Azərbaycan–Laos münasibətlərinin inkişafı yeni əməkdaşlıq imkanları yaradır

Bakı:

23 °C

73 %

16 m/s

Əlaqə

AZ RU EN

Ana səhifə / YAP xəbərləri / Azərbaycan–Laos münasibətlərinin inkişafı yeni əməkdaşlıq imkanları yaradır

Azərbaycan–Laos münasibətlərinin inkişafı yeni əməkdaşlıq imkanları yaradır

19.10.2026 [12:14]

Azərbaycanın xarici siyasətində müxtəlif regionlarla qarşılıqlı faydalı əlaqələrin qurulması və beynəlxalq əməkdaşlığın genişləndirilməsi mühüm yer tutur. Bu baxımdan, Laos Xalq Demokratik Respublikası ilə münasibətlərin inkişaf etdirilməsi və yeni tərəfdaşlıq imkanlarının yaradılması xüsusi əhəmiyyət daşıyır. Oktyabrın 13-də Azərbaycan Respublikasının Prezidenti İlham Əliyevin Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı mətbuata verdiyi bəyanat iki ölkə arasında siyasi, iqtisadi və humanitar əlaqələrin gələcək perspektivlərini əhatə edib.

Cənab Prezident İlham Əliyev bildirib ki, Azərbaycanla Laos arasında diplomatik münasibətlər 30 ildən artıqdır davam edir. Bu müddət ərzində ölkələr beynəlxalq təşkilatlar çərçivəsində qarşılıqlı dəstək nümayiş etdirib, parlamentlərarası əlaqələr və hakim partiyalar arasında əməkdaşlıq inkişaf edib. Dövlət başçısı Laos Prezidentinin Azərbaycana səfərinin ikitərəfli münasibətlərin daha da möhkəmlənməsinə töhfə verəcəyinə əminliyini ifadə edib.

Bəyanatda iqtisadi əməkdaşlığın genişləndirilməsi əsas məsələlərdən biri kimi diqqətə çatdırılıb. Prezident İlham Əliyev mövcud ticarət dövriyyəsinin iki ölkənin potensialını tam əks etdirmədiyini vurğulayaraq, iqtisadi əlaqələrin intensivləşdirilməsinin vacibliyini qeyd edib. Bakıda keçirilməsi nəzərdə tutulan Azərbaycan–Laos biznes forumunun işgüzar əlaqələrin inkişafına, yeni layihələrin müəyyənləşdirilməsinə və qarşılıqlı ticarətin artırılmasına imkan yaradacağı bildirilib.

Dövlət başçısı Azərbaycanın xarici ölkələrə investisiya yatırmaq imkanlarının genişləndiyini qeyd edib. Laos tərəfindən konkret investisiya layihələri təqdim ediləcəyi təqdirdə, Azərbaycan investorlarının həmin layihələri nəzərdən keçirməyə hazır olduğu vurğulanıb. Energetika, dağ-mədən sənayesi və kənd təsərrüfatı kimi sahələrdə əməkdaşlığın genişləndirilməsi üçün imkanların mövcudluğu diqqətə çatdırılıb.

Təhsil sahəsində əməkdaşlıq da bəyanatın mühüm istiqamətlərindən olub. Prezident İlham Əliyev sovet dövründə Azərbaycanda iki mindən çox laoslu tələbənin təhsil aldığını xatırladaraq, bu ənənənin bərpa edilməsini təklif edib. Laoslu tələbələr üçün təqaüd imkanlarının yaradılması iki ölkə arasında humanitar əlaqələrin və təhsil mübadiləsinin inkişafına xidmət edə bilər.

Bəyanatda mina təhlükəsi məsələsinə də toxunulub. Prezident İlham Əliyev Azərbaycanın işğaldan azad edilmiş ərazilərində mina probleminin yaratdığı çətinlikləri diqqətə çatdırıb, mina partlayışları nəticəsində insanların həlak olduğunu və ağır xəsarətlər aldığını bildirib. Bu sahədə təcrübə mübadiləsinin aparılması, müasir texnologiyaların tətbiqi və müvafiq təlimlərin təşkili əməkdaşlıq üçün əhəmiyyətli istiqamətlər kimi qeyd olunub.

Nəqliyyat və logistika sahəsində əməkdaşlıq perspektivləri də diqqət mərkəzində olub. Prezident İlham Əliyev Azərbaycanın nəqliyyat infrastrukturunun inkişaf etdiyini, hazırda yeni yük mənbələrinin cəlb edilməsinə və daşımaların həcminin artırılmasına diqqət yetirildiyini bildirib. Laosda nəqliyyat və dəmir yolu layihələrinin inkişafı gələcəkdə Transxəzər Beynəlxalq Nəqliyyat Marşrutu vasitəsilə əlaqələrin genişləndirilməsi üçün əlavə imkanlar yarada bilər.

Səfər çərçivəsində Azərbaycan və Laos arasında Birgə Bəyanatın qəbul edilməsi və bir sıra sənədlərin imzalanması ikitərəfli əməkdaşlığın inkişafı baxımından əhəmiyyətli addım olub. İmzalanmış sənədlər müxtəlif sahələrdə əlaqələrin möhkəmləndirilməsinə və qarşılıqlı fəaliyyətin genişləndirilməsinə hüquqi zəmin yaradır.

Cənab Prezident İlham Əliyevin mətbuata verdiyi bəyanat Azərbaycan–Laos münasibətlərinin inkişafı üçün mövcud imkanları bir daha ortaya qoyub. Siyasi dialoqun davam etdirilməsi, iqtisadi və humanitar əlaqələrin genişləndirilməsi, eləcə də əldə olunmuş razılaşmaların həyata keçirilməsi iki ölkə arasında tərəfdaşlığın daha da möhkəmlənməsinə xidmət edəcək.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 40 dəfə

Xəbər lenti

Hamısına bax