Füzuli – Tarixi Zəfərin və Böyük Qayıdışın ünvanı

Bakı:

23 °C

73 %

12 m/s

Əlaqə

AZ RU EN

Ana səhifə / YAP xəbərləri / Füzuli – Tarixi Zəfərin və Böyük Qayıdışın ünvanı

Füzuli – Tarixi Zəfərin və Böyük Qayıdışın ünvanı

19.10.2026 [12:23]

17 Oktyabr – Füzuli Şəhəri Günü xalqımızın tarixi Zəfərini, milli birliyini və doğma torpaqlarımıza qayıdış əzmini təcəssüm etdirən əlamətdar tarixlərdən biridir. Bu gün Azərbaycanın ərazi bütövlüyünün bərpası uğrunda apardığı mübarizənin, qəhrəman Azərbaycan Ordusunun şücaətinin və xalqımızın sarsılmaz iradəsinin rəmzi kimi xüsusi əhəmiyyət daşıyır.

Füzuli şəhəri 1993-cü il avqustun 23-də Ermənistan silahlı qüvvələri tərəfindən işğal edilmiş, uzun illər ərzində şəhərin tarixi və mədəni irsinə ciddi ziyan vurulmuşdur. Doğma yurdlarından didərgin düşən sakinlər illərlə öz evlərinə qayıtmaq arzusu ilə yaşamışlar. Azərbaycan xalqı isə heç vaxt torpaqlarının işğalı ilə barışmamış, ərazi bütövlüyünün bərpasına inamını qoruyub saxlamışdır.

2020-ci il sentyabrın 27-də başlayan Vətən müharibəsi Azərbaycanın tarixində yeni bir səhifə açdı. Müzəffər Azərbaycan Ordusu Ali Baş Komandan, Prezident İlham Əliyevin rəhbərliyi ilə həyata keçirdiyi uğurlu hərbi əməliyyatlar nəticəsində 2020-ci il oktyabrın 17-də Füzuli şəhərini işğaldan azad etdi. Bu tarixi hadisə xalqımızın yaddaşına əbədi həkk olundu, Azərbaycan əsgərinin qəhrəmanlığını və dövlətimizin qətiyyətini bütün dünyaya nümayiş etdirdi. Füzulinin azadlığı uğrunda canlarından keçən şəhidlərimizin əziz xatirəsi daim ehtiramla yad edilir.

Azərbaycanın dost və qardaş ölkələrlə münasibətləri, xüsusilə Özbəkistanla mövcud olan möhkəm dostluq və strateji tərəfdaşlıq əlaqələri işğaldan azad edilmiş ərazilərin bərpası prosesində də özünü göstərir. Özbəkistanın Azərbaycana göstərdiyi mənəvi dəstək, qardaşlıq həmrəyliyi və Füzulinin yenidən qurulmasına verdiyi töhfə iki xalq arasındakı tarixi bağların bariz ifadəsidir. Özbəkistan tərəfindən Füzuli şəhərində müasir məktəb binasının inşa edilməsi bu dəstəyin əyani nümunəsidir. Qardaş ölkənin hədiyyəsi olan məktəb Azərbaycan-Özbəkistan dostluğunun rəmzinə çevrilərək bölgədə təhsilin inkişafına və gələcək nəsillərin yetişməsinə xidmət edir. Bu təşəbbüs göstərir ki, Azərbaycan və Özbəkistan arasındakı qardaşlıq münasibətləri yalnız siyasi və iqtisadi əməkdaşlıqla məhdudlaşmır, həm də humanitar sahədə konkret layihələrlə möhkəmlənir.

Bu gün Füzuli şəhərində genişmiqyaslı bərpa və quruculuq işləri həyata keçirilir. Müasir infrastrukturun yaradılması, yolların çəkilməsi, yaşayış və sosial obyektlərin inşası şəhərin yenidən dirçəldilməsinə xidmət edir. Füzuli Beynəlxalq Hava Limanının istifadəyə verilməsi Qarabağın nəqliyyat imkanlarının genişləndirilməsi və bölgənin inkişafı baxımından mühüm əhəmiyyət daşıyır. Bütün bu layihələr Azərbaycanın işğaldan azad edilmiş ərazilərin bərpasına və Böyük Qayıdışın təmin olunmasına xüsusi önəm verdiyini göstərir.

17 Oktyabr – Füzuli Şəhəri Günü xalqımız üçün qürur, Zəfər və qayıdış günüdür. Bu əlamətdar tarix Vətən uğrunda canından keçən qəhrəmanlarımızın xatirəsini yaşadır, gələcək nəsillərə vətənpərvərlik, milli birlik və torpağa sədaqət kimi dəyərləri aşılayır. Azad Füzuli Azərbaycan-Özbəkistan qardaşlığının, xalqımızın sarsılmaz iradəsinin və quruculuq əzminin təcəssümü kimi inkişaf edərək ölkəmizin Zəfər salnaməsində özünəməxsus yer tutur.

Elnur Əsədov

YAP Kəngərli rayon təşkilatının əməkdaşı

Paylaş:

Baxılıb: 14 dəfə

Xəbər lenti

Hamısına bax