Yeni Azərbaycan Partiyası Azərbaycan Respublikası Müdafiə Nazirliyinin bir qrup əsgər və zabitinin ailə üzvləri ilə birlikdə yay istirahətinin təşkili kampaniyasına start verib

Bakı:

22 °C

57 %

1 m/s

AZ RU EN

Ana səhifə / YAP xəbərləri / Yeni Azərbaycan Partiyası Azərbaycan Respublikası Müdafiə Nazirliyinin bir qrup əsgər və zabitinin ailə üzvləri ilə birlikdə yay istirahətinin təşkili kampaniyasına start verib

Yeni Azərbaycan Partiyası Azərbaycan Respublikası Müdafiə Nazirliyinin bir qrup əsgər və zabitinin ailə üzvləri ilə birlikdə yay istirahətinin təşkili kampaniyasına start verib

21.06.2017 [09:35]

Yeni Azərbaycan Partiyası (YAP) Azərbaycan Respublikası Silahlı Qüvvələrinə ümumxalq inamının və dəstəyinin əyani ifadəsi olaraq, ötən il həyata keçirdiyi dəstək aksiyasını bu ilin yay mövsümündə də davam etdirmək barədə qərar qəbul edib.
Yeni Azərbaycan Partiyasının təşəbbüsü və vəsaiti hesabına Azərbaycan Respublikası Müdafiə Nazirliyinin bir qrup əsgər və zabitinin ailə üzvləri ilə birlikdə yay istirahətinin təşkili kampaniyasına start verilib.
2016-cı ilin aprelində erməni işğalçılarının azğın təxribatlarının qarşısını igidliklə almış və düşmən həmlələrinə layiqli cavab vermiş Silahlı Qüvvələrin bir qrup əsgər və zabitinin ailə üzvləri ilə birlikdə yay istirahəti Lənkəran rayonu ərazisində yerləşən “Palıdlı sahil” istirahət mərkəzində təşkil edilib. Bu kampaniya mərhələli şəkildə davam edəcək.
Yeni Azərbaycan Partiyası tərəfindən atılmış bu vətənpərvər addım Azərbaycan Respublikası Silahlı Qüvvələrinə, onun əsgər və zabit heyətinə ümumxalq inamının və dəstəyinin, ordu və xalqın möhkəm birliyinin əyani ifadəsi kimi dəyərləndirilməlidir.
Dünən aprel döyüşlərində şəhid olan, döyüşlərdə sağlamlığını itirən hərbi qulluqçuların ailə üzvlərinin bir qrupu Yeni Azərbaycan Partiyasının maliyə dəstəyi ilə Lənkərana - “Palıdlı sahil” istirahət mərkəzinə yola salınıb.
Müdafiə Nazirliyinin nümayəndəsi yolasalma mərasimində çıxış edərək deyib ki, tədbirə dəvət olunanlar bir həftə ərzində cənub bölgəsinin gorməli yerləri ilə tanış olacaq, Ulu öndər Heydər Əliyevin adı ilə bağlı yerləri, Şəhidlər xiyabanını ziyarət edəcək, muzeylərdə olacaqlar. Tədbir təkcə istirahətlə məhdudlaşmayacaq. Astara, Lerik, Lənkəran rayonlarının sakinləri qazanılan qələbə üçün şəhid olanlarımızın, sağlamlığını itirənlərimizin ailə üzvləri ilə tanış olacaqlar ki, bu da vətənpərvərlik duyğularının daha da yüksəldilməsində vəsilə olacaqdır. Tədbirin davam etdiyi müddətdə Müdafiə Nazirliyi və “Palıdlı sahil” istirahət mərkəzinin birgə təşkilatçılığı ilə silsilə mədəni-kütləvi tədbirlər keçiriləcək ki, bu tədbirlərin də mahiyyəti dövlətçiliklə bağlı olacaq. Belə tədbirlər ordu ilə xalq arasında münasibətlərin daha da möhkəmlənməsinə yönəldilir.
Tədbir müddətində yerli incəsənət ustaları özfəaliyyət kollektivlərinin üzvləri, eləcə də H.Aslanov adına Mərkəzi Zabitlər Evinin yaradıcı kollektivi maraqlı konsert proqramları ilə çıxışlar edəcək.
İstirahətə yola düşməzdən əvvəl Silahlı Qüvvərin Təlim-Tədris Mərkəzində iki dəfə Sovet İttifaqı Qəhrəmanı Həzi Aslanovun abidəsi ziyarət edilib, önünə güllər qoyulub. Hamı bir daha əmin olub ki, heç kim unudulmur.
Şəhid Tural Həşimlinin atası Əbdül Həşimli belə bir tədbirə, bu diqqətə, qayğıya görə görə təşkilatçılara minnətdarlığını bildirib.
Yolasalma mərasimində Azərbaycanın Milli Qəhrəmanı Çingiz Qurbanovun atası Salman Qurbanov deyib:
- Mənim oğlum da Vətən naminə döyüşdü, şəhid oldu. Onun xidmət yoldaşlarının hər birini oğlum bilirəm. Inanıram ki, əsgərlərimiz yaxın vaxtlarda qazanacağı qələbə ilə şəhidlərimizin ruhunu şad edəcəklər. Həmin gün müdafiə naziri general-polkovnik Zakir Həsənovun əmri ilə oğlumun adı verilmiş postda olacam. Bu tədbirə görə təşkilatçılara minnətdarlığımı bildirirəm.
Nicat İsgəndərlinin (Tərtər), Müşviq Orucovun (Zəngilan), Zakir Cəfərlinin (Ağdam) ailə üzvləri də bu tədbirdən məmnun qaldıqlarını deyirlər.
C.Naxçıvanski adına Hərbi liseyin kursantları aprel döyüşlərində şəhid olanların, döyüşlərdə sağlamlığını itirənlərin ailə üzvlərini Lənkərana alqışlarla yola salıblar.
Lənkəranda “Palıdlı sahil” istirahət mərkəzinin bir həftəsi təkcə istirahət edənlərin deyil, tədbirin təşkilatçılarının da, istirahət edənlərlə ünsiyyətdə olanların da yaddaşından heç zaman silinməyəcək.
Qeyd edək ki, Yeni Azərbaycan Partiyası 2016-cı ilin yay mövsümündə də Azərbaycan Respublikası Müdafiə Nazirliyinin bir qrup əsgər və zabitinin ailə üzvləri ilə birlikdə yay istirahətini təşkil edib, bundan əvvəl isə dəfələrlə müxtəlif formalarda, o cümlədən xeyriyyə tədbirləri təşkil etməklə Azərbaycan Respublikası Silahlı Qüvvələrinə Yardım Fonduna vəsaitlər köçürüb.