YAP Nərimanov rayon təşkilatında bələdiyyə üzvlüyünə namizədlərlə gənclərin görüşü keçirilib

Bakı:

30 °C

50 %

7 m/s

AZ RU EN

Ana səhifə / YAP xəbərləri / YAP Nərimanov rayon təşkilatında bələdiyyə üzvlüyünə namizədlərlə gənclərin görüşü keçirilib

YAP Nərimanov rayon təşkilatında bələdiyyə üzvlüyünə namizədlərlə gənclərin görüşü keçirilib

17.12.2014 [10:20]

Dünən Yeni Azərbaycan Partiyası (YAP) Nərimanov rayon təşkilatında 23 dekabrda keçiriləcək bələdiyyə seçkilərində irəli sürülən namizədlərlə gənclərin görüşü keçirilib. Tədbiri giriş sözü ilə YAP Nərimanov rayon təşkilatının sədri Təmraz Tağıyev açaraq, qarşıdan gələn bələdiyyə seçkiləri və ölkəmizdə həyata keçirilən bələdiyyə institutu haqqında danışaraq, yerli özünüidarəetmə orqanlarına keçiriləcək seçkilərin ölkəmizin ictimai-siyasi həyatında mühüm bir hadisə olduğunu bildirib. T.Tağıyev YAP Nərimanov rayon təşkilatı tərəfindən namizədliyi irəli sürülmüş 19 nəfərin təbliğat-təşviqat kampaniyasının uğurla davam etdiyini söyləyib. Təşkilat sədri, həmçinin, namizədlər sırasında gənclərin böyük üstünlük təşkil etdiyini və qarşıdan gələn bələdiyyə seçkilərində gənclərin məhz YAP tərəfindən irəli sürülmüş namizədləri dəstəkləyəcəyinə əminliyini vurğulayıb.
Daha sonra YAP Gənclər Birliyi ofisinin rəhbəri Əli Pənahov çıxış edərək, ölkə başçısı, Yeni Azərbaycan Partiyasının Sədri İlham Əliyev tərəfindən gənclərə göstərilən diqqət və qayğının nəticələrindən, Azərbaycan gənclər siyasətindən və bu siyasətin beynəlxalq təşkilatlar tərəfindən nümunə götürülməsindən geniş bəhs edib. Həmçinin, Ə.Pənahov, ölkədə keçirilən hər bir seçkidə olduğu kimi bələdiyyə seçkilərində də YAP namizədlərinin qələbə qazanacağına və bu prosesdə hər bir gəncin aktiv iştirak edəcəyinə əminliyini vurğulayıb.
YAP Nərimanov rayon təşkilatı Gənclər Birliyinin sədri Yusif Babanlı çıxış edərək, ölkənin və YAP-ın ictimai-siyasi həyatında fəallıq göstərən gənclərin namizədlər sırasında yer almalarının dövlət gənclər siyasətinin uğurlu nəticəsi olduğunu qeyd edib. O, Yeni Azərbaycan Partiyasının sıralarında birləşən gənclər ordusunun bu seçkilərdə də yüksək fəallıq göstərərək etimadı doğruldacaqlarını, partiya namizədləri sırasında olan bütün üzvlər kimi gənclərin də yüksək səs faizi ilə qələbə qazanacaqlarına əminliyini ifadə edib.
YAP Nərimanov rayon təşkilatı tərəfindən namizədliyi irəli sürülmüş İradə Qarayeva isə çıxışında bildirib ki, Azərbaycanın və regionun ən güclü siyasi partiyası olan YAP yarandığı gündən iştirak etdiyi bütün seçkilərdə qələbə qazanıb. O, bələdiyyə seçkilərində gənclərin də YAP-ın namizədlərinə səs verəcəklərinə şübhə etmədiyini deyib və gəncləri seçki prosesində fəal olmağa çağırıb.
Nardar BAYRAMLI

Paylaş:

Baxılıb: 916 dəfə