəş və hidroelektrik stansiyaları istifadəyə verilir. İqtisadi zonaların yaradılması bölgəyə yerli və xarici investisiyaların cəlb olunmasını sürətləndirir.

Azərbaycan tarixinə qızıl hərflərlə yazəlan 20 Sentyabr tarixi Vətən torpaqları uğrunda canından keçən qəhrəman oğullarımızın qanının yerde qalmadığının sübutudur. Milli birlik və iradənin, Xalq-dövlət-ordu birliyinin yenilməz gücünü dünyaya göstərən rəmzdir. Ulu öndər Heydər Əliyevin şah əsəri olan müasir və müstəqil Azərbaycanın qüdrətinin, regionda yeni reallıq müəyyən edən, öz taleyinə özü sahib çıxan güclü dövlət konseptinin təsdiqidir.

Bu gün Xankəndi, Xocalı, Xocavənd və Ağdərənin səmasında dalğalanan üçrəngli bayrağımız, Azərbaycanın əbədi və sarsılmaz suverenliyinin ən parlaq zəmanətidir.

Vüsar İsmayılov

Yeni Azərbaycan Partiyası Binəqədi rayon təşkilatının sədri

Paylaş:

Baxılıb: 159 dəfə