İkinci Qarabağ müharibəsinin dərsləri Ermənistan tərəfindən unudulmamalıdır

Bakı:

20 °C

94 %

8 m/s

Əlaqə

AZ RU EN

Ana səhifə / YAP xəbərləri / İkinci Qarabağ müharibəsinin dərsləri Ermənistan tərəfindən unudulmamalıdır

İkinci Qarabağ müharibəsinin dərsləri Ermənistan tərəfindən unudulmamalıdır

16.11.2022 [10:48]

Anar Nəbiyev

YAP Qazax rayon təşkilatının sədri

Dünyaya səs salan tarixi Zəfərimizdən iki il keçdi. Dövlət başçısı İlham Əliyevin “Zəfər Gününün təsis edilməsi haqqında” Sərəncamında da qeyd edildiyi kimi, Azərbaycana qarşı hərbi təcavüzün nəticələrinin aradan qaldırılması və BMT Təhlükəsizlik Şurasının 822, 853, 874 və 884 saylı qətnamələrinin həyata keçirilməsi üzrə 30 ilə yaxın davam edən danışıqlar prosesi Ermənistanın destruktiv mövqeyinə görə nəticə vermədi. 2019-cu ildən etibarən isə Ermənistan hərbi-siyasi rəhbərliyinin bir-birinin ardınca verdiyi təxribatçı bəyanatlar və atdığı addımlar danışıqlar prosesini məqsədyönlü şəkildə tamamilə pozdu. Ermənistan bir daha özünün əsl məqsədinin mövcud status - kvonu möhkəmləndirməkdən və Azərbaycan ərazilərini həmişəlik olaraq işğal altında saxlamaqdan ibarət olduğunu nümayiş etdirdi.

Ermənistanın təxribatına və növbəti hərbi təcavüzünə cavab olaraq, Azərbaycan xalqı torpaqlarımızın işğaldan azad, Ermənistanın sülhə məcbur edilməsi, BMT Təhlükəsizlik Şurasının məlum qətnamələrinin tələblərinin yerinə yetirilməsi, məcburi köçkünlərin öz doğma torpaqlarına qayıtması və ədalətin bərpası üçün Vətən müharibəsinə başladı. Bu müqəddəs amal uğrunda bütün Azərbaycan xalqı səfərbər və həmrəy oldu.

44 gün davam edən hərbi əməliyyatlar nəticəsində müzəffər Azərbaycan Ordusu Cəbrayıl, Füzuli, Zəngilan, Qubadlı şəhərlərini, Azərbaycan xalqının tarixində, mədəniyyətində xüsusi yeri olan, Qarabağın tacı Şuşa şəhərini, Zəngilan rayonunun Mincivan, Ağbənd, Bartaz qəsəbələrini, Xocavənd rayonunun Hadrut qəsəbəsini və bir çox kəndlərini, Tərtər rayonunun Suqovuşan kəndi, Xocalı və Laçın rayonlarının bir neçə kəndləri daxil olmaqla, ümumilikdə, 300-dən çox yaşayış məntəqəsini, həmçinin Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad etdi.

Ermənilərin 30 ildə bu torpaqlarda qurduqları istehkamlar onların bu ərazilərimizi sülh yolu ilə geri qaytarmaq fikirlərinin olmadığını təsdiqlədi. Rəşadətli Azərbaycan əsgər və zabitləri addım-addım irəliləyərək, Ermənistanın uzun illər ərzində qurduğu mühəndis-istehkam sistemlərini yarıb keçdilər. Azərbaycan əsgərinin canı, qanı bahasına torpaqlarımız işğaldan azad edildi, bu ərazilərimizdə Azərbycan Bayrağı dalğalanır. Azərbaycanın hərbi sahədə qazandığı qələbələr, xüsusilə Şuşanın düşmən əsarətindən qurtarılması müharibənin taleyində həlledici rol oynadı, 10 noyabr 2020-ci il tarixli üçtərəfli Bəyanatın imzalanması Azərbaycanın hərbi-siyasi Qələbəsinin və Ermənistanın kapitulyasiyasının təsdiqi oldu.

Tarixi Zəfərimizdən sonra Azərbaycan Ermənistanla münasibətlərdə yeni səhifənin açılması, regionda davamlı sülhün və təhlükəsizliyin təmin olunması üçün Ermənistana sülh təklifini etdi. Azərbaycan 10 noyabr Bəyanatından irəli gələn öhdəlikləri yeriinə yetirdiyi halda, Ermənistan laqeyd yanaşmaları ilə diqqətdən kənarda qalmır. İşğalçı dövlət unudur ki, Azərbaycan 30 ilik işğal dövründəki Azərbaycan deyil.

Dövlət başçısı, Müzəffər Ali Baş Komandan İlham Əliyev hər bir çıxışında Ermənistana və ona havadarlıq edən dövlətlərə mesajlarını çatdırır. Prezident İlham Əliyevin noyabrın 8-də Şuşada Zəfər Günü ilə bağlı təşkil olunan tədbirdə hərbçilər qarşısında çıxışı da bu baxımdan diqqətdə oldu. “İkinci Qarabağ müharibəsinin dərsləri Ermənistan tərəfindən unudulmamalıdır və onlar bilməlidirlər ki, odla oynamaq onlara baha başa gələcək. Əgər orada kimsə – istər iqtidar, istər müxalifət, istərsə də xaricdən göndərilmiş, öyrədilmiş hansısa ünsür yenidən bizə qarşı hansısa bəd fikirdə olmaq niyyətindədirsə, o, bizim yumruğumuzu bir daha görəcək və son iki ilin tarixi bunu göstərdi” söyləyən Prezident İlham Əliyev bildirdi ki, hətta bu il “Fərrux”, “Qisas” əməliyyatı, 13-14 sentyabr Ermənistan-Azərbaycan sərhədindəki hadisələr Ermənistan üçün dərs olmalıdır. Biz bu dərsi öyrədirik və ümid edirik ki, nəhayət, onlar bunu anlayacaq, boyunlarını büküb öz daxili işləri ilə məşğul olacaq, Qarabağa göz dikməyəcəklər: “Qarabağ bizim torpağımızdır. Rus sülhməramlılar orada müvəqqəti yerləşiblər, 2020-ci ilin 10 noyabr Bəyanatında onların müddəti göstərilir və əgər kiməsə bel bağlayırlarsa, yenə də faciə ilə üzləşəcəklər.”

Azərbaycan bütün beynəlxalq razılaşmalara həmişə hörmətlə yanaşır. Əgər hansısa öhdəliyi öz üzərimizə götürmüşüksə, onu yerinə yetiririk. Qeyd etdiyimiz kimi, ölkəmiz 2020-ci ilin 10 noyabr Bəyanatında üzərinə götürdüyü bütün öhdəlikləri yerinə yetirir. Amma Ermənistan yerinə yetirmir. Müzəffər Ali Baş Komandan bu çağırışı etdi: “Mən bir daha demək istəyirəm, o öhdəlik hələ tam yerinə yetirilməyib. Erməni silahlı qüvvələri Qarabağda nə gəzir? Bizim səbrimiz tükənməz deyil və bir daha xəbərdarlıq etmək istəyirəm, əgər bu öhdəlik yerinə yetirilməsə, Azərbaycan lazımi addımlar atacaq.”

Paylaş:

Baxılıb: 656 dəfə