Sabitlik və həmrəylik Türk dünyasının güc mənbəyidir

Bakı:

28 °C

65 %

8 m/s

Əlaqə

AZ RU EN

Ana səhifə / YAP xəbərləri / Sabitlik və həmrəylik Türk dünyasının güc mənbəyidir

Sabitlik və həmrəylik Türk dünyasının güc mənbəyidir

22.09.2026 [10:32]

Türk Dövlətləri Təşkilatının (TDT) beynəlxalq müstəvidə artan nüfuzu və genişlənən əməkdaşlıq imkanları türk dünyasının qarşılıqlı həmrəyliyinin, ortaq dəyərlərə söykənən münasibətlərinin və strateji baxışlarının məntiqi nəticəsidir. Sentyabrın 17-də Azərbaycan Respublikasının Prezidenti İlham Əliyevin TDT-yə üzv ölkələrin təhlükəsizlik üzrə rəhbər şəxslərini qəbul edərkən səsləndirdiyi fikirlər təşkilatın qarşısında dayanan mühüm vəzifələri, eləcə də türk dövlətlərini birləşdirən amillərin əhəmiyyətini bir daha ortaya qoydu.

Prezident İlham Əliyev çıxışında TDT-nin mühüm üstünlüklərindən birinin ortaq etnik köklərə, dilə, mədəniyyətə və ənənələrə malik ölkələri bir araya gətirməsi olduğunu vurğuladı. Dövlətimizin başçısının qeyd etdiyi kimi, belə mənəvi birlik və qarşılıqlı yaxınlıq dövlətlərarası əlaqələrin möhkəmlənməsində mühüm rol oynayır. Məhz bu amillər Türk Dövlətləri Təşkilatını yalnız siyasi və iqtisadi əməkdaşlıq platforması deyil, həm də xalqlarımızı bir-birinə daha sıx bağlayan mühüm birlik məkanı kimi səciyyələndirir.

Müasir dünyada təhlükəsizlik məsələləri dövlətlərin dayanıqlı inkişafının əsas şərtlərindən birinə çevrilib. Prezident İlham Əliyev çıxışında TDT-nin uğurlu inkişafının mühüm amillərindən biri kimi üzv ölkələrin ərazilərində sabitliyin, sülhün və təhlükəsizliyin hökm sürməsini xüsusi qeyd edib. Dövlətimizin başçısı vurğulayıb ki, sabitlik və təhlükəsizlik olmadan heç bir ölkənin davamlı inkişafı mümkün deyil.

Bu yanaşma təhlükəsizlik məsələlərinin yalnız ayrı-ayrı dövlətlərin deyil, bütövlükdə Türk dünyasının ümumi maraqlarından irəli gəldiyini göstərir. Terrorçuluq, transmilli mütəşəkkil cinayətkarlıq, narkotik vasitələrin qanunsuz dövriyyəsi, dini ekstremizm və hibrid təhdidlər kimi çağırışlar dövlətlər arasında koordinasiyalı fəaliyyətin və təcrübə mübadiləsinin vacibliyini artırır. Bu baxımdan TDT çərçivəsində təhlükəsizlik sahəsində əməkdaşlığın gücləndirilməsi ümumi sabitliyin və təhlükəsizliyin möhkəmləndirilməsinə xidmət edir.

Azərbaycanın bu prosesdə irəli sürdüyü təşəbbüslər Türk dövlətləri arasında qarşılıqlı etimadın və əməkdaşlığın dərinləşdirilməsinə mühüm zəmin yaradır. Bakı görüşü də təhlükəsizlik sahəsində dialoqun inkişafı və ortaq çağırışlara qarşı birgə fəaliyyət imkanlarının müzakirəsi baxımından əhəmiyyət daşıyır.

Prezident İlham Əliyevin çıxışında xüsusi diqqət yetirdiyi məsələlərdən biri də gənclər siyasəti və TDT-yə üzv ölkələrin gəncləri arasında əlaqələrin genişləndirilməsi olub. Dövlətimizin başçısı vurğulayıb ki, təşkilat çərçivəsində gənclər təşkilatlarının qarşılıqlı fəaliyyətinə daha çox diqqət yetirilməli, müntəzəm tədbirlər, forumlar və konfranslar keçirilməlidir.

Bu fikir türk dünyasının gələcəyinin formalaşmasında gənc nəslin roluna verilən yüksək əhəmiyyətin göstəricisidir. Gənclərin bir-biri ilə ünsiyyətinin genişlənməsi, ortaq layihələrdə iştirakı, fikir və təcrübə mübadiləsi xalqlarımız arasındakı tarixi və mənəvi bağların daha da möhkəmlənməsinə imkan yaradır. Eyni zamanda, belə əlaqələr gənc nəslin Türk dünyasının ortaq dəyərlərini daha yaxından tanımasına və bu dəyərlərin gələcək nəsillərə ötürülməsinə mühüm töhfə verir.

Prezident İlham Əliyevin irəli sürdüyü bu təşəbbüs gənclər təşkilatları qarşısında yeni əməkdaşlıq imkanları açır. Müxtəlif ölkələrin gənclərinin birgə forumlarda, konfranslarda, sosial və mədəni layihələrdə iştirakı qarşılıqlı anlaşmanı gücləndirməklə yanaşı, Türk dünyasının gələcək həmrəyliyinin daha möhkəm təməllər üzərində qurulmasına xidmət edir.

Beləliklə, Prezident İlham Əliyevin TDT-yə üzv ölkələrin təhlükəsizlik üzrə rəhbər şəxsləri ilə görüşdə səsləndirdiyi fikirlər Türk dünyasının qarşısında duran əsas prioritetləri aydın şəkildə ifadə edir. Sabitlik, sülh və təhlükəsizlik dövlətlərin inkişafının, gənclər arasında möhkəm əlaqələr isə Türk dünyasının gələcək birliyinin mühüm dayaqlarıdır. Bu istiqamətlərdə qarşılıqlı fəaliyyətin gücləndirilməsi TDT-nin potensialının daha da artırılmasına və təşkilatın beynəlxalq müstəvidə əməkdaşlıq imkanlarının genişlənməsinə zəmin yaradır.

Mələk Rzayeva

YAP Kəngərli rayon təşkilatının əməkdaşı

Paylaş:

Baxılıb: 66 dəfə