“5-ci Şərq Tərəfdaşlığı E-infrastrukturlar Konfransı” keçirilir

Bakı:

16 °C

94 %

8 m/s

Əlaqə

AZ RU EN

Ana səhifə / Xəbər lenti / “5-ci Şərq Tərəfdaşlığı E-infrastrukturlar Konfransı” keçirilir

“5-ci Şərq Tərəfdaşlığı E-infrastrukturlar Konfransı” keçirilir

29.09.2022 [10:17]

Dünən “5-ci Şərq Tərəfdaşlığı E-infrastrukturlar Konfransı”nın (The 5th Eastern Partnership E-infrastructures Conference - “EaPEC 2022”) açılış mərasimi keçirilib.

Tədbirdə Azərbaycan dövlətinin yüksək vəzifəli şəxsləri, AMEA-nın elmi-tədqiqat institutlarının rəhbərləri, 70-ə yaxın ölkəni, o cümlədən müvafiq beynəlxalq təşkilatları və nüfuzlu xarici şirkətləri təmsil edən alim və mütəxəssislər iştirak ediblər.

GEANT Assosiasiyasının təşəbbüsü və koordinasiyası ilə həyata keçirilən, Şərq Tərəfdaşlığı ölkələrini əhatə edən “EaPConnect” (‘EU4Digital: Connecting Research and Education Communities) layihəsi çərçivəsində reallaşdırılan tədbirin keçirilməsində əsas məqsəd Şərq Tərəfdaşlığı ölkələri arasında əməkdaşlıq əlaqələrinin genişləndirilməsi və bu dövlətlərin Avropa ictimaiyyətinə inteqrasiyasının sürətləndirilməsidir.

Açılış mərasimində çıxış edən AMEA-nın prezidenti vəzifəsini icra edən akademik Arif Həşimov bildirib ki, Azərbaycanın Avro-Atlantik məkana inteqrasiya olunması istiqamətində uzun illərdir ki, ardıcıl və məqsədyönlü siyasət həyata keçirilir: “Azərbaycan dövləti ölkəmizdə IV Sənaye İnqilabı texnologiyalarının geniş və effektli tətbiqi ilə bağlı bir sıra addımlar atmaqdadır. Hesab edirəm ki, Azərbaycanın Avropaya inteqrasiyası baxımından bu texnologiyaların imkanları mühüm əhəmiyyət kəsb edir”.

Akademikin sözlərinə görə, “EaPEC 2022” Azərbaycan elmi ictimaiyyətinin Avropa mühitinə inteqrasiyasını sürətləndirməklə yanaşı, azərbaycanlı alimlərə xarici həmkarları ilə birgə tədqiqatlar aparmağa, layihələr həyata keçirməyə və beynəlxalq elmi əməkdaşlığı möhkəmləndirməyə imkan verəcək.

GEANT-ın Baş direktoru Erik Hayzer “EaPEC 2022” konfransının Azərbaycan elmi və təhsilinin inkişafı baxımından geniş imkanlar açdığını vurğulayıb. Hayzer Azərbaycan dövlətinin Şərq Tərəfdaşlığı ölkələri ilə əməkdaşlıq əlaqələrinin genişləndirilməsi, alim və tədqiqatçılarımızın Avropanın elm və təhsil sahəsindəki resurs və xidmətlərindən daha səmərəli istifadəsinin təmin edilməsi istiqamətində lazımi köməkliyi göstərməyə hazır olduğunu bildirib.

Baş direktor konfrans çərçivəsində iştirakçı ölkələrdən olan xüsusi ekspertlərin müxtəlif mövzulara dair məruzələrinin dinləniləcəyini, həmkarlarla mühüm məsələlər üzrə təcrübə və fikir mübadiləsinin aparılacağını qeyd edib.

Elm və təhsil nazirinin müavini Firudin Qurbanov çıxışı zamanı deyib ki, Azərbaycanda dünyanın nüfuzlu qurumlarının təşkilatçılığı ilə beynəlxalq elmi tədbirlərin keçirilməsi ənənəvi hal alıb. Nazir müavini bu tədbirin Azərbaycan elmi və təhsilinin inkişafı üçün böyük əhəmiyyət daşıdığını diqqətə çatdırıb, dünyada sürətlə inkişaf edən informasiya texnologiyalarının ölkəmizin elm və təhsil sistemi qarşısında yeni tələblər qoyduğunu bildirib. O, belə bir nüfuzlu tədbirin keçirilməsinin Şərq Tərəfdaşlığı ölkələri arasında elm və təhsil sahəsində əməkdaşlığın dərinləşdirilməsi və gücləndirilməsi baxımından son dərəcə vacib olduğunu qeyd edib.

Rəqəmsal inkişaf və nəqliyyat nazirinin müavini Samir Məmmədov da Şərq Tərəfdaşlığı ölkələrinin informasiya və kommunikasiya texnologiyaları sahəsində əməkdaşlığının əhəmiyyətini vurğulayıb: “İki gün ərzində konfransda təqdim olunacaq məruzələr, aparılacaq müzakirələr şübhəsiz ki, Azərbaycan və Avropa ölkələri arasında elmi əlaqələrin daha da yaxınlaşması və genişlənməsinə ciddi təkan verəcək”.

Konfransda bir sıra digər önəmli məsələlər ətrafında da fikir mübadiləsi aparılıb.

Azərbaycan İnternet Forumunun prezidenti, İT məsələləri üzrə mütəxəssis Osman Gündüz “Yeni Azərbaycan” qəzetinə açıqlamasında konfransın keçirilməsini yüksək dəyərləndirdiyini bildirib: “Konfrans Avropa Birliyi ölkələri ilə Azərbaycanın elm adamlarının, elm ictimaiyyətinin və elm qurumlarının inteqrasiyasını nəzərdə tutur. Avropada bəlli bir elm-təhsil resursları var, onların böyük bir assosiasiyası, böyük şəbəkəsi var. Alimlərin Avropa Birliyi ölkələrində formalaşan informasiya resurslarından istifadə imkanlarının yaradılması və digər bu kimi amilləri nəzərə alaraq onu deyə bilərik ki, keçirilən konfrans olduqca faydalıdır”.

“Konfransda Şərq Tərəfdaşlığına daxil olan ölkələrin, o cümlədən Azərbaycanın da alimlərinin, elm ictimaiyyətinin Avropa elm aləminə, elm şəbəkəsinə inteqrasiyasında bu konfransın əhəmiyyəti böyük olacaq. Yəni hesab edirəm ki, həm təcrübə mübadiləsi etmək, həm də onların resurslarından çevik və effektiv istifadə edilməsi qaydalarının öyrənilməsi, mənimsənilməsi baxımından bu təcrübə mübadiləsi bizim üçün də əhəmiyyət kəsb edəcək”, - deyə O.Gündüz bildirib.

Qeyd edək ki, “5-ci Şərq Tərəfdaşlığı E-infrastrukturlar Konfransı” bu gün də davam edir.

Nicat PAŞA

Paylaş:

Baxılıb: 568 dəfə