Azərbaycan və Kambocanı birləşdirən əsas amillərdən biri beynəlxalq təşkilatlar çərçivəsində qarşılıqlı münasibətlərin və əməkdaşlıq təcrübəsinin mövcudluğudur

Bakı:

23 °C

73 %

16 m/s

AZ RU EN

Ana səhifə / YAP xəbərləri / Azərbaycan və Kambocanı birləşdirən əsas amillərdən biri beynəlxalq təşkilatlar çərçivəsində qarşılıqlı münasibətlərin və əməkdaşlıq təcrübəsinin mövcudluğudur

Azərbaycan və Kambocanı birləşdirən əsas amillərdən biri beynəlxalq təşkilatlar çərçivəsində qarşılıqlı münasibətlərin və əməkdaşlıq təcrübəsinin mövcudluğudur

19.10.2026 [12:04]

Azərbaycanın xarici siyasətində müxtəlif regionlarla qarşılıqlı faydalı əlaqələrin qurulması və beynəlxalq əməkdaşlığın genişləndirilməsi mühüm istiqamətlərdən biridir. Bu baxımdan, Kamboca Krallığının Baş naziri Hun Manetin Azərbaycana rəsmi səfəri iki ölkə arasında mövcud münasibətlərin inkişafı və yeni əməkdaşlıq sahələrinin müəyyənləşdirilməsi baxımından əlamətdar hadisə kimi qiymətləndirilə bilər. Səfər çərçivəsində aparılan müzakirələr göstərir ki, Bakı ilə Pnompen arasında əlaqələrin daha geniş məzmun qazanması üçün əlverişli siyasi zəmin mövcuddur.

Azərbaycan Respublikasının Prezidenti İlham Əliyevin mətbuata verdiyi bəyanat iki dövlətin əməkdaşlıq gündəliyində yer alan məsələləri və gələcək fəaliyyət istiqamətlərini aydın şəkildə nümayiş etdirdi. Kamboca Baş nazirinin ölkəmizə səfərinin, eləcə də AQEM-in Zirvə görüşündə iştirakının əhəmiyyətini vurğulayan dövlət başçısı beynəlxalq münasibətlərdə dialoqun, qarşılıqlı etimadın və ortaq maraqların vacibliyinə diqqət çəkdi.

Azərbaycan və Kambocanı birləşdirən əsas amillərdən biri beynəlxalq təşkilatlar çərçivəsində qarşılıqlı münasibətlərin və əməkdaşlıq təcrübəsinin mövcudluğudur. Hər iki ölkənin Birləşmiş Millətlər Təşkilatı, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Məşvərət Şurası çərçivəsində təmasları siyasi dialoqun inkişafına imkan yaradır. Dövlətlərin suverenliyinə hörmət, beynəlxalq hüququn prinsiplərinə riayət və qarşılıqlı dəstək münasibətlərin möhkəm əsaslarını təşkil edir. Parlamentlərarası əlaqələrin inkişaf etdirilməsi və diplomatik təmasların genişləndirilməsi də bu prosesə əlavə stimul verir.

Siyasi dialoqun iqtisadi nəticələrlə tamamlanması Azərbaycan–Kamboca əməkdaşlığının qarşıdakı dövr üçün əsas vəzifələrindən biridir. Hazırda iki ölkə arasında ticarət əlaqələrinin həcmi mövcud imkanlarla müqayisədə məhdud olsa da, bu vəziyyət yeni təşəbbüslərin həyata keçirilməsi üçün geniş perspektivlərin qaldığını göstərir. Ticarət və investisiya sahəsində birgə işçi qrupunun yaradılması, biznes forumunun təşkili və sahibkarlar arasında birbaşa əlaqələrin qurulması iqtisadi münasibətlərin inkişafına real töhfə verə bilər.

Əməkdaşlığın genişləndirilməsi üçün sənaye, turizm, nəqliyyat, təhsil və rəqəmsal texnologiyalar xüsusi əhəmiyyət daşıyır. Azərbaycanın nəqliyyat-logistika imkanları, müasir infrastruktur layihələri və rəqəmsal dövlət xidmətləri sahəsində əldə etdiyi təcrübə Kamboca ilə qarşılıqlı təcrübə mübadiləsi üçün imkanlar yaradır. Xüsusilə “ASAN xidmət” modelinə göstərilən maraq ölkəmizin idarəçilik təcrübəsinin beynəlxalq səviyyədə tətbiqi baxımından diqqətəlayiqdir.

Humanitar sahədə əlaqələrin canlandırılması da ikitərəfli münasibətlərin uzunmüddətli inkişafına xidmət edə bilər. Keçmişdə kambocalı tələbələrin Azərbaycanda təhsil alması ilə bağlı təcrübənin yenidən gündəmə gətirilməsi, tələbə mübadiləsi proqramlarının hazırlanması və universitetlər arasında əməkdaşlığın qurulması xalqlar arasında qarşılıqlı anlaşmanı gücləndirə bilər. Bu cür təşəbbüslər dövlətlərarası münasibətlərin yalnız siyasi və iqtisadi maraqlarla məhdudlaşmamasına, həm də humanitar məzmun qazanmasına şərait yaradar.

Təhlükəsizlik məsələləri də əməkdaşlıq gündəliyində mühüm yer tutur. İşğaldan azad edilmiş Azərbaycan ərazilərində mina təhlükəsinin hələ də ciddi problem olaraq qalması bu sahədə beynəlxalq təcrübə mübadiləsini zəruri edir. Mina təmizlənməsi, mütəxəssislərin hazırlanması və təhlükəsizlik üzrə birgə təlimlərin keçirilməsi Azərbaycanla Kamboca arasında praktiki əməkdaşlığın mümkün istiqamətləri sırasındadır.

Azərbaycan öz ərazi bütövlüyünü və suverenliyini bərpa etdikdən sonra azad edilmiş ərazilərdə bərpa və quruculuq işlərini davam etdirir, Böyük Qayıdış Dövlət Proqramının icrası vasitəsilə həmin ərazilərin yenidən məskunlaşdırılması istiqamətində mühüm addımlar atır. Ölkəmizin mövqeyi sülhün beynəlxalq hüquqa, dövlətlərin suverenliyinə və ərazi bütövlüyünə hörmət əsasında təmin edilməsinin vacibliyinə söykənir.

Hun Manetin Azərbaycana rəsmi səfəri Bakı ilə Pnompen arasında əməkdaşlığın yeni mərhələyə keçməsi üçün əlverişli şərait formalaşdırır. Qarşılıqlı siyasi etimadın iqtisadi layihələr, humanitar təşəbbüslər və institusional əməkdaşlıqla möhkəmləndirilməsi gələcək münasibətlərin əsas istiqamətlərini müəyyən edəcək. Əldə olunmuş razılaşmaların ardıcıl şəkildə həyata keçirilməsi isə Azərbaycan–Kamboca əlaqələrinin daha geniş və davamlı tərəfdaşlığa çevrilməsinə xidmət göstərə bilər.

İsa Məmmədov

YAP Babək rayon təşkilatının sədri

Paylaş:

Baxılıb: 9 dəfə

Xəbər lenti

Hamısına bax