Azərbaycan-Kamboca əlaqələri yüksələn xətlə

Bakı:

23 °C

73 %

12 m/s

Əlaqə

AZ RU EN

Ana səhifə / YAP xəbərləri / Azərbaycan-Kamboca əlaqələri yüksələn xətlə

Azərbaycan-Kamboca əlaqələri yüksələn xətlə

19.10.2026 [12:05]

Azərbaycan Respublikasının Prezidenti İlham Əliyev ölkəmizdə rəsmi səfərdə olan Kamboca Krallığının Baş naziri Hun Maneti təntənəli şəkildə qarşılayıb. İki ölkə arasında diplomatik əlaqələrin inkişafı və müxtəlif sahələrdə əməkdaşlığın genişləndirilməsi baxımından mühüm əhəmiyyət kəsb edən bu səfər rəsmi qarşılanma mərasimi ilə başlayıb. Hər iki ölkənin Dövlət bayraqlarının dalğalandığı meydanda Kamboca Baş nazirinin şərəfinə fəxri qarovul dəstəsi düzülüb.

Rəsmi qarşılanma mərasimindən sonra Azərbaycan Prezidenti İlham Əliyev ilə Kambocanın Baş naziri Hun Manet arasında geniş tərkibdə görüş keçirilib. Görüş zamanı tərəflər ticarət, iqtisadiyyat, investisiya və digər sahələrdə ikitərəfli əməkdaşlıq imkanlarını müzakirə ediblər. Müzakirələrin yekunu olaraq iki ölkə hökumətləri arasında ticarət və iqtisadi əməkdaşlıq haqqında Çərçivə Sazişi imzalanıb. Keçirilən görüşlər Azərbaycan ilə Kamboca arasında münasibətlərin yeni mərhələyə qədəm qoyduğunu və gələcək birgə layihələr üçün geniş imkanların olduğunu bir daha nümayiş etdirib.

Geniş tərkibli görüşdə çıxış edən Prezident İlham Əliyev ali qonağı və onun rəhbərlik etdiyi nümayəndə heyətini salamlayaraq, bu rəsmi səfərin ikitərəfli əlaqələrin tarixində yeni bir səhifə açdığını vurğulayıb. Dövlətimizin başçısı Azərbaycan ilə Kamboca arasında müxtəlif istiqamətlərdə — ticarət dövriyyəsinin artırılması, qarşılıqlı investisiyaların yatırılması, birgə istehsal sahələrinin yaradılması, enerji təhlükəsizliyi və digər vacib sahələrdə əməkdaşlığın dərinləşdirilməsi üçün böyük potensialın olduğunu diqqətə çatdırıb.

Prezident İlham Əliyev, həmçinin Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Zirvə Görüşündə iştirak etmək dəvətini qəbul etdiyinə görə Baş nazir Hun Manetə təşəkkürünü bildirib. Dövlət başçısı Azərbaycanın bu möhtəşəm tədbirə ilk dəfə ev sahibliyi etdiyini və sədrliyimizin üzv ölkələr tərəfindən yekdilliklə dəstəklənməsinin ölkəmizin suverenliyə və müstəqil mövqeyə əsaslanan xarici siyasətinə verilən yüksək qiymətin təzahürü olduğunu bəyan edib.

Kambocanın Baş naziri Hun Manet öz növbəsində sammitə dəvətə və göstərilən samimi qonaqpərvərliyə görə dərin minnətdarlığını ifadə edib. O, Azərbaycanın regionda və beynəlxalq aləmdə artan nüfuzunu yüksək qiymətləndirərək, Kambocanın Cənub-Şərqi Asiya regionu ilə Azərbaycan arasında körpü rolu oynamağa hazır olduğunu və qarşılıqlı maraq kəsb edən bütün sahələrdə tərəfdaşlığın inkişafında maraqlı olduqlarını vurğulayıb.

Görüşdə tərəflər beynəlxalq təşkilatlar, o cümlədən BMT və Qoşulmama Hərəkatı çərçivəsində qarşılıqlı dəstəyin və səmərəli əməkdaşlığın davam etdirilməsinin vacibliyini qeyd ediblər. Müzakirələrin sonunda iki ölkə arasında münasibətlərin hüquqi-müqavilə bazasını möhkəmləndirən ikitərəfli sənədlər imzalanıb.

Kamboca Krallığının Baş naziri Hun Manetin Azərbaycana reallaşan bu rəsmi səfəri Bakı ilə Pnompen arasında diplomatik və iqtisadi münasibətlərin inkişafında keyfiyyətcə yeni bir mərhələnin əsasını qoydu. Yüksək səviyyəli qarşılanma mərasimi, aparılan səmərəli danışıqlar və imzalanan ikitərəfli sazişlər göstərir ki, coğrafi uzaqlığa baxmayaraq, hər iki ölkə qarşılıqlı maraqlara əsaslanan uzunmüddətli tərəfdaşlıqda qərarlıdır.

Səfər çərçivəsində əldə olunan razılaşmalar təkcə ticarət və iqtisadiyyat sahələrini deyil, həm də Cənubi Qafqaz ilə Cənub-Şərqi Asiya regionları arasında daha sıx əlaqələrin qurulmasını təmin edəcək. Beynəlxalq platformalarda səylərin birləşdirilməsi və BMT, Qoşulmama Hərəkatı kimi təşkilatlarda qarşılıqlı dəstəyin davam etdirilməsi barədə varılan yekdil rəy isə Azərbaycan ilə Kambocanın qlobal müstəvidə də etibarlı tərəfdaşlar olduğunu bir daha təsdiqlədi.

Türkanə Kərimova

YAP Babək rayon təşkilatının əməkdaşı

Paylaş:

Baxılıb: 7 dəfə

Xəbər lenti

Hamısına bax