Azərbaycanın beynəlxalq səviyyədə böyük nüfuza malik olması işğalçı Ermənistanı narahat edir

Bakı:

26 °C

50 %

3 m/s

AZ RU EN

Ana səhifə / YAP xəbərləri / Azərbaycanın beynəlxalq səviyyədə böyük nüfuza malik olması işğalçı Ermənistanı narahat edir

Azərbaycanın beynəlxalq səviyyədə böyük nüfuza malik olması işğalçı Ermənistanı narahat edir

23.09.2020 [09:13]

Məlum olduğu kimi, Ermənistan tərəfindən işğal edilən Azərbaycan torpaqlarında zaman-zaman qeyri-qanuni fəaliyyətlərə rəvac verilir. Elə beynəlxalq hüququn norma və prinsiplərinə zidd olaraq işğal altında olan ərazilərimizdə qeyri-qanuni məskunlaşdırılmaya dair faktlar bu qəbildəndir. Qeyd edək ki, Ermənistanın işğalçılıq siyasətinin nəticəsində həmin torpaqlarda bir nəfər də olsun azərbaycanlı qalmayıb. İndi isə işğalçı ölkə tərəfindən həmin torpaqlarda qeyri-qanuni məskunlaşdırma həyata keçirililir. Daha doğrusu Ermənistanın əvvəlki hakimiyyətləri tərəfindən əsası qoyulan bu qeyri-qanuni məskunlaşdırma siyasəti hazırda Paşınyan rejimi tərəfindən də davam etdirilir ki, bu da beynəlxalq humanitar hüququn, eləcə də 1949-cu il Cenevrə Konvensiyası və ona əlavə Protokolların müvafiq müddəalarının kobud şəkildə pozulmasıdır. Eyni zamanda, işğalçılar Azərbaycanın təbii sərvətlərini vəhşicəsinə dağıdır, tarixi-mədəni abidələri talan edirlər. Onu da vurğulamaq yerinə düşər ki, bu cür faktları mütəmadi olaraq beynəlxalq ictimaiyyətin diqqətinə çatdıran Azərbaycan tərəfi Ermənistanın işğalçılıq siyasətini ifşa edir.
Yuxarıda qeyd olunduğu kimi, Ermənistan hazırda da işğal olunmuş Azərbaycan torpaqlarında qeyri-qanuni məskunlaşdırma siyasətini davam etdirməkdədir. Belə ki, Suriya ermənilərindən sonra bu dəfə də Livan ermənilərinin Ermənistana miqrasiyası, oradan isə işğal edilmiş Azərbaycan ərazilərinə köçürülməsi hədəflənir. Hətta sosial şəbəkələrdə Livandan gətirilən erməni ailələrinin qədim tarixi şəhərimiz Şuşada yerləşdirilməsi barədə məlumatlar yer alıb. Yeri gəlmişkən, Prezident İlham Əliyev sentyabrın 19-da Heydər Əliyev adına Bakı dərin özüllər zavodunda “Abşeron” yatağının dəniz əməliyyatlarının təməlqoyma mərasimindən sonra ölkə telekanalarına müsahibəsində bu məqama da toxunub. Dövlət başçısı Ermənistan hakimiyyətinin, son dövrlərdə əl atdığı təxribatlarda, o cümlədən işğal edilmiş Dağlıq Qarabağ və ətraf rayonlarda qeyri-qanun məskunlaşdırmada əsas hədəflərinin nədən ibarət olduğunu açıqlayıb: “Ermənistan tərəfindən qanunsuz məskunlaşdırma aparılır. Bu, bütün beynəlxalq konvensiyalara ziddir. Onların ağlı çatmır, təcrübəsi, bilikləri yoxdur - onlar bunu nümayişkaranə göstərirlər. Bu, Cenevrə Konvensiyasına tamamilə ziddir, bu, cinayətdir. İşğal edilmiş torpaqlara haradansa insan gətirib qanunsuz məskunlaşdırmaq cinayətdir. Bunu Paşinyan rejimi şüurlu şəkildə edir. Bu, təxribatdır, bizi təxribata çəkirlər”.
Beləliklə, işğalçı Ermənistanın mövcud hakimiyyətinin bu cür təxribatlara əl atmasının arxasında dayanan səbəblərdən biri mövcud status-kvonu saxlamaq istəyi ilə bağlıdırsa, digər səbəb də Azərbaycanın inkişafı fonunda işğalçı ölkənin düşdüyü acınacaqlı durumla bağlıdır. Yəni, görünən odur ki, Azərbaycanın inkişafı və regionda aparıcı mövqeyə malik olması, beynəlxalq səviyyədə nüfuzunun artması işğalçı Ermənistanı narahat edir. Ona görə də düşmən müxtəlif təxribatlara əl atır.
Yadigar Nağıyev
YAP Səbail rayon təşkilatının
idarə heyətinin üzvü

Paylaş:

Baxılıb: 778 dəfə