3 oktyabr 1993-cü il – Azərbaycan dövlətçiliyinin taleyində tarixi dönüş

Bakı:

21 °C

60 %

0 m/s

Əlaqə

AZ RU EN

Ana səhifə / YAP xəbərləri / 3 oktyabr 1993-cü il – Azərbaycan dövlətçiliyinin taleyində tarixi dönüş

3 oktyabr 1993-cü il – Azərbaycan dövlətçiliyinin taleyində tarixi dönüş

30.09.2026 [15:10]

1993-cü il oktyabrın 3-də Ümummilli Lider Heydər Əliyevin Azərbaycan
Respublikasının Prezidenti seçilməsi ölkəmizin müasir tarixində mühüm hadisə və
dövlətçilik tariximizin taleyüklü mərhələsi oldu. Həmin dövrdə Azərbaycan
mürəkkəb siyasi, iqtisadi və hərbi vəziyyətlə üzləşmiş, dövlət müstəqilliyinin
qorunması, ictimai-siyasi sabitliyin təmin edilməsi və idarəetmə sisteminin
möhkəmləndirilməsi əsas vəzifələrə çevrilmişdi. Belə bir şəraitdə Heydər Əliyevin
xalqın etimadı ilə dövlət rəhbərliyinə gəlməsi ölkənin gələcək inkişaf
strategiyasının müəyyənləşdirilməsində mühüm rol oynadı.
1991–1993-cü illər ölkəmizin müasir tarixində siyasi qeyri-sabitlik, iqtisadi
çətinliklər və idarəetmədə ciddi problemlərlə səciyyələnirdi. Ermənistanın hərbi
təcavüzü nəticəsində torpaqlarımızın işğalı, daxili siyasi qarşıdurmalar və sosial-
iqtisadi böhran dövlət müstəqilliyimizi ciddi təhlükə qarşısında qoymuşdu. Məhz
belə bir mürəkkəb dövrdə Ümummilli Lider Heydər Əliyevin siyasi hakimiyyətə
qayıdışı dövlətçiliyin qorunması, milli birliyin möhkəmləndirilməsi və ölkədə
sabitliyin bərqərar edilməsi istiqamətində yeni mərhələnin başlanğıcı oldu.
Ulu Öndərin zəngin siyasi təcrübəsi və peşəkar idarəçilik bacarığı ölkənin
qarşısında duran çətin vəzifələrin həllində mühüm əhəmiyyət daşıyırdı. Onun
rəhbərliyi ilə dövlət idarəçiliyinin möhkəmləndirilməsi, qanunun aliliyinin təmin
edilməsi və iqtisadi islahatların həyata keçirilməsi istiqamətində ardıcıl tədbirlər
görüldü. Heydər Əliyev müstəqil Azərbaycanın demokratik, hüquqi və dünyəvi
dövlət kimi inkişafını əsas strateji məqsəd müəyyən edərək dövlət quruculuğunun
fundamental prinsiplərini formalaşdırdı.
Ulu Öndərin müəyyən etdiyi iqtisadi inkişaf strategiyasının mühüm
istiqamətlərindən biri Azərbaycanın iqtisadi suverenliyinin möhkəmləndirilməsi
idi. 1994-cü ildə imzalanan “Əsrin müqaviləsi” ölkəmizin enerji strategiyasının
əsasını qoydu, xarici investisiyaların cəlb edilməsinə və beynəlxalq iqtisadi
əlaqələrin genişlənməsinə şərait yaratdı. Bununla yanaşı, sahibkarlığın inkişafı,
bazar iqtisadiyyatına keçid və iqtisadi islahatların həyata keçirilməsi ölkənin
uzunmüddətli inkişafının təməlini formalaşdırdı.
Dövlət quruculuğunun mühüm nailiyyətlərindən biri 1995-ci ildə müstəqil
Azərbaycanın ilk Konstitusiyasının qəbul edilməsi oldu. Konstitusiya demokratik,
hüquqi və dünyəvi dövlət quruculuğunun əsaslarını müəyyənləşdirdi, insan hüquq

və azadlıqlarının təmin olunması üçün hüquqi baza yaratdı. Heydər Əliyevin siyasi
irsində qanunun aliliyi, vətəndaşların hüquq bərabərliyi və dövlət qarşısında
məsuliyyət prinsipləri xüsusi yer tuturdu.
Ulu Öndərin həyata keçirdiyi siyasətin mühüm istiqamətlərindən biri də
Azərbaycanın beynəlxalq mövqelərinin möhkəmləndirilməsi idi. Onun rəhbərliyi
ilə ölkəmizin xarici siyasət əlaqələri genişləndirildi, beynəlxalq təşkilatlarla
əməkdaşlıq inkişaf etdirildi və Azərbaycanın milli maraqları beynəlxalq müstəvidə
ardıcıl şəkildə müdafiə olundu. Eyni zamanda, azərbaycançılıq ideologiyasının
dövlət siyasətinin əsas istiqamətlərindən birinə çevrilməsi milli həmrəyliyin və
dövlətçilik düşüncəsinin möhkəmləndirilməsinə xidmət etdi.
Heydər Əliyevin müəyyən etdiyi dövlətçilik kursu Azərbaycanın sonrakı inkişaf
mərhələlərində də davam etdirildi. Prezident İlham Əliyevin rəhbərliyi ilə həyata
keçirilən siyasət nəticəsində ölkəmizin iqtisadi və siyasi potensialı daha da
gücləndirildi, ərazi bütövlüyünün və suverenliyinin bərpası təmin olundu. Bu gün
Azərbaycanın müstəqil dövlət kimi beynəlxalq münasibətlər sistemində tutduğu
mövqe Ulu Öndərin müəyyən etdiyi strateji inkişaf xəttinin davamlılığını əks
etdirir.
3 oktyabr 1993-cü il Azərbaycan tarixində yalnız prezident seçkisi deyil, həm də
dövlətçilik tariximizin mühüm dönüş mərhələsi kimi yadda qalıb. Ümummilli Lider
Heydər Əliyevin zəngin siyasi irsi, müstəqil dövlət quruculuğu sahəsində müəyyən
etdiyi prinsiplər və milli maraqlara əsaslanan siyasəti müasir Azərbaycanın inkişaf
tarixində xüsusi əhəmiyyət daşıyır. Onun dövlətçilik ideyaları, azərbaycançılıq
məfkurəsi və müstəqilliyin qorunmasına dair çağırışları bu gün də ölkəmizin
gələcək inkişafının mühüm mənəvi və siyasi əsaslarından biridir.
Elnur Əsədov
YAP Kəngərli rayon təşkilatı