Yenilik yalnız uğur gətirə bilər!

Bakı:

18 °C

68 %

6 m/s

Əlaqə

AZ RU EN

Ana səhifə / Xəbər lenti / Yenilik yalnız uğur gətirə bilər!

Yenilik yalnız uğur gətirə bilər!

14.09.2022 [10:37]

Jurnalistlərin qurultayına günlər qaldı...

Jurnalistlərin növbəti qurultayı sentyabrın 24-ü keçiriləcək. 2003-cü ildən Mətbuat Şurasına rəhbərlik edən Əflatun Amaşovun yeni qurultayda namizədliyinin verilməyəcəyi bildirilir. Hərçənd ki, bununla bağlı özünün açıqlaması yoxdur. Mətbuat Şurasının 20 ilə yaxın fəaliyyətinin təhlili, Azərbaycan mediasının inkişafında Əflatun Amaşovun fəaliyyəti və yeni seçiləcək sədrdən gözləntilərin müzakirəsi aktuallaşıb.

Keçmiş təcrübənin üzərində yeni Mətbuat Şurası qurmalıyıq

Məlum qurultay barədə “Yeni Azərbaycan”a danışan “Səs” qəzetinin baş redaktoru Bəhruz Quliyev bildirib ki, Mətbuat Şurasının təsis edildiyi ildən bu günə qədərki fəaliyyəti qənaətbəxş hesab edilə bilər. Baş redaktorun sözlərinə görə, Mətbuat Şurası mühüm problemlərə toxunaraq cəmiyyət-dövlət və mətbuat-dövlət arasında olan münasibətlərin aydınlaşmasında, tənzimlənməsində fəaliyyət göstərə bilib: “Ancaq bu gün hər bir sahədə yeniliyə ehtiyac var. Çünki dünya inkişaf edir və belə olan təqdirdə bütün qurumlar, özünü tənzimləyən qəzetlər, agentliklər, televiziyalar dünyanın tələblərinə cavab verməlidir. Hesab edirəm ki, məsələyə bu konteksdən baxsaq, Mətbuat Şurasının da yenilənməsinə zərurət yaranıb. Məsələn, bir heyət hansısa quruma 25-30 il rəhbərlik etdikdə istər-istəməz ortaya suallar çıxır, bəzi nüanslar var ki, onlar tələblərə cavab vermir. Qlobal dünyanın çağırışları operativlikdir. Yenilik isə yalnız uğur gətirə bilər. Biz köhnə təcrübənin üzərində yenilik edirik. Bir var ki, köhnəlikdən tam imtina edilsin, bu, ağır nəticələrə səbəb ola bilər. Amma məqsədimiz odur ki, redaksiyaların, baş redaktorların mətbuata öz töhfəsini verməsi üçün özümüzü yeniləyək. Bütün dövlət qurumlarında yeni qaydalar tətbiq edilir, dəyişikliklər olur, işçilərin vətəndaşlara münasibətində operativlik əldə edilir. Bu, mətbuatda da özünü göstərməlidir”.

B.Quliyev qeyd edib ki, müasir Azərbaycan mediası dünyanın çağırışlarına cavab verir: “Məsələn, 44 günlük Vətən müharibəsi göstərdi ki, Azərbaycan mediası heç də “oturmayıb”, “yatmayıb”, mediamız düşmənlə mübarizəyə hazırdır. Necə ki, döyüşdə düşmənlə mübarizə apardıq, ordumuz 5-ci nəsil müharibə nümunəsi göstərdi və dünyaya çağırış etdi ki, müharibə qaydalarında dəyişiklik etmək lazımdır. Eyni zamanda, mediamızla da dünyaya çağırış etməyi bacarmalı, 5-ci nəsil mübarizə üsulunu mətbuatda göstərməliyik. Azərbaycan mətbuatı bütün dünyaya sübut etməlidir ki, özünü yeniləyə bilir və yeni qaydalara, qanunlara, yeni zərurətdə yaranmış qlobal çağırışlara qoşula bilir. Ona görə də sentyabrın 24-də keçiriləcək qurultaydan gözləntilərimiz olduqca çoxdur. Hesab edirəm ki, modern düşüncələr və modern insanlarla keçmiş təcrübənin üzərində yeni Mətbuat Şurası qura biləcəyik. Bununla da mediamız yenilənəcək!”.

Yeganə BAYRAMOVA

Paylaş:

Baxılıb: 564 dəfə