Dirçələn Cəbrayıl: Böyük Qayıdışın və Zəfər Siyasətinin Parlaq Təcəssümü.

Bakı:

16 °C

88 %

13 m/s

Əlaqə

AZ RU EN

Ana səhifə / YAP xəbərləri / Dirçələn Cəbrayıl: Böyük Qayıdışın və Zəfər Siyasətinin Parlaq Təcəssümü.

Dirçələn Cəbrayıl: Böyük Qayıdışın və Zəfər Siyasətinin Parlaq Təcəssümü.

02.10.2026 [14:36]

Azərbaycanın müasir dövlətçilik tarixində 4 oktyabr günü xalqımızın milli
qürurunun bərpa olunduğu, 27 illik həsrətə və ədalətsizliyə son qoyulduğu şanlı
dönüş nöqtəsidir. Prezident İlham Əliyevin müvafiq Sərəncamı ilə 4 oktyabrın
Cəbrayıl şəhəri günü kimi təsis edilməsi, 2020-ci ilin Vətən müharibəsində
qazanılmış Tarixi Qələbəmizin dövlət səviyyəsində əbədiləşdirilməsi ilə yanaşı,
həm də dövlətimizin siyasi və mənəvi iradəsinin bariz təcəssümüdür. Bu gün
Cəbrayıl artıq bir vaxtlar düşmən vandalizminin viran qoyduğu xarabalıq kimi
deyil, Şərqi Zəngəzurun sürətlə dirçələn, müasir sənaye və energetika mərkəzinə
çevrilən şəhəri və Böyük Qayıdışın parlaq mayakı kimi yenidən doğulur.
Cəbrayılın işğalı və azad edilməsi prosesi Azərbaycanın nə qədər çətin, lakin
şərəfli bir yol keçdiyini aydın göstərir. XX əsrin sonlarında rayonun işğala məruz
qalması nəticəsində on minlərlə həmyerlimiz doğma yurd-yuvasından didərgin
düşmüş, məcburi köçkünlük ağrılarını yaşamışdı. Düşmən yalnız yaşayış
məntəqələrimizi dağıtmaqla kifayətlənməmiş, bölgənin zəngin mədəni-tarixi irsini,
qədim abidələrini və təbii sərvətlərini də vəhşicəsinə məhv etməyə çalışmışdı. Şərq
memarlığının möcüzəsi olan Xudafərin körpüsündən tutmuş, əsrlərin yadigarı olan
türbələr və məscidlərə qədər hər bir nadir mənəvi dəyərimiz vandalizmə məruz
qaldı. Lakin nə uzunillik işğal, nə də çətin köçkünlük həyatı xalqımızın inamını,
dövlətimizin isə torpaqlarımızı azad etmək əzmini qıra bildi. Məhz Cocuq
Mərcanlının azad edilməsi və şanlı Aprel döyüşləri ilə atılan ilk addımlar gələcək
Böyük Qayıdışın sarsılmaz təməl daşına çevrildi.
44 günlük Vətən müharibəsində həyata keçirilən Cəbrayıl əməliyyatı hərbi-
strateji baxımdan müharibənin taleyini həll edən əsas mərhələ oldu. Düşmənin
illərlə qurduğu keçilməz müdafiə sədlərini yarmaq Azərbaycan Ordusunun yüksək
peşəkarlığı, Müzəffər Ali Baş Komandanın dəmir iradəsi və əsgərlərimizin
fədakarlığı sayəsində mümkün oldu. Cəbrayılın azad edilməsi digər işğal altında
olan rayonlarımıza — Zəngilana, Qubadlıya, Xocavəndə və Laçına gedən uğurlu
Zəfər yolunu açdı. Müzəffər Ali Baş Komandan İlham Əliyevin qədim Xudafərin
körpüsündə üçrəngli dövlət bayrağımızı ucaltması isə yalnız hərbi uğur deyil, milli
qürurumuzun, tarixi varisliyimizin və sarsılmaz suverenliyimizin bütün dünyaya
nümayişi idi.
Bu gün Cəbrayıl sadəcə bərpa olunmur, dövlətimizin uzaqgörən iqtisadi və
sosial strategiyası əsasında tamamilə yeni konsepsiya ilə təzədən qurulur. Ölkə
Rəhbərinin təşəbbüsü ilə yaradılan “Araz Vadisi İqtisadi Zonası” Sənaye Parkı
bütün regionun logistika, ticarət və istehsalat habına çevrilməsini təmin edir. Eyni
zamanda, bp şirkəti ilə birgə icra olunan nəhəng “Şəfəq” Günəş Elektrik Stansiyası
və yeni yarımstansiyalar Cəbrayılı azad edilmiş ərazilərin yaşıl enerji mərkəzinə
çevirir. Müasir magistral yollar, Günəş elektrik stansiyaları və yeni sosial
infrastruktur obyektləri bölgənin gələcək dayanıqlı inkişafının etibarlı zəmanətidir.
Şəhərin 2040-cı ilədək inkişafını əhatə edən Baş plan əsasında tikilən müasir
yaşayış kompleksləri, məktəblər, xəstəxanalar və abad kəndlər göstərir ki,
Azərbaycan dövləti öz vətəndaşının firavanlığı üçün bütün imkanlarını səfərbər
edib. Ən qürurverici məqam isə doğma yurdlarına qayıdan soydaşlarımızın

simasındakı təbəssüm və gələcəyə olan böyük inamdır. Cəbrayıla və onun
kəndlərinə artıq minlərlə sakinin daimi məskunlaşması Böyük Qayıdışın uğurla
real həqiqətə çevrildiyini sübut edir.
Biz, Yeni Azərbaycan Partiyasının üzvləri olaraq, Cəbrayılın timsalında
Müzəffər Ali Baş Komandanımız, Partiyamızın Sədri cənab İlham Əliyevin
rəhbərliyi ilə reallaşan bu tarixi dirçəliş prosesindən sonsuz fəxarət hissi keçiririk.
Cəbrayıla qayıdan hər bir ailə, istifadəyə verilən hər bir müəssisə və məktəb
Azərbaycan dövlətinin sarsılmaz qüdrətinin və Qələbəmizin əbədiliyinin
təntənəsidir. Cəbrayıl şəhəri günü münasibətilə bütün xalqımızı təbrik edir,
dövlətimizə və Zəfər Liderimizə yeni-yeni zirvələr arzulayırıq!
Zahir Qəhrəmanov
YAP Şirvan şəhər təşkilatının sədri

Paylaş:

Baxılıb: 47 dəfə