Türkiyədə 10-cu “TEKNOFEST” festivalına start verilib

Bakı:

16°C

88%

1m/s

Əlaqə

AZ RU EN

Ana səhifə / Yeni texnologiyalar / Türkiyədə 10-cu “TEKNOFEST” festivalına start verilib

Türkiyədə 10-cu “TEKNOFEST” festivalına start verilib

02.10.2024 [14:47]

Oktyabrın 2-də Adana şəhərində Türkiyənin ən böyük aviasiya, astronavtika və texnologiya festivalı “TEKNOFEST-2024”ə start verilib.

AZƏRTAC xəbər verir ki, Türkiyə Sənaye və Texnologiya Nazirliyinin dəstəyi ilə Türkiyə Texnologiya Komandası Vəqfi (T3) tərəfindən hər il təşkil olunan bu tədbir onuncu dəfədir ki, keçirilir.

2022-ci ilin may ayında Azərbaycan qardaş Türkiyə ilə dostluq və strateji müttəfiqliyə sadiqliyini bir daha nümayiş etdirərək “TEKNOFEST” festivalına ev sahibliyi edən ilk xarici ölkə oldu.

2018-ci ildə ilk “TEKNOFEST” festivalının proqramına 20 min gənc Türkiyə vətəndaşının iştirakı ilə 14 yarış daxil idisə, bu il ümumi iştirakçı sayı 1 milyon 650 min nəfər olan 790 min komanda 50 yarış kateqoriyasında qələbə uğrunda mübarizə aparır.

Ötən il Adanada keçirilən festivalla müqayisədə hazırda 11 yeni kateqoriya üzrə yarışlar təşkil olunub.

Festivalın təşkilatçıları Türkiyədə gələcək peşəkar kadrların formalaşmasının mühüm stimulu olan gənc nəslin elm və texnologiyaya marağının artırılmasına maksimum töhfə verməyə hazır olduqlarını bəyan ediblər.

Aparıcı dövlət müəssisələri, texnologiya nəhəngləri və universitetlər də daxil olmaqla, 128 müxtəlif təşkilat və şirkət Şakirpaşa Hava Limanında ən son inkişaf nümunələrini nümayiş etdirir.

Festivalın tarixində ilk dəfə olaraq, dördgünlük tədbirlərin proqramına kvant texnologiyaları üzrə müsabiqələr daxil edilib. Pilotsuz uçuş aparatlarının ən yaxşı operatorlarını müəyyənləşdirmək üçün müsabiqələr də nəzərdə tutulub.

Ümumi sahəsi 270 min kvadratmetr olan festival ərazisində çoxsaylı sərgilər, konsertlər və aviaşoular təşkil edilir.

Festival çərçivəsində Antalyada keçirilən müsabiqələrin ilkin mərhələsinin qalibləri üçün 25 texnoloji nominasiya üzrə mükafatlar da nəzərdə tutulub.

Maraqlananlar “zaman tunelinə” və “rəqəmsal kainat zonasına” baş çəkə və uçuş simulyatorunun idarəetmə sükanı arxasında əyləşə bilərlər.

“Türk Ulduzları” və “SOLOTÜRK” pilotaj qrupları ilə yanaşı, Adana sakinləri və festivalın qonaqları “Akıncı”, “Aksunqur”, “Anka” və “Bayraktar TB2” PUA-ların, eləcə də yerli “Hürkuş” təyyarələrinin uçuşlarına şahidlik edəcəklər. “Atak” hücum helikopterinin pilotları da bacarıqlarını nümayiş etdirəcəklər.

İştirakçılar “Bayraktar-TB3” və “ANKA III”” PUA-larının ilk uçuşlarının şahidi olacaqlar.

Adana sakinləri və qonaqlar üçün yerli pilotsuz hərbi təyyarə “Kızılelma” və Türkiyənin “Gökbey” helikopteri də nümayiş etdirilir.

Gözlənildiyi kimi, oktyabrın 4-də Prezident Rəcəb Tayyib Ərdoğan Adanada “TEKNOFEST-2024” festivalının keçirildiyi ərazini ziyarət edəcək.

Keçən il Türkiyənin 3 ən böyük şəhərində - İstanbul, Ankara və İzmirdə növbə ilə təşkil edilən festivala ümumilikdə 4,5 milyon insan qatılıb. Hazırkı tədbirin təşkilatçıları yeni rekord göstərici qeydə alınacağını proqnozlaşdırırlar.

Paylaş:

Baxılıb: 135 dəfə