Yeni Azərbaycan Partiyası Tovuz rayon təşkilatı yaranmasının 25-ci ildönümünü qeyd edib

Bakı:

20 °C

94 %

8 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası Tovuz rayon təşkilatı yaranmasının 25-ci ildönümünü qeyd edib

Yeni Azərbaycan Partiyası Tovuz rayon təşkilatı yaranmasının 25-ci ildönümünü qeyd edib

26.07.2018 [10:42]

Yeni Azərbaycan Partiyasının (YAP) Tovuz rayon təşkilatı yaranmasının 25-ci ildönümünü qeyd edib. Bu münasibətlə keçirilən tədbirin iştirakçıları əvvəlcə Yeni Azərbaycan Partiyasının yaradıcısı, Ümummilli liderimiz Heydər Əliyevin şəhərin mərkəzi meydanındakı abidəsi önünə gül dəstələri düzərək, xatirəsini ehtiramla anıblar. Heydər Əliyev Mərkəzində davam edən tədbiri rayon İcra Hakimiyyətinin başçısı Məmməd Məmmədov açaraq partiya üzvlərini bu tarixi gün münasibəti ilə təbrik edib, onlara siyasi fəaliyyətlərində uğurlar arzulayıb. Sonra o, Yeni Azərbaycan Partiyasının yarandığı tarixi şəraiti təhlil edib, partiyanın yaranma zərurətindən danışıb, ölkə əhalisinin, o cümlədən də tovuzluların Ulu öndərin ideyalarına sədaqətlə xidmət etdiyini vurğulayıb.
Tədbirdə məruzə ilə çıxış edən YAP Tovuz rayon təşkilatının sədri Məzahir Bayramov rayon təşkilatının 25 iyul 1993-cü ildə təsis olunduğunu bildirib. Buna qədər 1993-cü ilin mart ayından başlayaraq təşkilatın təsis olunması üçün çalışmış insanların fədakarlıqlarını qeyd edən sədr təşkilatın inkişaf mərhələlərindən danışıb. M.Bayramov deyib ki, rayon təşkilatı hazırda sıralarında 7909 nəfəri birləşdirən siyasi qüvvə kimi rayonun ictimai-siyasi həyatında aparıcı rola malikdir. M.Bayramov, eyni zamanda, Yeni Azərbaycan Partiyasının rayon və şəhər təşkilatları sədrlərinin son müşavirəsində qarşıya qoyulmuş vəzifələrdən, bu istiqamətdə ilk partiya təşkilatlarının görəcəkləri işlərdən danışıb.
Tədbirdə rayonun ictimai-siyasi həyatında fəal iştirak edən bir qrup partiya üzvünə rayon İcra Hakimiyyətinin fəxri fərmanı, hədiyyələr verilib, partiya sıralarına yeni qəbul olunmuş gənclərə üzvlük vəsiqələri təqdim olunub.
Tədbirin yekununda rayon İcra Hakimiyyətinin başçısı Məmməd Məmmədov bildirib ki, bizim qarşımızda rayonumuzu inkişaf etdirmək, əhalimizə yaxşı xidmət göstərmək, onlarda məmnunluq yaratmaq, ölkə Prezidenti cənab İlham Əliyevin bütün tapşırıq və göstərişlərini vaxtında və düzgün yerinə yetirmək vəzifəsi durur. “Bu işdə bütün partiya üzvlərimiz nümunə göstərməlidirlər”, - deyən M.Məmmədov rayon İcra Hakimiyyəti və partiyanın rayon təşkilatının dövlətçilik maraqlarına əsaslanan qarşılıqlı əməkdaşlığı ilə bu vəzifələrin uğurla yerinə yetiriləcəyinə əminliyini ifadə edib.

Paylaş:

Baxılıb: 1455 dəfə