Karantin qayıdacaq?

AZ RU EN

Ana səhifə / Xəbər lenti / Karantin qayıdacaq?

Karantin qayıdacaq?

11.08.2022 [10:19]

MİKAYIL

Azərbaycanda son sutkada 534 nəfər koronavirusa yoluxub, 6 nəfər ölüb. Nəticələrə nəzərən deyə bilərik ki, COVİD-19 virusunun yenidən geniş yayılması, üç ilə yaxın müddətdə davam edən pandemiya şəraiti bütün dünya üçün mürəkkəb bir çağırışdır. Şübhəsiz, pandemiya təcrübəmiz var və ən sərt tədbirlərin öhdəsindən məharətlə gəlməyi bacarmışıq. İndi deyirlər ki, yenidən həmin günlərin qayıtma ehtimalı var. Yenə sərt karantin rejimi qayıdacaq. Bu məlumat nə dərəcədə doğrudur?

Çinin Hubey vilayətinin paytaxtı Uhan şəhərində yenidən karantin elan olunması bu fikri qüvvətləndirir. “Global Times” qəzeti yazır ki, COVID-19 virusuna insanlar arasında ilk yoluxmaların aşkarlandığı Çində şəhər hökuməti rayon ərazisində epidemik mübarizə tədbirlərini gücləndirmək barədə qərar qəbul edib.

Qeyd edək ki, təxminən 11 milyon əhalisi olan Uhan 2020-ci ilin əvvəlindəki COVID-19 böhranı dövründə 76 günlük sərt qapanma dövrü yaşayıb. Bu, dünyada bir şəhər üçün ən uzun müddət sərt qapanma kimi tarixə düşüb.

Eləcə də Beyhay şəhərində COVID-19 səbəbindən sərt karantin rejimi tətbiq olunur. Cəmi 186 yoluxma faktı aşkarlandığı üçün bütün şəhərdə karantin rejimi sərtləşdirilib.

Avstriya isə nəinki rejimi sərtləşdirməyi düşünür, hətta koronavirusa yoluxanlar üçün məcburi karantini aradan qaldırıb. Bu barədə razılıq Səhiyyə Nazirliyi və federal əyalət rəhbərləri arasında əldə edilib. Qərara əsasən, avqustun 1-dən sonra virusa yoluxanlar özlərini xəstə hiss etmədiyi halda evi tərk edə biləcəklər. Onlar yalnız ictimai nəqliyyat məhdudiyyətlərinə riayət etməli olacaqlar, yəni nəqliyyatda FFP2 maskalarından istifadə ediləcək, eləcə də ictimai məkanlarda digər insanlarla iki metrlik sosial məsafə saxlamalı olacaqlar. Həmçinin koronavirusa yoluxmuş şəxslərin xəstəxanalar, tədris müəssisələri, uşaq bağçaları, ahıllar evləri kimi məkanlara girişinə icazə verilməyəcək.

Ölkəmizdə vəziyyət necədir və necə olacaq? “Əgər xəstələrin sayı az olarsa, karantinin sərtləşdirilməsinə heç bir gərək yoxdur”. Bunu Səhiyyə Nazirliyinin mütəxəssis-eksperti, infeksionist Təyyar Eyvazov deyib. İnfeksionist bildirib ki, hələ ki, hazırda Azərbaycanda epidemioloji durum qənaətbəxşdir: “Müvafiq qurumlar müəyyən tövsiyələri dilə gətirir. Bunlar maskaların taxılması, sosial məsafənin gözlənilməsi və buster vaksin dozasının vurulmasıdır. Ümumilikdə sərt tədbirlərin baş verəcəyini düşünmürəm”.

Səhiyyə Nazirliyinin mütəxəssis-eksperti Zakir Quliyev isə deyir ki, son vaxtlar yoluxma sayında müşahidə olunan artım bir mütəxəssis kimi onu narahat edir. Bildirib ki, hazırda ABŞ, Fransa, Böyük Britaniya və Almaniya kimi ölkələrdə kəskin artım müşahidə olunur. Ölkəmizdə müşahidə olunan yoluxma hallarına gəlincə isə: “Qeyd edim ki, ölkəmizdə ötən aylarla müqayisədə virusa yoluxmada artım müşahidə edirik. Bunu nəzərə alaraq, gələcəkdə rəqəmlərin daha da təhdidedici səviyyəyə çatmaması üçün vətəndaşlarımızdan karantin rejiminin qaydalarına riayət etmələrini xahiş edərdim. Bunu deyərkən, gigiyena qaydaları və sosial məsafəni nəzərdə tuturam” - deyib.

Doktor virusdan qorunmağın yollarını bir daha xatırladıb: “Vətəndaşlara koronavirusun yeni dalğasından qorunmaq üçün hamımızın bildiyi gigiyenik qaydaları (tez-tez əlləri yumaq və ya antiseptik vasitələrdən istifadə) davam etdirmələrini tövsiyə edirəm. Ciddi zərurət yaranmadığı halda insanların kütləvi toplaşdığı məkanlardan çəkinsinlər. Eyni zamanda, vətəndaşlara qapalı məkanlarda, həmçinin ictimai nəqliyyatda sıxlıq olduğu təqdirdə qoruyucu maskalardan istifadə etmələrini məsləhət görürəm”.

Paylaş:

Baxılıb: 367 dəfə