Metroda yeni ödəniş üsulu...

Ana səhifə / Xəbər lenti / Metroda yeni ödəniş üsulu...

Metroda yeni ödəniş üsulu...

07.09.2023 [12:16]

Plastik kart saxlamağa ehtiyac qalmayacaq

Yeganə BAYRAMOVA

“Bakı Metropoliteni” QSC pilot layihə kimi ilk dəfə yeni ödəniş üsulunun tətbiqinə başlayır. Belə ki, Bənövşəyi xəttin “Xocəsən” və “8 Noyabr” stansiyalarında sərnişinlər “BakıKart” plastik kartından savayı, “BakıKart” mobil tətbiqinin QR biletlərindən də istifadə edə bilərlər.

Bu məqsədlə “BakıKart” ödəmə sistemini həyata keçirən “K Group” MMC stansiyaların avtomat buraxılış-nəzarət məntəqələrindəki qurğularda texniki işləri yerinə yetirib, proqram təminatını həyata keçirən sistemlər quraşdırıb, test rejimində sınaqlar aparıb. Şirkət ötən müddətdə Bakı metropoliteninin stansiyalarındakı müvafiq avadanlıqlarda yeni sistemlərin quraşdırılması üçün mühüm olan texniki məsələləri öyrənib.

Yeni üsulla ödəməni həyata keçirmək üçün “BakıKart” mobil tətbiqi yüklənməlidir. Daha sonra mobil tətbiqdə qeydiyyatdan keçmək, “pul kisəsi”ndə balansı ən azı 1 manat artırmaq lazımdır.

Xatırladaq ki, Bakı metropolitenində gediş haqqının ödənilməsi 2015-ci ilin avqust ayından “BakıKart” plastik kartları vasitəsilə həyata keçirilir.

Vaxta qənaət...

QR biletlərinin əhəmiyyəti barədə “Yeni Azərbaycan”a danışan “Bakı Metropoliteni” QSC-nin mətbuat xidmətinin rəisi Bəxtiyar Məmmədov bildirib ki, yeni üsul kartsız, həmçinin elektron cihazlar üzərindən ödəmə imkanlarını genişləndirməyə, sərnişinlərə xidmət mədəniyyətinin keyfiyyətini yüksəltməyə kömək edir. Onun sözlərinə görə, “BakıKart” mobil tətbiqi “BakıKart” plastik kartını almağa sərf olunan 2 manata qənaət etməyə imkan verir: “Daim əl altında plastik kart saxlamağa ehtiyac qalmır. Sadəcə, QR bileti yaratmaq üçün sərnişinlərin mobil telefonunda internetə çıxışının olması yetərlidir.

QR bilet vaxta qənaətdir. Sərnişin plastik karta gediş haqqını yükləmə terminalına yaxınlaşmadan, elə hərəkətdə ikən mobil cihazında QR bilet yaradaraq turniketlərə yaxınlaşa bilər.

Bundan savayı, mobil tətbiqdən istifadə edərkən ödəniş tarixçələrini izləmək imkanı da əldə edilir. Bu isə sərnişinə ictimai nəqliyyatdan istifadə edərkən aylıq büdcəsini elektron qaydada daha rahat izləməyə kömək edəcək”.

QR bilet 5 dəqiqə ərzində etibarlıdır

B.Məmmədov QR bilet istifadəçilərinin diqqət etməli olduğu məqamlardan da danışıb: “Sərnişinlər bilməlidirlər ki, QR bilet yalnız bir gediş üçün və 5 dəqiqə ərzində etibarlıdır. QR bilet üçün “pul kisəsi”ndə 1 manat bloklanır. Gediş haqqı bloklanan məbləğdən çıxılır və qalıq məbləğ “pul kisəsi”nə qaytarılır. QR biletdən 5 dəqiqə ərzində istifadə edilməzsə, bloklanan məbləğ 72 saat ərzində “pul kisəsi”nə qaytarılır.

“K Group” MMC-nin pilot layihəsinin davamı kimi, ödənişin yeni üsulu növbəti mərhələdə Bənövşəyi xəttin “Avtovağzal” və “Memar Əcəmi” stansiyalarında tətbiq ediləcək. Həmçinin QR biletlə ödəniş imkanlarının mərhələli şəkildə Yaşıl və Qırmızı xətlərin stansiyalarında tətbiqi üzərində texniki işlərə başlanılıb”.

Paylaş:

Baxılıb: 122 dəfə